[Dr.PeRO]

قرأت موضوع لأحد مواقع اجتماعات الشباب بهذا الاسم ,, شدنى الاسم كثيرا فقرأت الموضوع وكان تأثيره كبيرا فى داخلى ، مع انه لم يكن يخصنى بصفة شخصية... لكنه نوه عن كلمة -وهى ملخص للموضوع- الا وهى:

"الـهـــفوات"

ما معنى هذه الكلمة؟
- الهفوات هى خطايا ولكنها ليست مزينة للبعض -كمثل بعض الخطايا الاخرى- لا، بل هى أخطر .. لأنها ليست مرئية او ملحوظة ,, وهى أيضا لا تذكر فى جلسات الاعتراف ..
أخطر ما فيها .. انا مثل باكتريا الهواء، انت تعلم بوجودها، تعلم بخطورتها، تعلم انا بداخلك، لا تراها، لكنك تتاجلها ولا تفكر بها,,, بل وتستسلم لها..
- أنها مثل النمل الابيض الذى يتاجهله الكل ولكنه يسامر بالحفر فى مكانه حتى يؤدى الى انهيار المبنى..
- أيضا الهفوات ان رأيتها .. فأنك لن تعتبرها خطايا .. ستكون محل جدال ونقاش وصراع داخل نفسك .. وليس لها دواء مضاد غير لمسة الروح القدس التى تهمس فى قلبك وتجتذبك بعيدا حتى لا تؤذى نفسك وينهار مبناك !!
يقول الكتاب: "الحكيم يتحذر في كل شيء و في ايام الخطايا يحترز من الهفوات" (سيراخ 18 : 27)
فى هذا الموضوع .. سنناقش احدى هذه الهفوات التى تضر صاحبها وتضر من حوله ..

