بيقولوا هتحتاج عكاز؟

[marem ayad]

18/06/2008

يوسف غبريال
(مهداة لقداسة البابا شنودة الثالث
بيقولوا هتحتاج عكاز
معقولة يا ولاد؟؟
م إحنا عكازك..
يا للي لفيت البلاد
ولادك..
من سنين
مسنودين..
على عكازك

************
عكازك
ربنا موجود
القلب مصلوب
لكن البدن مفرود
سندك
صدق الوعود
دفء القلوب
وصبر القبطى
اللى ماله حدود

************
سأل الطبيب
فين الوجع؟
قال في بلادي
والكسر فين؟
في ولادي
والحق على مين؟
مفروض على البادي..
والظلم؟
بطول الـــــوادي!

************
بيقولوا سافرت..
أمال ليه حاسيين
إنك وسطنا
بجد انكسرت؟
الكسر ده في جدار قلبنا..
وحملنا
يا حلمنا
مين يشيله معانا
وعننا..
امتى ترجع لنا..
محتاجين حضنك
يا بابانا
يضمنا..

************
سأل طبيبه
إيه الفرق بين وجع البدن
ووجع الروح؟؟
الأول يومين ويروح
والتاني؟
في القلب سكن..
اجتهد الطبيب
يمكن علاجه يصيب..
وإيه علاج
اللي دائه
الوطن..

************
لا يوم اشتكيت..
ولا انحنيت..
يمكن بكيت..
لكن لا بعت..
ولا اشتريت..
غيرك باع
وتراب الوطن ضاع
وانت واقف زي أسد الكاروز
إرجع يا عيد النيروز
يموت الوالي
ودم الشهدا
يفوز..

************
بيقولوا هتحتاج عكاز
معقولة يا ولاد؟؟
م إحنا عكازك..
يا للي لفيت البلاد
ولادك..
من سنين
مسنودين..
على عكازك..
د: ياسر يوسف غبريال

[@ حبيب مار جرجس @]

سلام الرب يسوع المسيح له المجد يكون مع الكل .
كلام فوق الراااااااااااااااااااااا اااائع جميل جدا جدا جدا
ومؤثررررررر كتيييييييييييير ربنا يباركم

[elphilasouf]

اشكرك حقيقى ع الموضوع ربنا يباركك

[Malak sokar]

بجد مش عارفة اوصف الجمال دة ولا الحلاوة
ميرسي اوي لك يامريم انك نقلت الحاجت الحلوة دي لينا