[اشرف وليم]

انت نومك تقيل ليه كدة يا ريت تصحى و بلاش كسل عايزك فى كام كلمة كدة على انفراد..

ايه المفيد فى حياتك عايش عشانه

ايه اللي انت بتفكر فيه كل يوم اول اما تصحى

ايه اللي انت بتحلم بيه

اسمحلى اجاوب :

اول ما بنصحى من النوم اول حاجة بنفكر فيها حنعمل ايه انهاردة ...حنخرج حنروح فين ... حناكل ايه ... حنشترى ايه ...

و كل اللي احنا بنحلم بيه مختلف فى جميع مراحل عمرنا مثلا :

و احنا صغار بنحلم اننا نكبر .

و احنا شباب بنحلم اننا نبقى معانا فلوس كتير و نجوز و نخلف و نقضيها فسح
و تبقى حياتنا ممتعة نبعد فيها عن التعب و المشقة و نكون مرتاحين البال
فيها .

و احنا كبار فى السن نحلم اننا نجوز العيال و نسترهم و
نحللهم مشاكلهكم و بعد كدة نشوف عيالهم و بعدين نرتاح شوية بقى عشان احنا
كبرنا فى السن و مش قادرين نعمل اى حاجة .

اسمحلى اقولك ان اللى وصل للمرحة دى بيحس ان هو كان نايم طول السنين اللى فاتت و كان كسلان

عارف ليه....

عشان هو مهما عمل اشياء مفيدة ليه او لغيره و حقق كل اللى اتمناه طول عمره يمكن احسن من اللي كان بيحلم بيه اكتشف

انه فى حاجة نقصاه و حاجة مهمة اوى لما يقعد و هو فى السن ده يفكر مع نفسه شويه حيلاقى ان هو نساه اهم حاجة وهى

راحته الابدية .. طبعا الدنيا تلاهى او تقدر تقول ان الشيطان تلاهى لان
الدنيا مغلطتش معانا فى حاجة اخدته من احضان ربنا شوية بشوية تدريجيا تقدر
تقول انه نساه تماما بدا يستوعب ان هو كان طول حياته كسلان و كان فى سبات
عميق مع العالم و شهواته اما كان بيفكر فى نفسه او بيته و عيالو طبعا ممكن
يجى واحد و يقول انا ماكنتش بفكر فى نفسى انا عندى مسؤلية و بيت و عيال و
كل دة كان شاغل كل تفكيرى حقولك مكنتش قادر تدى ربنا جزء صغير اوى من وقتك
دة انت ممكن مشكلة صغيرة تفكر فيها شهور و تصحى طول الليل عشان تفكر فى حل
عندك اليوم فيه 24 ساعة لو اخدنا ساعة واحدة لربنا ايه اللي حيحصل حتصحى
تقول ربنا اخد منى ساعة كان المفروض انامها كويس....الاسبوع فيه سبع ايام
ادى منه يوم روح اتناول الصبح و ارجع لبيتك و عيالك وروح اعترف بليل..

بعد العمر اللي ضاع منه دة حيحس انه كان غلطان طول السنين اللي فاتت عشان
ساب ايد ربنا حيفتكر كل موقف كان المسيح بينبه ان هو بعد عنه و يترجاه ان
هو يرجع لحضنه تانى عشان يحافظ عليه و هو عمل نفسه مش واخد بالو و مغمض
عينو و ادالو ظهره

حيحس اد ايه ربنا ساعده طول حياتو و نفذلو كل
اللي كان بيحلم بيه بعناية و تدبير و احسن من الخطة اللى كانت فى دماغو
ويندم ان هو حتى مهنش عليه انو يقوله كلمة شكر..

طبعا العمر
خلص اصبح اعد على الكرسى مش قادر يتحرك مش قادر حتى يروح الكنيسة يستسمح
ربنا على العمر اللي ضاع قصاد عينو من غير فايدة حيشوف الشيطان و هو بيضحك
و مبسوط عشان قدر يلعب لعبة الموت معاه و يكسب كل الجولات فى جميع المراحل
العمرية اللي فاتت ,

اكيد حيكون احساس قاسى اوى انت بقى تحب تحس
بيه متقلش انا قدامى وقت اعمل اللي اعمله و اركز فى دلوقتى وبعد كدة ابقى
مع ربنا براحتى و على طول لان كلمة دلوقتى دى حتبقى معاك كل يوم و حتلازمك
لحد ما تموت وخد بالك ان الشيطان تملى يلعب على وتر تاجيل التوبه من يوم
ليوم و من سنة لسنة لحد ما تعد علي نفس الكرسى اللي اعد عليه الراجل دة..

ليه احنا تملى نفوق متاخر و نبقى كسلانين طول ايام حياتنا ليه منبقاش مع
ربنا بدرى بدرى مع اننا واثقين ان احنا لما بناديه و نستنجد بيه بيجرى
علينا يلحقنا لكن للاسف بنقوله خلاص خلاص شكرا و بننساه ,

ليه بنعمل فيه كدة مش هو اللي قالنا " اطلبوا تجدوا اقرعوا يفتح لكم ".

و سبنا نجربه عشان نصدقه مع انه محدش يقدر يجرب ربنا لكن هو سمحلنا بكدة عشان بيحبنا

مش ممكن كل الحب دة و نقوله مش عايزيين نعرفك لا احنا لازم يبقى لينا وقفة و نقوله :

يارب احنا جايين نقدملك توبة بجد احنا فاتحين قلوبنا الغليظة ليك عشان
تدخل فيها و تغيرها عشان تفهمنا حقوقك و تعلمنا حكمتك و تقبلنا و تنور
عقولنا و تحمينا من افكارنا الشريرة يا رب , يا رب اتحنن علينا و حرر
قيودنا اللى ايدنا بيها الشيطان طوال حياتنا لاننا ضعاف جدا و لكن اذا كنت
معنا فمن علينا يا الهى جئنا حاملين شرورنا القبيحة و خطيانا لكى نستبدلها
منك برحمتك التى لا تفرغ و معونتك العظيمة , جئنا اليك طالبين مغفرة
ساعدنا يا رب و علمنا ازاى نحبك . امين

المصدر: †† ارثوذكس †† - من قسم: المنتدى العام

[ريم الخوري]

يارب احنا جايين نقدملك توبة بجد احنا فاتحين قلوبنا الغليظة ليك عشان
تدخل فيها و تغيرها عشان تفهمنا حقوقك و تعلمنا حكمتك و تقبلنا و تنور
عقولنا و تحمينا من افكارنا الشريرة يا رب , يا رب اتحنن علينا و حرر
قيودنا اللى ايدنا بيها الشيطان طوال حياتنا لاننا ضعاف جدا و لكن اذا كنت
معنا فمن علينا يا الهى جئنا حاملين شرورنا القبيحة و خطيانا لكى نستبدلها
منك برحمتك التى لا تفرغ و معونتك العظيمة , جئنا اليك طالبين مغفرة
ساعدنا يا رب و علمنا ازاى نحبك . امين

موضوع جدا جميل وروعة الرب يقويك بخدمتك ويزيدك نعمة وبركة

[اشرف وليم]

شكرا لتعب محبتك
ومرورك الغالي
شرفت الموضوع
الرب يبارك حياتك
ريم الخوري