يعنى ايه Stylish؟
معناها الحرفى هو الاناقة او الشياكة .. اما المعنى السائد هو مسايرة الموضه ، او الروشنة.
طب فيه فرق بين الاتنين؟
بدون فلسفة، فيه فرق طبعا .. وواضح للذى فقط يريد ان يراه .. الاناقة هى ان اظهر فقط قدر الجمال الذى أعطانى الله أياه ..هى ان أكون على طبيعتى ,, هى ان مرتبا ونظيفا .. ليس بالملابس الفاضحة او الغالية انما بالنظيفة واللائقة..
الموضه: هى وحى نزل على دماغ بنى آدم أو أكتر فى كذا دولة فى العالم ، وصحيوا الصبح رسموا هذا الوحى وتم ترجمته لملابس .. أغلبها غير لاثق، وكل يوم منها الجديد والجديد .. ولن تنتهى ولن تثبت على حال!!
ولكن أحبائى لغياب الحكمة التى هى مصدرها الاول والوحيد هو الروح القدس، نخلط دائما بين الاثنين.. ونردد دائما "خليك كوول" .. ومتأفلهاش بقى ياعم .. و"م كله بيعمل كده، جت عليا؟"
اذا ما الضرر فى كونى أجارى الموضة ؟؟ ايه المشكلة يعنى؟؟
- دعنا اولا نلقى نظرة على ملابس الموضة (فى هذه الفترة):
للبنات والنساء : البطلونات الضيقة (جينـز أو قماش) - الجيبات القصيرة - البادى - ولامؤخاذة الكاش مايوه !!
للاولاد والرجال: الجينـز برضه بس الحمد لله واسع شوية ولكن فيه برضه ضيق - البنطلونات الlow waist - اما باقى خطوط الموضة فليس بها ضرر يذكر
* لكن تتصرف ببعض من الحكمة، يجب ان تحسب مميزات وعيوب الشئ قبل ان تقتنيه.. وهذه هى عيوب او عواقب الموضه:
- الحقيقة .. ان نظرة الولد للبنت تختلف كلية عن نظرتها له .. بمعنى ان ملابسها ساتثيره أما ملابسه فمن الممكن ان تجذبها ..
- نعم لكل قاعدة شواذ .. لكن ما يحدث ان كثرة الاثارة جعلت الغريزة التى بداخل الولد دائما جاهزة للاشتعال .. وكثرة الكبت قد تولد الانفجار .. فقد وصلت نسبة التحرش سواء بالكلام او باللمس لنسب عالية .. وايضا الزواج العرفى عند غير المسيحيين هو من احدى العواقب!!
- فقدان النقاوة: ومصدر النقاوة هو نقاء القلب والفكر ,, لكن ماتدخله العين من مشاهد ولقطات يومية لما تراه .. جعل الفكر يحللها والقلب يشتهيها..
- العثرة: فى نظرى هناك ضرران او نوعان من العثرة .. عثرة المهزوم: بمعنى العثرة التى تعثر الانسان الواقع او المنغمز فى الخطية .. اما النوع الثانى، فهو عثرة المجاهد: وهذه العثرة ستكون عاقبتها صعبة للغاية .. لماذا .. لأنها تكسر كل القش الذى يحاول المؤمن ان يتمسك به لكى يتغلب على شهواته ,, فهذا النوع يزيد على الانسان متاعب ذهنية رهيبة وهنا يتخلل شيطان اليأس لكن يجهز عليه !!
ولست محتاج ان اذكركم بالآية: "ولكن ويل للذي تاتي بواسطته. خير له لو طوق عنقه بحجر رحى و طرح في البحر من ان يعثر احد هؤلاء الصغار".
انه لصوت مخيف يحذرنا من ان نعثر بعضنا .. واريدكم ان تتخيلوا كيف يحذر السيد المسيح .. انه يقول ويل .. ليتنا ننته قبل فوات الآوان!!
- العادة السرية: تبدأ بنظرة عفوية، ثم نظرة عمدية .. ثم نظرة تمعنية .. ثم شحن داخلي ..فيريد الشاب بأن يخرج تلك الطاقة المكبوتة بداخله والتى تشعره باهتزاز داخلى عميق .. فلا يجد طريق امامه سوى العادة السرية..
ولماذا سميت "عادة" .. لأنها لا تنقطع الا بجها مستمر .. نعم اعترف ان ليست فقط ملابس الموضة هى السبب .. لكن عامل مؤثر ومنشط ومحبط للتوبة
أنه ليس موضوعنا هنا هو مناقشة قضية العادة السرية .. ولكنها لها الكثير من العواقب الصحية والنفسية والتى حتما ستظهر عند الزواج، وستكون ايضا الزوجة خاسرة مثله تماما !! فالضرر سيصيبهما وليس هو وحده.
- الزنا: حدث ملل من ممارسة العادة .. وهنا يشعر الشاب باشتياقه للتطبيق العملى لهذا الكبت .. ولن يجد فى هذا صعوبة، لأن ببساطة قال الكتاب "الطريق واسع" ...
والزنا أيضا لن يكون لتجربة وقتية فقط .. وانما كلما ابتعد عنها الشاب حاربته الشهوة القديمة ويظل يرى شريط أخطائه امام عينه ,, وبداخله صراع بين الابتعاد والعودة للخطية ... وان جاهد واستمر فى ابتعاده .. يأتى الشيطان له ببعض المناظر التى تتبع الموضة ,, ربما ليس فى الشارع ولا فى الجامعة ,, ولكن فى الكنيسة !! فى اجتماع الشباب الذى حاول الشاب المسكين أن يلجأ له طالبا معونة الله له، ولكنه يرى ما لم يكن بحسبانه .. ربما هذا يؤدى وقوعه فى الخطية ثانيا .. أو فرح أو خطوبة بالكنيسة والتى أشعر بأنها اصبحت سهرة ديسكو .. وبقى اللى مايشترى يتفرج علينا واحنا داخلين الكنيسة اللى هى اصلا بيت ربنا بفساتين سواريه او بملابس الموضه .. ليروا اعمالكم الصاحلة فيمجدوا أباكم الذى فى السموات ..
- الزنا الفردى:
فالايه صريحة: و اما انتم فجسد المسيح و اعضاؤه افرادا (1 كو : 12 : 27)
إذن انتى جسد المسيح .. ان كل من ينظر الى امراة ليشتهيها فقد زنى بها في قلبه (مت 5: 28)
أذن كل شاب -(من آلاف) الشباب اللى بيشوفوكى كل يوم - يشتهى جسدك فقد زنى بك فى قلبه ..
والآيه أيضا تقول:
الستم تعلمون ان اجسادكم هي اعضاء المسيح افاخذ اعضاء المسيح و اجعلها اعضاء زانية حاشا (1 كو 6 : 15)
- يبقى ايضا شيئا أخيرا ,, قد يعتبر البعض من البنات ان الجينز الضيق لا يسبب عثرة .. وانه من الموضة السلمية !! لكنه بالعكس ,, لأن ببساطة يلفت النظر بسهولة لجسدك ويجعل من ينظر اليك يرالكى كمثل عاريه ... فما الفرق ..
فأن اولاد الله عندما يقررون الزواج فلن يجذبهم من الفتاة جمال جسدها الذى هى تريد اظهاره .. وانما جمال عفتها وطهارتها وشخصيتها واحترامها لربها خوفها على جسده الذى اعطاها اياه وسيحاسبها عليه قريبا
_______________________

