[cat girl]

--------------------------------------------------------------------------------

حطّيها حلقة في ودنك
اتعاملي مع الشاب اللي إنت بتتمنيه لنفسك وكأنه شخص عادي.. ولاااا يهمك
++++++++++++++++++++++++++++++++++++****


كنا قاعدين في الجامعة في فترة بين محاضرتين.. وهو كان قاعد في وسط الشلة.. حبيت أتكلم معاه قوي لوحدينا بعيد عن الدوشة لأني بارتاح في وجوده جدا.. فقلت له: إيه رأيك لو شربنا حاجة ساقعة في الكافيتريا.. الجو حر نار؟
ابتسم وقال لي: وماله؟ لسه عندنا وقت
بدأت العلاقة اللي بينّا تاخد شكل تاني.. أخدت رقم التليفون منه وبقيت باتصل بيه بصفة دايمة. كان بيبقى مشغول في أحيان كتير في الكلية، وبالتالي كنت باتصل أنا.. يعني ماكنتش باعمل فرق
بالتدريج حسيت إنه مسئول مني.. بقيت باتصل بيه أصحيه من النوم.. باتصل بيه لما آجي نازلة الجامعة عشان أشوف هنتقابل فين.. بنكون مع بعض طول اليوم.. ولما بيرجع باطمّن عليه بمكالمة برضه
وأبعت له رسالة قبل ما أنام
في الأول الوضع كان ماشي كويس قوي.. وكان هو مبسوط باهتمامي ده، وأنا كنت مبسوطة لأني قدرت أسعده
++++++++++++++++++++++++++++++++++++****
دلوقتي بقالنا 5 شهور.. بس فيه مشكلة.. ساعات كتير باحس إنه زهقان مني، وبيبعد عني باستمرار.. بيتحجج بأي حاجة عشان ينهي ميعادنا بدري ومش بيحب يقضي وقته معايا زي الأول.. باتقتل بجد لما باحس إنه مش متحمس لي.. أو مش بيحبني قد ما أنا باحبه.. مش عارفة إيه اللي حصل؟
++++++++++++++++++++++++++++++++++++****

س سؤال
يا ترى تفتكروا إيه ممكن يكون حاصل في العلاقة دي اتسبب في البرود اللي بتشعر بيه صاحبة الكلام اللي فات؟ ويا ترى هي عملت حاجة غلط في الموقف اللي فوق ده؟
الإجابة: أيوه طبعا!.. البنت خنقت الولد
++++++++++++++++++++++++++++++++++++****

خنقتني وسدت نفسي
منين ما كنت بالتفت حواليّ كنت بالاقيها.. بتكلمني في التليفون بشكل مستمر.. ماانكرش إن ده كان بيرضي غروري كتير خصوصا لو رديت عليها قدام حد من صحابي.. كنت باكسل أتصل بيها الصراحة، لأني عارف إنها مش هتصبر وهتكلمني
أسمع إن صحابي بيحسوا إن خطيباتهم واحشينهم، لكن الموضوع قلب معايا بملل! كان نفسي أحس إنها واحشاني.. كان نفسي أعمل لها مفاجأة.. أشوفها صدفة.. أشتاق لها زي بقية الناس بس ده ماكانش بيحصل.. كانت هي دايما بتحدد كل حاجة وتعمل كل حاجة من غير ما تستناني
مش عارف حالة الملل اللي أنا فيها دي بسببها ولاّ بسبب طمعي؟
++++++++++++++++++++++++++++++++++++****
اوعي تبادري بالأفكار أو حتى تقترحي أي مكان تروحوه مع بعض
++++++++++++++++++++++++++++++++++++****
حطيها حلقة في ودنك

في بداية العلاقة اوعي تبادري إنت بالأفكار أو حتى تقترحي أي مكان تروحوه مع بعض، حتى لو كانت نيتك صافية وماعندكيش رغبة في تطوير العلاقة بينكم وحتى لو كان هو نفسه معجب بيكِ
الراجل مش بيحب يحس إنه محاصر بيكِ أو إنك وراه وراه في كل حتة. كل إنسان من حقه مساحة من الحرية والخصوصية اللي ممكن يقضيها في العزلة لوحده أو مع أصحابه زي ما هو عاوز.. والست كمان بالمناسبة
فيه نقطة كمان.. لما بتتصلي كتير كده أو بتحاولي التواجد في حياته أكتر من اللازم، بيحس إنك مستعجلة على الارتباط، والارتباط في حد ذاته مش موضوع سهل.. لأنه حاجة بتستمر العمر كله بإذن الله فبيخاف إنه يتقدم. بيحس إنك حاسة إنك لازم: ترتبطي بيه.. للأبد.. للأبد.. للأبــــد.. وده شيء مخيف زي ما إنت واخدة بالك
++++++++++++++++++++++++++++++++++++****
مش خجول ولا حاجة
هي: تصدقي لقيت نفسي فجأة كده باقوله: تعالَ نشرب حاجة في الكافتيريا؟؟
صاحبتها: بتتكلمي جد؟ يا مجنونة! ليه عملتِ كده؟ دلوقت ممكن يفتكر إنك جريئة زيادة عن اللزوم
هي: أصل إنت عارفة هو خجول قد إيه.. لما شفته بيبتسم لي من بعيد، قلت لنفسي أكيد عاوز يصارحني باللي في قلبه
صاحبتها: حبيتِ تسهلي عليه يعني؟.. مش عارفة.. ماعتقدش إن فيه ولد بيتكسف.. وبعدين ما هو بيتكلم زي اللبلب مع كل البنات والولاد في الشلة
هي: أصلك ماتعرفيش يابنتي لما باشوفه.. مش باقدر أمسك نفسي
++++++++++++++++++++++++++++++++++++****
حطيها حلقة في ودنك وامسكي نفسك

