حد يقولي اعمل ايه بليييييييييز

[بنت الراعي]

سلام المسيح يااجمل اخوات
انا الحقيقه في موقف محرج جدااااااااااااااا
معايا ابن اخويا عنده 5 سنين لسه في حضانه لكنه سالني سؤال محرج كتير
هو قالي يا عمتو اكبر بابا ولا بابا يسوع فاانا طبعا قولت له بابا يسوع يا حبيبي لانه بابانا كلنا
قالي بابا يسوع قوي جداااااااا قولته طبعا هو قوي وحنين وبيحبا وبيخاف علينا وبيحمينا
و........... و...........
عملت ناصحه وانتهزتها فرصه اني احببه في بابا يسوع اكتر
فرد عليا برد حقيقي معرفتش اقوله ايه
قالي اما هو قوي اوي كده وكبير ليه الناس الاشرار صلبوه وعذبوه وكمان موتوه
طبعا مش معقول هااقوله ده بسماح منه لانه مش هايفهم
فاضطريت زوغت منه وماردتش عليه
ولانه طبعا اسئلته اللي من النوعيه دي كتيره جدا فمحتاجاكم تساعدوني بلييييييييييز حد يقولي
ارد عليه باايه وكمان لو سال تاني حاجه مش عارفه ارد اقوله ايه
ومعلش طولت عليكم وهااتعبكم

[aymonded]

سلام لنفسك يا محبوبة الهل الحلوة
أخطر حاجة هي التزويغ من الطفل لأن أسألته بتزيد ، وبعد فترة ثقته بتُزعزع في الكبار ويتعود دائماً على الكذب والزوغان من أي مشكلة يواجهها ، وسيشعر أن طبيعة حياة الكبار كلها كذب وتزويغ ، وطبعاً لأن الأطفال عندهم أي تزويغ من السؤال وعدم الإجابة هي كذبه مش تزويغ ، أو أن الكبار مش عارفين حاجة !!!

ولكن يا محبوبة ربنا يسوع الطفل ممكن يستوعب ، ولازم يكون لنا ثقة فيه ، بل نعطيه هذه الثقة ، وحينما تتحدثي عن مشكلة الآلام تحدثي عن آلام المحبة الصادقة ، وأن الله حب صالبيه ومعذبيه ، لأنه كبير وقوي ، والقوي هو من يُحب ويغفر ، والضعيف هو من ليس له القدرة على الغفران ، ولكن لا توصلي معنى إن الإنسان لا يُدافع عن نفسه ، ولكن يدافع في حدود الحب لأنه أقوى ...

عموماً أشرحي له المحبة الأبوية ، لأن الأب نفسه ممكن يُصاب من أجل ابنه وعوض عنه وهو كله محبة ، والأب يغفر ويسامح ,,,

عمماً الطفل مش شرط يسأل من أجل أنه يعرف حقائق ، ولكن قد يكون السؤال موجه بسبب نيه أخرى في نفسه ، فلا تتهربي من السؤال بل حاولي أن تجاوبي في حدود إطار الحب وعمل الله واستعيني بآيات الكتاب المقدس واشرحيها ببساطة ، وعلمي الولد أننا نُصلي أولاً وبخاصة لما يكون سؤال خاص برينا علشان هو يفتح بصيرتنا ويعلمنا ، وهذه هي القاعدة الذهبية لإجابة أي سؤال حتى يتعود أنه يلجأ لله أولاً ، لأن الله هو من يجاوب ويعطي فهماً في القلب بالروح القدس ...

