سيدى الرئيس

[مدحت نص]

فى عيد ميلادك ..!!

قصيدة تحفة لـ أحمد فؤاد نجم ( مكدر الأمن العام )

سيدي الرئيس

في عيد ميلادك الكام وسبعين

كل سنة وأنت طيب

واحنا مش طيبين

كل سنة وأنت حاكم

واحنا محكومين

واحنا مظلومين

واحنا متهانين

ويا ترى يا حبيب الملايين

فاكرنا ولا احنا خلاص منسيين

فاكر المعتقلين

فاكر الجعانين

فاكر المشردين

فاكر اللي ماتو محروقين

فاكر الغرقانين

الله يكون في عونك - هاتفتكر مين وللا مين

في عيد ميلادك الكام وسبعين

بقول لك كلمتين

الأوله

شيلتنا طين

وهل تعلم أن النيل بقى رشاح

والجو أصبح بيئة والعيشة ولعة

والشرفا قلوبهم عالبلد والعة

وانت عاملهم مذبحة ولا بتاعة القلعة

والاقتصاد سداح

والسرقة بقت كفاح

ومصر متاحة بس للسياح

وعرض البلد بقى مستباح

والتانية

ورتنا الويل

دا الخطوة في عهدك بقت ميل

والضحك بقى نواح وعويل

والكوسة

عارف الكوسة

ممكن أقولك فيها موواويل

والجامعة بقت يا إما كباريه أو دار مسنين

والشباب معظمهم من غير خمرة سكرانين

والعلم عز على المتعلمين

والأساتذة بقم دجالين

والقادة بقم طبالين

واديني في الهايف يا حبيب الملايين

والتالتة

عارف اليابانيين

زمان في سنة اتنين وخمسين

كان عندنا تروماي وكان عندنا علم ومتعلمين

وثقافة ومثقفين

وأدبا وعلما وفنانين

وكانو اليابانيين

بالنووي لسة مضروبين

وللصدقة مستحقين

دلوقتي إحنا فين وهما فين

هما فوق واحنا في أسفل سافلين

والرابعة

أمن البلد بقى تنين

والمحاكم اتملت مظالم

والعدالة بقت كمالة

وكلمة الحق في الزبالة

وأصحابها في الزنازين

والخامسة

القطاع العام…. عام

والفساد…. ساد

وفي جتة بلدنا بيرعى

أفتكر لجنابك إيه وللا إيه

وكل ذكرى ليك بدمعة

آآآآآآآآه آآآآآآآآه

أنا كنت حالف ميت يمين

أكملهم لك تمنية وسبعين

بس هاكفيهم ورق منين

وكل سنة وأنت

واحنا طيبين...


أقابلكم فى طره بقى هههههههه
مستنى ردودكم
مدحت نص

[عماد حسنى]

مدحت طره مش بعيده
خالص
وبعدين انت عجبتك القصيده
لكن احمد فؤاد نجم اللى كتبها
متخافش وخليها على الله
ربنا معاك
ومعانا

[مدحت نص]

شكرا ليك يا عماد لمرورك وبعد كده يا سيدى طره سجن وبره طره سجن واحب اعرفك النظام الجديد اللى بينقل هو اللى بيبقى متهم الايام دى هههههههه
شكرا ليك يا جميل
مبسوط انها عجبتك
مدحت نص

[man new]

اتكل على الله وانا هاجيلك ومعايا عيش وحلاوه

[elphilasouf]

يبنى بلاش الكلام ده هتودي المنتدي فى دهيه
حرام عليك
هيما مش وش بهدله

[مدحت نص]

هههههههههه شكرا ليك يا فليسوف وطبعا انا ما يرضنيش ان المنتدى يروح فى داهيه بسببى بس أوعدك ان لو حصل انا هاكون اولكم وفى انتظاركم فى مارينا حبيبة المعتقلين وان شاء الله الاقى قصايد أخف من كده ههههههههه
مدحت نص

[مدحت نص]

شكرا ليك يا man new وأحب اضيفلك معلومة ان انا مش بحب الحلاوة ودى هاتبقى المشكله لو دخلت هههههههه

[kamel]

كل سنة وانت طيب يا سيدى
طيور الظلام تحركت
بنت أعشاشها ونمت
نامت على بيضها حتى أفقست
ونما ريشها وأجنحتها تطايرت
وجاءت الى الزيتون واّوت
فى ضوء النهار ظهرت
واحصدت
------------------
أشكرك يا غالى على النقل الموفق
الرب معك