[كراكيب]

اخي الشاب عمرك جربت تدخل السجن؟؟؟؟!!!.......في السجن 7 فوايد!!

لو كانت اجابتك ب(نعم) فلا تقرا المقال لانك هتقول عليا كدااااااااااب لكن لو كانت اجابتك ب(لا) فاقرا المقال لكن برده هتقول عليا كداب لو كنت متابع حالة الدكتور ايمن نور بص ياسيدي اولا احنا عندنا في مصر_اللهم لاحسد_تلات انواع من السجون الاول وهو الليمان وده بتاع الاشغال الشاقة وعندنا منه اتنين واحد في طرة والتاني في ابي زعبل وتاني نوع هو السجون العمومية والتالت السجون المركزية المهم ان التلت انواع دول بيتضمنوا سبع فوايد
اول فايدة هي الشغل والشغل زي مالقانون بيقول لازم يتناسب مع ميول الشخص ويبقي ليه مقابل (يعني فلوس) وتبقي الفلوس علي قد الشغل وكل ماتشتغل اكتر كل مافرصتك في القبض تكتر يعني في السجن مفيش(1) بطالة تاني فايدة هي التعليم والتهذيب وقانون السجن بيقول _فيما معناه_ان لازم كل مجموعة متوافقة مع بعض (نفس المستوي) تقعد مع بعض في مكان كويس ويدوهم مجموعة مدرسين اكفاء(جمع كفء) وليك الق انك تمتحن بس خد بالك هتمتحن جوة السجن يعني مافيش برشام وطبعا شهادته معتمدة وجايز تلاقي مثلا في الزنزانة بوستر عليه القراءة للجميع القراء للمستقبل يعني في السجن مفيش (2) امية، تالت فايدة هي المكتبة ودي طبعا عشان لو_ لقدر الله يعني_ زهقت من السجن تخش المكتبة وتقرا مثلا رواية اللص والكلاب او جعلوني مجرما او زي ماتحب كل الكتب موجودة (ده قانون السجون اللي بيقول) بس حافظ علي الكتاب ده ثروة داخل السجن يعني في السجن مفيش(3) اوقات فراغ ,رابع فايدة هي الصحف والمجلات يعني هتقدر تعرف مصر اتقدمت كام خطوة للامام ومين اللي مسك بايديها وخلاها تخطي وكمان تعرف في كام مصنع هيتبني وممكن كمان تشوف وظائف خالية عشان لما تخرج انشاء الله تكون اتعودت وماتحاولش تدور علي اخبار من اللي بالي بالك لانك طبعا _لو لفيت جرايد اساسا_ هتبقي جرايد حكومية يعني في السجن مفيش (4) جهل ثقافي، الفايدة الخامسة هي المراسلة وده لو انت مثلا عاوز تعمل ماجيستير عنوانه (سجن بلا قيود) او (سجون مصر بين الخمس نجوم والسبع نجوم) هتلاقي كل المراجع متوفرالك يعني في السجن مفيش(5) خمول عقلي، سادس فايدة هي التهذيب الديني ودي عشان ماتنساش دينك وعشان تشكر ربنا ليل ونهار ع النعمة اللي انت فيها وكمان تعرف انك غلطان والمفروض انك تتعاقب لكن حظك حلو انك مصري بقي يعني في السجن مفيش (6) انحلال اخلاقي وديني، سابع فايدة هي الرعاية الصحية انا عاوز بس فيروس برد يقرب من زنزانتك وانت هتلاقي في اقل من الفيمتو ثانية staff اطباء جايين ومعاهم اساليب المعالجة الخاصة جدا وده طبعا غير ممارسة الرياضة اللي بتدخل ضمن العلاج يعني في السجن مفيش(7) مرض
ودول كانوا السبع فوايد يعني اللي مدخلش السجن يفكر بجدية في الموضوع ده ويقول وداعا للبطالة,الامية,الجهل الثقافي،الانحلال الديني،المرض،وقت الفراغ،الخمول العقلي ومحلاها عيشة المسجون دايما مستقبله مضمون

المصدر: †† ارثوذكس †† - من قسم: الموضوعات الشبابية

[BESHO BAVARIOS]

جميلة وساخرة جدا جدا
ميرسى ليك

[الله يرعانى]

شكرا لتعب محبتك موضوع ممتاز جدا

[melanora]

ميرسي اوي علي الموضوع الجميل دة
وربنا يباركك

[اسامه]

هو انت بتتكلم على السجون اللى فى مصر والا اللى فى المريخ
ههههههههههههههههههههههههه هههههههه موضوعك جميل
بس اوعى تفكر انك تنفذه هههههههههههههههه

[كراكيب]

اكيييييييييييييييييد وردك اجمل ميرسي

[البرنسيسة رانيا]

موضوع جميل بس معتقدش ان فى السجن كل الفوائد دى
خلاص ياجماعة اللى عايز حياته تكون متقدمه يعمل مصيبة ويروح السجن يتعلم ههههههههههههههههههههههههه ههههههههههههههههههههههههه ههه

[كراكيب]

علي فكرة السجب مبيدخلوش برنسيسات ههههههههههه انا بسخر من حالنا شكرا لمتابعتك

[كراكيب]

لكل الاعضاء الجدد واللي لسة صحيفة جناياتهم نضيفة اقروا الموضوع

[zaza2006]

شككككككككككككككككرا ربنا يعوضك