آسف للتطويل ، أقبلي مني كل تقدير بمحبة ن النعمة معك

[Malak sokar]

اللة عليكي ياايمي
وعلي ابن اخوكي بصي انا هقول حاجة ممكن تبقي رد بس دة رايي انا وماتخديش بية غير
ماتتاكدي من صحتة
قوليلة ياحبيبي بابا يسوع اتصلب مكاني ومكاناك
عشان الناس الوحشين دول كانو عاوزين يصلبونا كلنا
فعشان بابا يسوع بيحبك وبيحبني اتصلب عشاني
زي ماما لما بتحب تشوفك فرحان ومبسوط مشل اما انت بتكون تعبان ماما
بتقول ياريتني انا الي تعبانة مش انت
اهو بابا يسوع كدة ماحبش يشوفنا مصلوبين راح اتصلب مكانا

دة راي شخصي غير موثق باي شي اتمني انك تاكدي واتمني اكون افدتك
ربنا يباركك

[بنت الراعي]

مستر ايمن انا عارفه صدقي اني غلطت وعارفه انه ممكن يفقد
ثقته فيا بس بصراحه كده مشش هااخبي عليك انا خوفت كمان اقوله انه بسماح منه
لانه بيحبنا وكده يعني يرد عليا بسؤال اصعب ومعرفش ساعتها كنت هااقول ايه
بس انا دلوقتي مش عارفه هاافهمه ازاي لانه م مقتنع يعني ايه حد قوي اوي وكبير اوي
يسمح انه يتهان ويتعذب مهما ان قولت له ده بدافع الحب او اي حاجه
حقيقي مش عارفه اعمل ايه هو طفل زكي وبيحب بابا يسوع اوي
ومش عارفه تفتكر حضرتك انه هايفهم وهايستوعب الكلام ده
خلاص انا هااجرب وابقي اقولكم النتيجه
وحضرتك ماطولتش ولا حاجه انا الحقيقه مش عارفه مين يعتذر لمين
معلش تعبت حضرتك معايا
ميرسي كتييييييييييييير
ربنا يعوضك ويباركك ويفرح قلبك

[بنت الراعي]

صافي ردك جميل اووووووووي بس
مش عارفه هايفهم ولا لا
عموما ميرسي بجد لتعبك وردك
وصلي لي اعرف ارد وافهمه
وربنا يعوضك ويباركك ويفرح قلبك

[أميرة عبده]

الله عليك يا استاذ ايمن وعليكى يا ملاك سكر بس انا عوزه اقول ان كلامك يا استاذ ايمن الطفل بردو مش هيعرف يتفهمه وكلام ملاك السكر ممكن يكون اسهل وخصوصا لو قالت المثل اللى وضحته عن ان كلنا اللى كنا هنصلب لولا محبه بابا يسوع ببساطه
وده بردوا مجرد راى

[aymonded]

أنا مش قصدي تقولي له التفاصيل اللي أنا قلتها
لكن إلفتي نظرة للحب الحقيقي وخليكي له مثال في المحبة والبذل وسط الأسرة ، قولي له أن ربنا قوي بالمحبة ، واضربي له مثل ، أن بابا بيتعب طول النهار علشانك وهكذا ، وممكن تاخدي أي مثل من الأسرة ، لأن الطفل يحتاج دائماً للحب والشعور بأنه مهم والكل بيقدره ولا يستخف بعقله ، واضربي له مثل أنه لما بيغلط بنسامحه ، وهكذا يوجد ألف طريقة للبساطة والكلام المباشر عند الطفل ، وخلي بالك من حاجة ، أن كثرة الأفلام الكرتون وبخاصة توم وجيري ، وضحت للأطفال أن دائماً القوة في العنف ، واللي بيغلب بالقوة والضرب هو الأقوى !!! وطبعاً ده على مستوى التلفزيون وجميع أفلام اليوم ، كلها عنف شديد وخطورة على الأطفال وبساطتهم الحلوة التي ضاعت بسببها !!!

وهكذا ترسخ عند جيل الأطفال إلى سن المراهقة بل تعدى ووصل للشباب ، أن القوة في الذراع والغلبة للأقوى الذي له القوة العضلية أنه يغلب الآخر بالعنف ، وهذا صار خطراً على المجتمع كله ، لدرجة اليوم تجدي شباب كثير لا يحترم الأكبر أو الآخر لأنه أصبح عنيف وأي احتكاك بسيط يقلب لخناقة أو عنف ، ظناً أن هذا هو التعقل والقوة ...