أنا عارفة إنتِ بتفكري في إيه.. بتفكري إنه ممكن يكون عاوز يعزمك في حتة عشان يبوح لك بما في "معاميق" قلبه، والخجل هو اللي مانعه. ممكن كمان تكوني فاكرة إنك لما تعزميه على حاجة ساقعة أو تتكلمي معاه كتير تبقي بتحاولي تكوني لطيفة معاه مش أكتر، والحقيقة غير كده
الحقيقة يا عزيزتي إن معظم الرجالة –وده مش كلامي ده كلام علم النفس- مش بيكونوا خجولين قوي زي ما إنت فاكرة، وإن الراجل لو فعلا فعلا مهتم بيكِ وعاوز يرتبط بيكِ هيستجمع كل الشجاعة اللي عنده وهيفاتحك في الموضوع
++++++++++++++++++++++++++++++++++++****

وعندك واحد برشامة ثقة بالنفس

ساعات كتير باحس إن مش من حقي إني أحلم بيه.. ساعات باحس إنه هو الإنسان الوحيد اللي ممكن يفهمني وعشان كده باحاول أحافظ عليه بأقصى ما عندي. باحس إن اللي باعمله معاه.. سواء اتصالي بيه أو عزومتي ليه.. هي الحاجة الوحيدة اللي ممكن تخليه مهتم بيّ
ممكن يتاخد عليك بعد كده –واعذريني في الكلمة- إنك إنت اللي جريتِ وراه
عارفة إن الانتظار للـ"نص التاني" صعب، خصوصا في الظروف الاقتصادية الجميلة اللي احنا عايشين فيها ومنحنى الأخلاق اللي في نزول مستمر
وعارفة كمان إن صعب قوي إن الواحدة تلاقي حد فيه مواصفات فارس أحلامها لكن بجد موضوع إنك بادرتِ وعزمتيه وكلمتيه كتير في التليفون مش هيتنسي حتى لو ربنا وفقكم واتجوزتم.. والموقف اللي ممكن يتّاخد عليكِ بعد كده –واعذريني في الكلمة- إنك إنت اللي جريتِ وراه وخليتِ نفسك متاحة ليه لدرجة إنه مابذلش أي مجهود في إنه يتكلم معاكي
من حقك إن يكون عندك ثقة كبيرة في نفسك تخليكِ متأكدة إنك تستاهلي إنه يبذل شوية مجهود علشان يوصل لك. وصدقيني موضوع الثقة ده مالهوش علاقة بكونك أجمل بنت في الكلية أو أغنى بنت أو أذكى بنت. ربنا موزع الأرزاق على كل الناس بالتساوي.. ممكن تلاقي إنسان غني مايكونش وسيم، أو إنسانة ذكية لكنها مش جميلة، وهكذا
لازم تقدّري النعم اللي ربنا اداهالك مخصوص دون عن أي حد تاني، وهتحسي فعلا بإنك مختلفة وبإنك تستحقي أي مجهود هو يعمله في سبيل إنه يوصل لك. مش بنتكلم على الغرور لا سمح الله، لكن بنتكلم عن تقديرك لنفسك واحترامك لذاتك اللي هيخليكِ تفكري بدل المرة ألف قبل ما ترفعي سماعة التليفون وتقولي: ألو
++++++++++++++++++++++++++++++++++++****
حطّيها حلقة في ودنك