أحبائى .. ربما لا نرى الهفوات .. ربما لا نؤمن بها .. لكنها ترانا.. وتتربص بنا وتنتتظر اللحظة اللى يغفل فيها العقل ويبتعد فيها الروح القدس منه ، لكى تقتحم قلبنا وتفتك بالثمار الجيدة التى به .. وتجعلنا نضر دون أن ندرى .. وبكثرة وبدون حساب ..ونحسب أنفسنا مع الصادقين والقديسين وانما نحن مشطوب أسمنا من سفر الحياة !!
أنظروا الى القديسات الاتى كن يلقوهن فى أيام الاستشهاد فى النار .. وكان همهم الاول هو الا تتعرى أجسادهن لئلا يعثرن أحد .. أين نحن من هؤلاء ؟؟!!
نحن الان فى زمن الرخاء .. حيث نتسابق فى الافراح والمناسبات بلقب الاكثر جمالا و الاكثر إثارة .. ويكون -عينى عينك كده- فى محضر الله وفى الكنيسة .. كأننا نقول للرب .. "أحنا جامدين أوى مايهمناش حاجة !!"

المصدر: †† ارثوذكس †† - من قسم: كلام فى الممنوع

[elphilasouf]

موضوع حلو وجميل منظم ومقنع....
اتكلمنا كتير عن موضوع اللبس والموضه وازاي ممكن نكون شيك ولينا جاذبيه بس نكون لبسين لبس يحمى جسمنا

بخصوص لبس الولاد فى لبس فعلا لايليق ابدا بولاد ربنا
زي مثلا البنطلون الساقط خالص ده تحس ان وقع اصلا خلاص

وفى كمان ناس تغظنى اوي تقولك عادي مش مهم اللبس المهم القلب
انت هتبص ليه للمظهر وتسيب الجوهر

وان كان اللبس مش بيظهر الداخل وده مجرد مظهر
فالخارج جزء من الداخل
المظهر جزء من الجوهر
ويستحيل ان تكون فتاه او شاب فى قلبها حب لربنا ويلبس او تلبس لبس يغضب ربنا

اخر حاجه بقى عاوز اقولها انى بامانه يوم مافكر ارتبط
عمري ماهبص لوحده لبسها لايليق بانها تكون بنت المسيح..
وربنا يرحمنا...................................... ................

[Dr.PeRO]

شكراا أخي لردك .. واكيد طبعا الكل أتكلم فى الموضوع ده ...
بس أعتقد ان فيه نقط هنا متذكرتش فى موضوع اخر .. أو جايز انا غلطان .. المهم ان انا قرأت كثيرا عن مثل هذه المواضيع .. لكن هذا الموضوع بالتحديد كان الاكثر شمولا والاكثر تأثيرا ...
بس للأسف سيبقى الوضع على ما هو عليه .. والكل هايعمل عبيط .. ومحدش هايغير من نفسه .. والدليل ان الظاهرة ديه فى ازدياد مستمر .. والمصيبة أن أولياء الأمور بيشجعوا على كده (خاصة الام) .. عشان بناتها تتجوز ...

