محتاجه اتكلم

[تعبانه ومحتاجه اتكلم]

سلام المسيح يا اخوتي
كل سنه وانتم بخير
انا تعبانه قوي ومخنوقه خالص ونفسي اتكلم مع حد نفسي حد يسمعني
ويقولي اللي انا فيه ده ايه فاسمحوا لي ادوشكم شويه واتكلم معاكم
وهااكون شاكره ليكم جدا لو رديتوا عليا

انا عندي فراغ بصوره صعبه حاسه ان حياتي فاضيه
وحاسه اني ماليش لازمه في الدنيا جايز ده يكون بسبب اني خلصت دراستي وكده
بس حقيقي انا تعبانه من الفراغ ده جدا لان زي ماالاستاذ ايمن قال قبل ده العقل الفاضي معمل للشيطان
انا عقلي فاضي والشيطان بيحاول يسيطر عليه وياخده معمل للافكار الوحشه بس انا بحاول املاه بحاجات وافار كويسه
مثلا بالصلاه وقرايه الكتاب المقدس وكتب روحيه واشعار ودخول منتديات روحيه
لكن برضه في فراغ وفي زهق وفي محاربات
انا مش عارفه اعمل ايه تاني
ومان حياتي الروحيه انا خايفه عليها لانها بتتدهور يعني مثلا الصلاه بصلي من غير نفس ومن غير احساس
علما باني بعشق ربنا مش بحبه بس لا هو كل حاجه ليا هو ابويا وحبيبي وصاحبي
وكل حاه كتير اوي بحكي معاه واكلمه وبكون متاكده انه سامعني وبحب جدا اسمعه ويسمعني بس للاسف ده كان زمان
دلوقتي بصلي كما لقوم عاده بس لاني لو نمت من غير مااصلي بيحصلي كوابيس
بحضر القداس تقريبا مرتين في الاسبوع بس لاني باخد قوه من التناول يعني لمصلحتي انما الاول كنت بحضر القداس
لاني بحبه لاني بستمتع بيه
معرفش انا مخنوقه قوي ومش راضيه عن نفسي ومش عارفه اتكلم مع اب اعترافي يعني مش عارفه اشف نفسي قدامه
ممكن تصلوا لي
انا اسفه طولت عليكم وازعجتكم ومتشكره جدا انكم سمعتوني وسمحتوا ليا اتكلم ربنا يخليكوم ليا

[aymonded]

سلام ومحبة من الله أبينا وسيد كل أحد والرب يسوع مخلص نفوسنا الصالح بغنى فيض الروح القدس الرب المحيي ...

محبوبة الله ، نصيحتي أبحثي عن عمل لأن هذا في منتهى الأهمية ، أو أشغلي وقتك بعمل على الأقل 6 ساعات يومياً ، لأن العمل شيء هام للغاية لحياة الإنسان الروحي ...

لأن العمل يكشف عن وجود الله فينا ، ويعمل على ضبط النفس ويقوم حواسها ( عن خبرة ) ، فالله موجود في العالم ويعمل من خلاله ، لأنه يسكن عقل الإنسان وقلبه ، ويتحرك من خلال يد الإنسان بعمل الروح القدس فيه ، حينما يريد أن يعمل بأمانة وصبر مقدماً إبداعاً في عمله بكل نشاط وجدية ، وهذا كفيل أن يملأ الإنسان بسلام يفوق العقل ، وسلام ثابت مستقر مفرح مهما كانت الظروف والحوادث ، وأيضاً كفيل أن يُسَّكِنْ شهوات الإنسان ورغبات الجسد الطائشة ويضبط مساراتها ...

وعن خبرتي الصغيرة ، حينما أترك العمل وأهمله ، أجد هياج الجسد ، واضرابات فكرية وحرب الشهوات قد انقضت على نفسي ، وـحارب فيها وأحيانا كثيرة أُهزم ، وقليل جداً ما أنتصر ؛ وحينما أتوب واستيقظ وأعود بكل همة ونشاط للعمل الجاد تنضبط الحياة على الفور وتسقط كل شهوة ويهرب كل فكر مصدره غير الله الحي وأعود أقوى مما كنت في فرح إلهي حلو ...

وتأكدي أنه مهما بلغ شغب عدو كل خير ، حتى لو قلب العمل رأساً على عقب أو وضع العراقيل فيه أو المعوقات ، وصبرنا وتأنينا وأصرينا بقوة أن نستمر ، فالله يمنحنا قوة ومعونة سماوية ، فالله ساكن في عقل الإنسان وقلبه وليس في العمل نفسه ، وهذا بحد ذاته كفيل بتصحيح الأوضاع مهما بلغت المقاومه من شراسة ...