اتعاملي مع الشاب اللي إنت بتتمنيه لنفسك وكأنه زميل عادي واوعي تديله اهتمام زايد قبل ما تتأكدي من مشاعره ناحيتك.. طبيعة الرجل بتنفر من الدلدقة.. الرجل –والرجل الشرقي على وجه الخصوص- بيحب الخيوط دايما تكون في إيده، ولو حس بإنك عاوزة تعملي حاجة هو شايف إنها دوره، هيبعد عنك بالتدريج لأنك هتبقي سهلة المنال بالنسبة له
في نفس الوقت حافظي على الشعرة الدقيقة بين التقل والتعامل بقلة ذوق! ماتبقيش سهلة أو متاحة أيوه.. غلبيه شوية أو شويتين، لكن ماتهجميش عليه بساطور أول ما تشوفيه وتقولي حاجة من نوعية "لازم أنتقم لنفسي منك يا سافـ... هع!" وتقومي سايبة ليه تذكار منك في شكل عاهة مستديمة
جمدي قلبك.. اتعاملي عادي بس مش بعنف.. ده هيوفر عليكِ إحراج كتير ووجع قلب إنتِ في غنى عنه ويخلي كل حاجة تمشي في سياقها الطبيعي</span>

المصدر: †† ارثوذكس †† - من قسم: الموضوعات الشبابية

[بنت الراعي]

يا نهارك ابيض يا كات بجد زي العسل موضوع فظيع
حلو اوووووووووووووي
ايه يا بت كل ده جامد اووووووووووووي
بجد عجبني جدا
ميرسي كتير يا كات وربنا يعوضك ويباركك

[وردة حزينة]

الصراحه ياكاتى موضوع اكتر اكتر من الرائع واسلوبه فى توصيل النصيحه شيق جدا
ميرسى كتير ليكى

[nermos1982]

الله الله على الجمال .موضوع جااااااااااامد اوى ونصايح اجمد .ميرسى يا قمر ربنا يعوضك

[M@@@NOOOO]

اتعاملي مع الشاب اللي إنت بتتمنيه لنفسك وكأنه زميل عادي واوعي تديله اهتمام زايد قبل ما تتأكدي من مشاعره ناحيتك..
كلام جميل بس لازم تجس نبضه وتشوفه بيميل ناحيتها ولا لآ
امال ازاى هتعرف حقيقه شعوره ناحيتهااا

طبيعة الرجل بتنفر من الدلدقه
كلاااااام جميل ومظبووووط اوووووووووووووى
ونصيحه حلوه جدا لكل البنات
بجد موووووضوع جااااااااامد اووووووووى ياكااات
ويستحق التقييم فعلا
ميرسى ليك كتير وربنا يبارك حياتك
فى انتظار المزيد

[melanora]

الله الله بجد كلام ررررررررروعة اكتر من رائع

[cat girl]

ميرسى اوى يا جماعه على المرور ربنا يبارك حياتكم

[روفــــا]

بصراحة انا يارتنى اخر واحد ارد على الموضوع الجميل دة علشان انا بصراحة موش عارف اقول اية انا لو قلت حاجة موش هيجى جمب موضعك الجميل دة والبنات محتاجة لكلامك دة بجد وانا احلى موضوع عندى ميجيش جمب دة حاجة انا اسف لو كنت ضايقتك واذكرينى فى صلواتك
ربنا يباركك ويحفظك

[cat girl]

المشاركة الأصلية كتبت بواسطة روفــــا بصراحة انا يارتنى اخر واحد ارد على الموضوع الجميل دة علشان انا بصراحة موش عارف اقول اية انا لو قلت حاجة موش هيجى جمب موضعك الجميل دة والبنات محتاجة لكلامك دة بجد وانا احلى موضوع عندى ميجيش جمب دة حاجة انا اسف لو كنت ضايقتك واذكرينى فى صلواتك ربنا يباركك ويحفظك

ميرسى اوى يا روفا ربنا يخليك ويحافظ عليك

[SAMOOOOO]

بصراحه انا قريت الموضوع كله وعجبنى ومش عجبنى

عجبنى التصرف اللى ممكن تتصرفه البنت
ومش عجبنى ان هى تحبه بالشكل ده وهو يكون واثق انها بتحبه هو وبس وبعدين يسيبها

لكن نصيحه كمان منى للبنات
اى ولد يحب البنت انها تكون له وبس وده من حقه طبعا بس بعد ما يكون فى اتفاق بينهم على حاجات فى المستقبل
لكن صعب ولد يلاقى وحده بتحبه وهو واثق من كده ويسيبها
الا اذا لقى انها بتعمل حاجات تضايقه او صعب يتفقوا هما الاتنين
دى الحاله الوحيده اللى ممكن يسيبوا بعض عشانها

البنت لازم يكون علاقتها محدوده جدا جدا بالولاد حتى لو بتعاملهم على انهم اخواتها
دى دايما البنت اللى بتبقى مرغوبه من اغلب الولاد
سورى لكلامى بس ده رايى الشخصى
وميرسى ليكى يا كات جيرل