[ramzybeshara]

إيه يُجبُركُم تِشتَغَلوا فـ مَدرَسة المُعاقين!

وِتدادوا وتحايلوا فـ أطفال مش طبيعيين!

مَعقول فيه كِدَه! كُل الحُب ده جايبينُه منين!

هُوَّ إنتُوا بَشَر وللا ملايكَه من السَّما جايين؟!

مَعقول عَلَشان أَكل العيش مُر, وآهو تاكلوه حَتَّي لو مَلتوت؟

وللا مَلِّيتُم أَكل العيش ودي رِحلِة بَحث عن البَسكوت؟

لكِن إللي يفَكَّر بالرّاحَه. هَيقول : بصَراحَه ده مش مَظبوط

دي مش سَبُّوبَه,دي خِدمه عَظيمَه يا بَني آمين

ده إنتُم مِن كُتر مَحَبِّتكُم للأطفال أصحاب لِحتياجات

لو كُنتوا بِتِتكلِّموا عَنهُم.. بِتقولوا كلام كُلُّه مُجاملات

"طِفلي" و"أولادنا" و"أطفالنا",وياريت كان بَس عَلَي الكَلِمات

بِتحِبُّوهُم كَمَّا حُب وِلادكُوا الحَقيقيين

تِعرَفوا إن إللي بيسقيهُم كاس مَيَّه."كاس" مِش حَتَّي كاسات

الله بيعَوَّضُه ويكافأُه,وبياخُد أَجرُه في السَّموات

وإنتُم مِش بَس بِتِسقوهُم.عَلِّمتُوهُم في رِعاية الذَّات

ياكلوا ويشرَبوا ويحِبُّوا ويشاركوا الآخَرين

وطوباكوا يا رُحَما, هَتِلقوا الرَّحمه. وبَرَكَه أغلَي مِن المَلايين

وإحنا هَنحاوِل نِساعِدكُم.مش بَس هَنِدِّيكُم نياشين

كَمِّلوا خِدمِتكُم لِلمُعاقين.لِيه كِده؟ إزَّاي أنا آقول مُعاقين؟!

مَعَلشي سَماح. يعني إحنا ياناس كُلِّنا كاملين!

كلمات رمزي بشاره... "sat7"

دورِة التدريب بالفير هيفين بالإسكندريَّه

من 29/10/2007

إلي 1/11/1007

المصدر: †† ارثوذكس †† - من قسم: القسم الادبي

[nana222]

شكرا رمزى على الكلام الجميل ده

[bolalover]

شكراااا جدا يا استاذ رمزي علي الكلام فوق الرائع ده
ربنا يبارك حياتك يا غالي

[Team Work®]

اشكرك جدا على كلمات الترنيمة الحلوة دى

[nrmo]

ميرسى جدا على الموضوع والكلام الجميل ده

[kmmmoo]

ميرسى على تعبك

[bisho03]

الله عليك بجد
جميله جدا
وفعلا احنا كلنا مش كاملين

[عماد حسنى]

جميله جدا جدا يا استاذ رمزى
بجد جميله
ربنا يباركك ويكون معاك

[remon_samir8]

أشكرك جداً أيها الشاعر الجميل علي موضوعك الجميل وكلماتك الجميله جداً
تلميذك ريمون سمير

[miroo]

ميرسى على الكلمات الرقيقة دى
ياريت كلنا نفكر فى اخواتنا واولادنا زوالاحتياجات الخاصة
اكيد هما مش محتاجين منك منك غير ابتسامة تشعرهم انهم اولاد الله ومخلوقين عى صورته ومثاله زيك تمام