فلا بد من البحث عن عمل مهما كان ، حتى لو في حضانة أو ملجأ بلا مقابل ، المهم العمل العمل العمل ، هذا مهم للغاية ، أو على الأقل الاتزام بموهبة ما والعمل على تحقيقها ، أو نشاط ما ....

أقبلي مني كل تقدير بمحبة ، يا محبوبه الله ؛ النعمة معك

[غير مسجل]

استاذ ايمن متشكره جداااا لرد حضرتك
لكن للاسف انا بشتغل بس في مدرسه وعدد ساعات قليل
وباقي النهار فاضيه برده
لاني بشتغل في مدرسه ابتدائي فمش محتاجه تحضير ولا اي حاجه
وحتي في الشغل ببقي حاسه بفراغ ومش عارفه املاه
انا حاله نادره وصعبه هههههههههههه بجد قربت اياس من نفسي لا قادره اتاقلم مع الفراغ
ولا عارفه اغير نفسي وطريقتي في قتل فراغي
ميرسي يا استاذ ايمن ربنا يباركك

[بنت الراعي]

حبيبتي انا حاسه بيكي اووووووووووووووي
وبجد مش عارفه اقولك ايه غير انك فعلا زي ماقال مستر
دوري علي شغل وربنا يساعدك

[aymonded]

استاذ ايمن متشكره جداااا لرد حضرتك
لكن للاسف انا بشتغل بس في مدرسه وعدد ساعات قليل
وباقي النهار فاضيه برده
لاني بشتغل في مدرسه ابتدائي فمش محتاجه تحضير ولا اي حاجه
وحتي في الشغل ببقي حاسه بفراغ ومش عارفه املاه
انا حاله نادره وصعبه هههههههههههه بجد قربت اياس من نفسي لا قادره اتاقلم مع الفراغ
ولا عارفه اغير نفسي وطريقتي في قتل فراغي
ميرسي يا استاذ ايمن ربنا يباركك
محبوبة الله الحلوة جداً في ربنا يسوع
ممكن تبتكري في عملك ، مع أني أود أن اعرف طبيعة عملك في المدرسة ايه !!!

أنا عن نفسي زمان لما كنت ماسك حضانة كنت بابحث وادور على أني ابتكر حاجات جديدة اعلمها للأطفال بطريقة سهلة وفي شكل لعبة وكنا بنستمتع فعلاً ، فأنا والأطفال كنا حاجة واحدة وبنلعب سوا وبنتعلم سوا كل حاجة ، يعني مثلاً لو حبيت اعلمهم لون معين ، طبعاً سنهم مش ينفع اقول كلام ، فكنت أعتمد على الارتباط الشرطي ، فكنت أجيب فراولة مثلاً ، وهي لونها أحمر وأسمها فراولة وطعمها حلو ، واكلناها سوا - طبعا بعد لما سالت أهالي الأطفال عن لو حد عنده حساسية من الفراولة - وغرقوني فراولة وبوظوا هدومي ، وقعدت في الآخر أحمي واحد واحد ، وحموني معاهم طبعاً ، بس كانت ايام رائعة وجميلة جداً ، واستمتعت فيها معاهم فعلاً ...

عموماً حاولي تبتكري في تعليمك للأطفال أو في شغلك وأظهري مواهبك الحلوة ، لأن أكيد العمل مع الأطفال ممكن يبقى متعه واستثمار للوقت فعلاً ...

حاولي تمارسي عملك باستمتاع ومش في حاجة اسمها مستحيل أو لايوجد عمل !!!
بين يديكِ حل أكيد بس فتشي ولا تيأسي يا محبوبة الله الحلوة
النعمة معك كل حين

[ميرولاا]

هو فعلا الشغل فى التدريس بيكون احيانا شىء ممل
بس زى ما قال الاستاذ ايمن حاولى انك تبتكرى افكار جديدة
وحاولى كمان انك تعاملى الطلاب وكأنهم اخواتك الصغيرين
ودا ها يخليكى تبذلى مجهود اكتر وهاتكونى ديما فى حالة ترقب
علشان تشوفى ثمرة المجهود دة
ونفس الحال فى خدمة الكنيسة
صدقينى خدمة الكنيسة بتشغل وقت كبير خالص وكمان بتشغل فكر اكبر
وخصوصا لما تكون الخدمة بمحبة
والخدمة ليها انشطة كتير زى الافتقاد وخدمة المسنين وزوى الاحتياجات الخاصة
وحاجات كتير
انا اسفة انى رغيت كتير
بس دة عن خبرة لواحدة صحبتى كانت عندها نفس المشكلة
وكمان مش كانت بتشتغل
دلوقتى بتقولى مش بلقى وقت احضر فية اكل هههههههههههههه
وربنا معاكى ويحل برحة فى جميع افكارك واوقاتك

[اللة يرعانى]