[elphilasouf]

لا يأس مع المصلوب
وبالايمان والصلاه ووداعه القلب نصل الى اكثر القلوب المتحجره

[the daughter of the king]

فعلا موضوع مميز
وحتى لو مكرر فمتياس
اكيد فى ناس هتقراها ومسيرها هتتغير
بس الفكره فعلا
من كتير مالحاجات دى موجوده وعمال تكتر اوىىىىىىىى
فبقى اللى يعتبر محترم يعنى فى عصر الموضه برده مش كده يعنى
وفعلا من كترها الواحد مبقاش عارف فى ايه
المشكله فيه ولا هو كمان غلط
مبقاش عارف فبجد لازم يكون فى رعايه اكتر وكلام اكتر من الخدام والمرشدين والاب والام وكله
فعلا فى ناس متبقاش عارفه اللى بتعمله ده صح ولا غلط
واللى عارف بيحاول يعمل نفسه مش عارف ويدريها ورا كلمه الموضه وده بقى مشكلته اكبر
بس عموما ربنا موجود ويحافظ على ولاده وبناته
اذكرونى فى صلاتكم

[Dr.PeRO]

شكرااا لرد حضرتك ..
وللأسف ان فيه بنات وأولياء أمور كتير شايفين ان الكلام ده مش غلط والحكاية عادى وpeace جدا ,,, واللى بيقول الكلام ده دلوقتى يبقى معقد نفسيا ومحروم و متخلف!!!
حتى القسس دلوقتى يقولك خليك فى حالك ,, شئ مايخصكش ..
وبقت هيصة!

[the daughter of the king]

المشاركة الأصلية كتبت بواسطة dr.pero حتى القسس دلوقتى يقولك خليك فى حالك ,, شئ مايخصكش .. وبقت هيصة!

بص بالنسبه لموضوع خليك فى حالك ده فانا معاهم جدا
انا مؤمنه جدا بمبدا سمعته مره قاله البابا شنوده بجد
ربنا قال ان عثرتك عينك فاقلعها
(عينك )
يعنى تخليك فى حاللك وتحاول تبص على نفسك وتكون كويس
انا طبعا مش بقول الكلام ده لحضرتك
انا بقول للناس اللى بتعتبر نفسها مع اى حد فى الشارع بتشوفه وتقعد تكلم عليه
وهى مالها ؟؟؟؟؟؟؟؟؟؟؟
فاهمنى؟؟؟؟؟؟؟؟؟
لكن الفكره نفسها وطريقه اللبس فانا طبعا معترضه عليها مفيهاش نقاش
بس برده مش يجى اى حد كده فى الشارع يقعد يبصى او يكلم وهو اساسسا ملوش دعوه باى حق يكلم

يعنى حضرتك مثلا بتتلكم هنا لانك بتعتبرنا اخواتك صح
لكن فى ناس كتير بتكلم لمجرد انها تعلق تجيب الغلط على الناس اللى بتلبس واللى بتقول واللى بتعمل

بس

كفايه بقى طولت عليط سورىىىىىىىى

وميرسى على الموضوع المهم جدا

[Dr.PeRO]

بص بالنسبه لموضوع خليك فى حالك ده فانا معاهم جدا

كلام حضرتك صح .. بس فهمتينى غلط
كلمة "خليك فى حالك" تبقى صح لو رحت كلمت البنت أو انتقدتها أو حتى اتكلمت عليها من قدامها او من وراها .. لكن مع الاب الكاهن بالذات فى الاعتراف مثلا .. يبقى عادى انى اتكلم معاه واقوله بوجهة نظرى ,, جايز انا غلطان وهو يصلحلى..
وانا برضه معاه انه يقولى وبدون اى نقاش "خليك فى حالك" عشان يبعدنى عن الادانة .. بس مش معاه فإنه يتناسى الموضوع وميحولش يغير من تصرفات الشابات والشباب ويعظ بلهجة شديدة وتبقى فيه ندوات و أشياء تشجيعية .. لكن أقصى ما يحدث هو فقط التنبيه فى اقل من دقيقة فى بعض العظات وخلاص على كده ,,,
يبقى كده احنا بنتصرف بسلبية
و احب اقول لحضرتك برضه موضوع زى ده محدش بيرضى يتمعن فيه لسببين رئيسيين من جهة نظرى المتواضعة:
1- اللى هايتكلم فى موضوع زى ده ويذكره اكثر من مرة (حتى لو ابونا) ستتغير مشاعر او طريقة نظرة بعض الشباب والشابات له وممكن يؤدى لنفور البعض من الكنيسة .. ولو خادم اللى اتكلم تبقى مصيبة اكتر لأن فيه خادمات برضه عالموضه ... وهايحصله نفس اللى هايحصل مع ابونا .. طبعا الحكاية ديه نسبية