نريد أن نخلق جيل عاقل بعرف معنى الحرية والحب الحقيقي الصادق ، وأن العنف ليس قوة بل هو الضعف عينه ، ولا يُستخدم إلا في الإطار القانوني ...

عموماً باختصار أنتم واخدين فكرة مش سليمة عن الأطفال ، لأن الطفل مككن يستوعب ويشعر أكثر من الكبار أمور لا يقدروا أن يستوعبوها هم ، لأن الطفل بسيط جداً ويقبل الأمور ببساطة شديدة ، والموضوع محتاج وعي بنفسية الطفل والأمور الحادثة حوله ، وتأكدي أن سبب سؤاله الأفلام التي يراها وزرعت فيه أن البقاء للأقوى ، وهو من ينتصر ...

وأول كل شيء لازم توجهي نظره للصلاة أولاً ، وتشرحي له أن اي حاجة نحب نعرفها عن الله لازم وضروري قبل أي كلام نبدأ بالصلاة ، وصلي معه صلاة بسيطة ، لأن الله قادر أن يفتح أذهان الأطفال ويعطيهم هو الشرح اللائق بنعمة الروح القدس ، وأنت صلي حتى يُلهمك الله ماذا تقولي بساطة شديدة جداً ...

أقبلي مني كل تقدير بمحبة في ربنا يسوع ؛ النعمة معك

[نانانادر]

طبعا كلام استاذنا ايمن كلنا بنتعلم منة ..ربنا يبارك حياتة..انا من خبرتى المتواضعة مع ابنى ومع اطفال مدارس الاحد انك لازم تردى ولازم الطفل يلاقى عندك اجابة حتى لو الاجابة مش هيفهمها بس لازم تردى علية..بالنسبة لاجابة السؤال انت ممكن تبتدى تحكيلة من الاول من بداية الخليقة باسلوب مبسط جدا.. يعنى هتقوليلة ان ربنا بيحب الانسان جدا فقبل ما يخلقة خلق لة الشمس والقمر والمية والنبات والحيوان وهيا لة الارض تمام علشان الانسان يبقى مبسوط فيها وخلق اول واحد ادم فلقية عايش لوحدة فلق لية حواءواداهم وصايا واداهم سلطان على كل المخلوقات وقالهم كلوا من كل شجر الجنة ماعدا شجرة معينة قالهم لو كلتوا منها هعقبكم وتموتوا ربنا كان بيجربهم بيشوفهم بعد اللى عملهلهم دة كلة هيطيعوة ولا لا ..وادم وحوا سمعوا كلام الشيطان واكلوا من الشجرة وربنا زعل منهم وطردهم من الجنة وعلشان ربنا عادل ولازم كلامة يتنفذ لما قلهم ان عقاب الخطية الموت ..وبردوا هو بيحبنا جدا لاننا ولادةكلنا لازم نموت اتتحنن علينا ونزل من عرشة ومن السما ومات بدلنا بدل ما نموت كلنا ونفذ عقوبة ربنا وعلشان هو ربنا وقوى جدا قام من الاموات وغلب الموت انا اسفة طولت عليكى بس انا جربت الطريقة دى وكانت نتيجتها مية فى المية وابنى سالنى السؤال دة و عمرة 3 سنين اسفة مرة تانية على التطويل

[aymonded]

خبرة نانا رائعة برضو ومهمة جداً لأن الطفل لازم ياخد الموضوع من أوله
لأنه صعب ومش سهل حد طبيعي - في وسط الأفلام والفكر السائد
أنه يقبل بسهولة شكل الضعف الجسدي الذي ظهر به الرب يسوع
شكراً لك يا نانا على تسليم خبرتك الحلوة لنا

[نانانادر]

اشكرك يا استاذى الجليل احنا كلنا بنتعلم منك..وبالمناسبة ارجوك تعملنا مواضيع خاصة بالاطفال وكيفية التعامل معهم..

[aymonded]

اشكرك يا استاذى الجليل احنا كلنا بنتعلم منك..وبالمناسبة ارجوك تعملنا مواضيع خاصة بالاطفال وكيفية التعامل معهم..