ممكن تشغلى وقتك تروح كنيسة غير الاقداس احضرى اجتماعات امسكى خدة انتى لو رحتى لاب اعترافك وقلتيلو انك وقتك فاضى ممكن تساعدى فى الخدمة تروح افتقاض انا زيك وفعلا بشتغل مدرسة لمابيقى وقتى فاضى بروح كنيسة وبحضر اجتما وبصراحة بستفاد جدا وبتعرفى ناس كتير ويفدوكى ولازم تصلى من قلبك بجد واطلبى من ربنا يرشدك وربنا معاكى

[اختك في التعب]

متقلقيش في ناس زيك تعبانين من نفس موضوع الفراغ ده انا عن نفسي بتمني الموت وبانتظره

[aymonded]

ليه النظرة التشاؤمية دية !!!!
اين إيماننا

[sasaamad]

اختى فى المسيح لو عندك ايمان حقيقى هاتنتصرى على الشيطان وافكارة الشريرة واحنا احيانا بنتكاسل عن طلب المعونة اللاهية وبنرمى نفسنا للشيطان وافكارة ال بيزينها لنا ولكن من ارتمى فى احضان المسيح بقلبة وعقلة وفكرة واخيرا فى عملة سوف يهزم الشيطان وافكارة وربنا يريحك وتلاقى ابن الحلال ال يرتبط بيك وساعتها لما المسؤلية تكبر عليك تقولى باريت ال جرى ماكان وهى دى طبيعة البشر ال مش متمسكين بتعاليم رب المجد يسوع المسيح لانة قال كونوا كاملين كماهو ابوكم الماوى كامل الرب يحفظك انت وكل اولادنا وبناتنا من كل شر ومن محاربة ابليس واعوانة ولكم منى اجمل تحية وسلام من ملك السلام

[نانانادر]

بجد انا عاوزة اقولك انى كنت زيك كدة بالرغم انى عندى بيت واطفال صغيرين وواخدين كل وقتى لكن برضوا كان عندى وقت فراغ فظيع وفعلا كان الحل فى الخدمة
ابتديت اخدم فى بيت للايتام ومش قادرة اقولك الخدمة هناك روعة قد اية واد اية هتكونى مبسوطة لما تقدرى ترسمى بسمة على وش طفل من دول..وبدور كمان على خدمة فى بيت المسنين..فكرى الخدمة فعلا بتملى الحياة بركة كبيرة ..وربنا معاكى

[aser]

اختى فى المسيح انت رائعة فى عرضك لمشكلتك كل ما تعانين منه يعانى منه الكثيرين علاج مشكلتك ببساطه هو ان تصرخى لربنا بلجاجة و هو لم يتخلى عنك احفظى مزامير و صلى بيها و لا تنسى ان من يحفظ المزامير تحفظه المزامير تشفعى بالقديسين و خصوصا العذراء مريم لانها حنونه جدا اطلبيها لتعطيك معونه و صدقينى ستجديها وفى النهاية اقول لكى ربنا معاكى دائما و هو قريب منك جدا تشدد و تشجع لا تخف ولا ترهب لان الرب الهك معك حيثما تذهب داومى على الاعتراف و التناول من الاسرار المقدسة و ستجدى من السماء العزاء و الرجاء المسيح معاكى ولا تخافى

[سحر الكلمات]

سلام
على فكره انا حاسه بيكى جدا لانى زيك بالظبط ساعات كتير احس بفراغ وملل بس انا باحاول دايما اشغل وقتى باى حاجه مفيده زى الخدمه والكمبيوتر لانى بحبه جدا فأتعلمت اشتغل على برامج فيه وبحاول انى استفيد منها فى خدمتى زى الوورد والبوربوينت والفوتوشوب والموفى ماكر وغيرها من البرامج المفيده وكمان انا بحب الأشغال الفنيه اليدويه يعنى بعمل براويز وحاجات تانيه كتير وببيعها يعنى زى ما تقولى كده مشروع صغير فى البيت ومن ساعت ما عملت كده بقى الملل شئ مابيحصل كتير فى حياتى فنصيحتى ليكى انك تدورى على اللى انت بتحبيه واعمليه بس لازم يكون شئ مفيد ليكى وكمان خدى دورات تدريبيه فى اللغه الأنجليزيه والكمبيوتر وغيرها دا دلوقت فيه دورات تدريبيه فى كل حاجه حتى الخياطه والتطريز والمطبخ .....الخ فيه اكتر من كده يشغل الوقت ماعتقدش
ربنا معاكى ويساعدك ...... صلى من اجلى باى

[lely]