2- عشان يبقى الموضوع ده اكثر اقناعا ... لازم تذكر فيه النقاط اللى الكل بيتكسف يقولها خاصة لو فى عظة عامة ... ويعنى الموضوع اللى انا كاتبه ده مثلا ماينفعش يتقال كله فى عظه او ندوة ... وبالتالى تقل قوة تأثيره على سامعيه

سورى للاطالة وحضرتك منورة الموضوع

[the daughter of the king]

احب اقلك ان حضرتك جاوبت على نفسك اهو
انه لو الاب الكاهن اتكلم فيه كتير ممكن تحصل عواقف مش المفروض انها تحصل
وبعدين حط نفسك مكانهم مثلا فى انه حد بيقلك ايه اللى انت لابسه ده
او ايه اللى بتقوله ده
على طول اول حاجه هتطلع
..........................

فاكيد الاب ده خايف على مشاعرهم برده وكمان لاحظ انه الايام دى محدش بيقتنع بكلام حد
لازم كل واحد يجرب بنفسه الا لو وقع فى تجربه قاسيه ساعتها هيقعد يدور ايه الغلط
فليه بقى يزعل او تزعل حد منك

بجد صدقنى اصلى المواضيع ده بقت من الاشياء الطبيعيه جدا فى البلد دى
واللى معترض يبقى على طول زى مبتقول كده

انا بصراحه من رائى يعنى انه محدش هيحل المشكله دى غير الشخص نفسه ومن داخله مهما اى كلام اتقال
لانه بجد مفيش حد مش عارف هو صح ولا غلط
بس في ناس بتوجد مبررات بس فى النهايه بتبقى برده عارفه

[Dr.PeRO]

وكمان لاحظ انه الايام دى محدش بيقتنع بكلام حد

ده فعلا صح ...
بس فيه أمثله واضحة جداا: أبونا مكارى يونان .. والبابا كيرلس سابقا... طبعا انا بقول أباء مشهورين عشان حضرتك تبقى عارفاهم ... دول لما يكونوا فى الكنيسة محدش يجرأ انه يفكر يدخل يتناول بنص كم !!!!!!!!!!
والكلام ده متأكد منه 100%
ومع ذلك الناس بتبقى ماليه الكنيسة وكل الناس بتحبهم ...
انا مش بقول ان الكهنة يعملوا زيهم بس على الاقل يناقشوهم لمرة واحدة فقط فى مثلا جلسة اعتراف ويبقى فيه موضوع فى ندوة او عظة بس مثلاالكاهن اللى هايوعظ يبقى من بره الكنيسة (ضيف يعنى) .. زى ما بيحصل فى نهضة العدرا مثلا ... وفى حل تانى النبذات الصغيرة اللى ممكن يتكتب فيها اى حاجة بدون كسوف .. وتتوزع على الكل ... وحاجة تانى مهمة، أمينة خدمة البنات لازم تنبه على الخادمات كويس وتخليهم يرشدوا بناتهم من الصغر عشان لما يكبروا يبقى عندهم مبدأ ثابت عن فهم واقتناع ..

وعلى فكرة انا مش مكبر الوضوع عن حجمه ... انا كل اللى ذكرته + الاجزاء اللى نقلتها من موضوع الهفوات بتحصل فى الواقع وكثرة شديدة وكل ده انا شوفته بعينى وعلى مراحل متباعده ... وكنت ببقى زعلان جدااا ان ناس كتيرة بتتأذى روحيا و جسديا ...
بس لأن الهفوات لا ترى .. فمحدش هايدور لها على حلول .. على النقيد مثلا مع خطية الكبرياء او الزنى او السب (الشتيمة) او او او ..