ولو أن الموضوع موجود من زماااان انا كاتب موضوعات بالتفصيل ، كثيرة جداً في المنتدى عن معاملة الأطفال والتأديب السوي السليم ، وانشاء الله هابقى انشطها واعمل ليها فهرس حتى يسهل على الجميع قراءتها مرة اخرى لأن لها سنة تقريباً مكتوبة ...

أقبلي مني كل تقدير بمحبة ، يا محبوبة الله
النعمة معك كل حين آمين

[كراكيب]

مع احترامي للردود اللي اتبعتت بس انا شايف ان مينفعش زي ماذكر استاذ ايمن ونقوله ان اللي بيحب بيغفر وكدة لانه لسه مش هيقدر يفهم ده دلوقتي وعلي فكرة ده مش كلامي بس ده اللي لمسته في خدمتي لاني بخدم سن ابتدائي وكان ليا تجربة في خدمة حضانة
ولما اتسالت السؤال ده في ابتدائي كانت اجابتي منحصرة في ان بابا يسوع عشان بيحبنا رضي انه ينزل من السما عشان يشفي الناس واليهود اتضايقوا منه لانه كان بيعمل معجزات وبدا الناس يسيبوا اليهود والكتبة وميتعلموش منهم زي زمان راحوا هما اتضايقوا وعشان كدة كرروا يقتلوه وهو كان ممكن يمنعهم بس هو معملش كدة عشان ربنا مينفعش يخلنا نعمل حاجة ومنعملش حاجة تانية لان في الوقت ده يبقي هو مش هيحاسبنا لانه هو اللي خلانا نعمل او منعملش
انا عارف اني كان لازم اوضح الفداء كسبب لنزول رب المجد بس ده مينفعش لسن اولي وتانية وتالتة وعشان كدة انا استنيت لما طلعوا رابعة وخامسة وساته وبدات اشرح باقي القصة
لكن انا بقول ان الطفل في الوقت ده مش هيستوعب عشان كدة انا لو اتحطيت في الموقف ده بقوله انت لسه صغير ومش هتفهم دلوقتي لما تكبر شوية هتعرف
وانا في مرة اتعرضت للموقف ده وكان ردي للولد اني سالته انت نفسك تتطلع ايه راح قال لي ظابط رحت قلتله طب ينفع تبي ظابط دلوقتي قاللي لا لازم اكزن كبير عشان اعرف ابي ظابط فقلته وعشان كدة انا بقولك لما تكبر شوية انا هقولك وساعتها هتفهم لان عقلك هيكون كبر
بس مش كل الاطفال زي بعض

[aymonded]

طبعاً أشكرك جداً على ردك
بس لما الطفل يحس أنه صغير في نظرنا وأنه مش فاهم ، ولما يكبر هايفهم ، بيبقى جرح له ( عن البعض طبعاً وليس الجميع ) وبخاصة الأولاد الذين لا ينتبهم إليهم الأهل أو يلعبوا معهم أو يتحدثوا معهم أحاديث بسيطة ويحاولوا أن يقيموا علاقة معهم كاسرة واحدة ( كما سبق وشرحنا في موضوع ثورة ميلاد على صفحات المنتدى ) ، ولكن ممكن بمنتهى البساطة نحاول نشرح من خلال محبة الأبوين للطفل ، لأن أحياناً كثيرة الطفل يسأل لغرض آخر غير المعنى المباشر للموضوع كما نفهم منهم ، لأنه لا يعرف كيف يعبر تعبير دقيق عن ما في داخله ، وأروع تجربة حلوة رأيتها عند الأطفال هو لما نحب نعرف موضوع عن الله نبدأ بالصلاة وطلب عمل الله ببساطة ، فيفهم الطفل أن أي معرفة لله هي قرب منه والصلاة إليه ...

وبعد الصلاة والقرب من الله نقدر نشرح والروح القدس يعمل بسهولة وقوة في قلب الطفل ، وهذا ما تعلمناه من بعض شروحات الآباء عن تربية الأطفال وبخاصة القديس يوحنا ذهبي الفم ...