ياجماعه أنا عيزه أشارككم فى الموضوع ده.....
ممكن؟؟؟؟؟؟؟
أنا كمان مخلصه دراسه وبدور على شغل..فى شغل كتييييييير بس مش مناسب ليا
وفى البيت دايماً بيعترضوا
بس بجد بجد أنا مش لاقيه وقت أكون فيه فاضيه
عن تجربه شخصيه الخدمه فى الكنيسه بتشغل وقت كبييييييييير جداً فممكن اللى بيعانى من مشكله الفراغ يشغل وقته بخدمه ربنا وده مش هيبقى مجرد شغل للوقت وخلاص لأ ده كمان عمل مبارك فى كرم الرب يسوع
وكمان أبتديت أدور على مراكز كويسه علشان أخد فيها كورسات كمبيوتر وممكن لغات
ودى حاجه كويسه هتنفعنى لو لقيت الشغل المناسب
وكمان أصدقائى وأصحابى دايماً أنا مشغوله معاهم فى مشاكلهم وفى أحزانهم وفى أفراحهم
يعنى من الأخر فيه ميت طريقه وطريقه ممكن تشغلى بيها وقتك وهتكون حاجات مفيده ليكى ومرضيه لرب المجد يسوع
بجد أنا بعانى من عدم الفراغ.....:em2100:
أسفه لو كنت طولت عليكو
وميرسى أنكو أستحملتونى
ربنا معاكى
ويبارك حياتكم كلكم

[wwwmickail]

انا ليا راى يمكن هو روحى اكتر بس صدقينى انا كنت زيك كده بالظبط
وكنت معمل للشيطان
وعملت حاجات كتيييير جدا غلط مع انى كنت بصلى وبصوم وبروح الكنيسه كمان

بس اخدت خبطه تقبله اوى على دماغى
ربنا سمح بالخبطه علشان افوق من التوهه اللى كنت فيها

لحد ما قبلت ابونا اللى بعترف عنده دلوقتى فى نفس الوقت اللى اتخبط فيها الخبطه اللى كانت بمثابه تاديب الرب لعبده الخاطى

وفعلا بدات اتناول بس بانتظام وبدات اصرخواقول لربنا ارحمنى انا الخاطى وكمان بدات اشكره من قلبى

بجد انا مش عارف اقولك انا دلوقتى مبسوط قد ايه بالعشرة مع ربنا
جميله اوى اوى الحياه مع الرب الاله

[sasaamad]

سلام ونعمة لاخوتى واخواتى ويارب يكون عيد سعيد عليكم وعل كل البشرية والرب يملاء حياتكم بالنعمة والبركة والسلام من ملك السلام وكل عام وانتم بخير عم ايوب :8:

[anosh]

انا طبعا مش هاقول اكتر من اللى قالوه اخواتى بس فعلا عن تجربه شخصيه الخدمه جميله جداااااااااااا و بتشغل و قتك و كمان بتخدى بركة كبيره ... يمكن انتى عندك شغلك فى المدرسه لكن غيرك مافيش شغل خالص... صدقينى قدمى وقتك ده كله لربك فى خدمة ولاده هاتحسى فعلا بقيمة الوقت ... حتى لو انتى مش خادمه قولى لاب اعترافك و اكيد هايتصرف و بامانه هاتحسى ان اجمل شى فى الدنيا هى الخدمه ... ربنا معاكى و مع الكل و يدبر حياتنا حسب ارادته و مشيئته الصالحه .

[Biko]

بصى انا اعتقد ان السبب فى حالة الفراغ ديه
انك غالبا فى حاجة اتصدمتى فيها فسببت ليكى الاحباط ده
ورفضك انك تخرجى نفسك بره الياس والفراغ
مع انك عارفة كويس اوى ازاى تخرجى نفسك منه
مهما شغلتى نفسك لو من جواكى رافضة الاستجابة عمر ما حاجة هتاثر
كلامى ده عن تجربة شخصية
اخرجى تانىعلى العالم بنفس واثقة فى الهها انها تقدر تكون مبدعة ومتالقة
ومهما طال الفتور هايتعالج
وبالنسبة لحروب الشيطان متقلقيش لانه فى قول ابائى بيقول
مهما كانت الخطية فرصيد النعمة اكبر
يعنى مهما كترت الحروب النعمة اللى بتسندك اكبر
اسف للاطالة
طمنينا عليكى
صلى لاجلى

[ادروسيس]

Guestسلام ونعمة الاحساس بالفراع شئ وحش افضل طريقة هى ان تشبعى من ربنا اقفى قدامة وكلمية كما لوكان صديق أو صحبة انتى بتحيها واشكي له وانا واثقه أنه هايسمعك اقولك عللى صلاة سحرية وفعالة ومجربة وعلى مستوى الشخصى صلاة يعبيص أة لمل قال ليتك يارب تباركنى وتوسع تخومى وتكون يدك معى وتحفظنى من الشر حتى لا يتعنى(1أخ 10:4)تقربيا جربيها بس اوعى تنسينى فى صلاتك ربنا معاكى باىىىىىىىىىىىىىىى