أقبلوا مني كل محبة واحترام لكم يا أحباء يسوع

[بنت الراعي]

اشكركم جداااااااااااااا علي اهتمامك وبجد انا
استفدت كتير من ردودكم
ربنا يعوضكم بس اسمعو بقي السؤال الجديد
اخته صغنونه بتتعلم المشي وقعت اتعورت في بوئها واسنانها
فباباها فضل يقولها تفي الدم اوعي تبلعيه
فبعد مااخته بقيت كويسه سال باباه يا بابا هو الدم اللي كان في بوء مرمر وحش
قاله اه طبعا ماينفعش تبلعه
سكت شويه وقاله امال الدم اللي بيديهولنا ابونا بالمعلقه في الكنيسه
ليه بتسيبنا نبلعه مش ده دم برده ؟؟؟؟!!!!!!!!!!!!!!!
هااقولكم باباه عمل ايه بس بعد اذنكم اعرف كان المفروض يقول ايه الاول
مستنيه الرد ومعلش بغلس عليكم انا عارفه
ربنا يعوضكم

[نانانادر]

ابن اخوكى دة شكلة مشكلة بيسال كتير دة بيدل على انة ذكى والطفل الذكى صعب انة يقتنع باى اجابة وخلاص ....انتى ممكن مثلا تفهمية الفرق بين الاتنين...يعنى مثلا تسالى اختة الدم دة طعمة اية او تسالية هو مش معقول انة متعورش قبل كدة...طعم الدم بتعنا وحش ومقرفلكن الدم اللى بناخدة من ابونا طعمة اية...اكيد مختلف ..وفية القداس التعليمى اللى بيشرح كل خطوة فى القداس وتفهمية ازاى عصير العنب بصلاة ابونا وحلول الروح القدس بيتحول الى دم بابا يسوع وان بابا يسوع عمل بنفسة كدة فى خميس العهد وتفهمية ازاى القربانة اتحولت لجسدالرب ودى وصية يسوع لنا اننا لازم نتناول علشان نبقى ولادة وقريبين منة ..وممكن تاكدى كلامك بمعجزات ومتخافيش هو هيفهم ويستوعبمثلا الانبا مكاريوس لما اتنيح وهو فى ايدة الجسد اية اللى حصل وفى صور معجزات كتير اثناء القداس دورى عليها ووريهالةمعلش انا طولت عليكى

[رويس]

هههههههههههههههههههههه
قوليله مهو ده اللي بيسموه
العفو عند المقدرة
هههههههههههههههههههههههه
طبعا انا مجاوبتش علشان اخواتي اللي قبل مني جاوبوا

[كراكيب]

انا بتفق مع نانا فعلا انتي حاولي توصليله الفرق بين الدمين واكيد هيقتنع لو عاوز يقتنع بس لو واخدها تحدي يبقي ربنا معاكي

[يحنا1975]

مناقشة رائعه و الجميع تألق فيها و كل واحد يحاول ان يبدع لكي يستفيد هذا الملآك الصغير ربنا ما يحرمكمش منه يا رب ، اما انا فحكتبلك إلي استفدت منه انا اولا" يجب ان لا نتهرب من الجواب عند السؤال المحرج ثانيا" تعليم الكل و الصغار ايضا" اننا نصلي اولا" و خصتا" عندما يتعلق السؤال بربنا و ثالثا" ان الاستاذ ايمن عنده فكره في علم فلسفة الاطفال كمان ! فإن تمحصتي و بحثتي جيدا بين اسطر كتابآته ستجدين الجواب الذي تبحثين عنه ، ربنا يحفظك يا استذنا الكبير ايمن وما يحرمناش منك و من كتباتك الرائعة :-(
اما عن ملآك سكر كتابتك تدل على انك فاهمه كل شيئ و عندك القدره على توصيل المعلومه للجميع كبارا" او صغار بكلآم قليل و مقنع إستغلي هذه الموهبه و نميها يمكن تفيدك بالمستقبل و شكرا"






عاشر من تعاشر فلآبد من الفراق !