المساعد الشخصي الرقمي

مشاهدة النسخة كاملة : الظروف ومشكلة الشباب والنجاح


aymonded
09-02-2007, 10:41 AM
هذا الموضوع لأخونا المحبوب :
أستاذ / هاني كمال
المشهور ب ( مارسلينو )

الظـــــروف
هل حاسس انك كان ممكن تكون ناجح لولا الظروف ؟
هل تعتقد ان بعض الظروف اللي حواليك هي السبب اللي بيعيقك في إنك توصل لهدفك ؟
هل بتفكر بالأسلوب ده ؟
لو كانت الإجابة: نعم.. يبقى اقرا معانا الموضوع ده
الباحثين أثبتوا - زي ما قلنا قبل كده - إن الاختلاف بين الناجحين و غير الناجحين هو حاجه واحدة بس.. الحاجه دي هي : طريقة تفكيرهم
الناجحين بيفكوا بأسلوب مختلف شوية.. و هو ده السبب الرئيسي لنجاحهم.. مش الظروف المحيطة بيهم
********
نمط غير الناجحين في التفكير
غير الناجحين دايما بيحاولوا يبرروا عدم نجاحهم..دايما لما بتواجههم مشكلة ما بيدوّروش على حلول ليها.. لكن بيستسلموا في بساطة ويدوّرا على شماعة ظريفة جدا -يعلقوا عليها فشلهم- إسمها الظروف
دايما تلاقي الشخص ده بيدور على أي حد يلومه على فشله
يلوم مديره لأنه مش متفاهم معاه
يلوم والده لأنه كان بيعاقبه في طفولته
يلوم عيلته لأنها مش موفرة جو ملائم له
يلوم أي حاجه.. انشالله الأقدار و الحظ السيء لو مالقاش حاجة يلومها
المشكلة في الشخص ده إنه بيستسلم بسهولة جدا لأنه بيعتقد إن أي حاجه في حياته هو مش مسئول عنها.. لكن أي حد أو حاجة تانية غيره هو نفسه
********
نمط الناجحين في التفكير
لو تأملت سيرة أي شخص ناجح – أي شخص ناجح !- هاتلاحظ حاجة غريبة قوي.. هاتلاحظ إن الشخص ده في بدايته كانت ظروفه في غاية القسوة و ان الطريق ماكانش مفروش أمامه بالورود و الأزهار.. هاتلاحظ إن الناس دول مابيؤمنوش بالحظ.. لكن بيؤمنوا بقدراتهم على النجاح

بيل جيتس.. أغنى شخص في العصر الحالي وصاحب شركة مايكروسوفت , أكبر شركة للبرمجيات في العالم.. كانت بدايته غاية في القسوة و عانى من مشاكل مادية عديدة.. وفشل في دراسته في جامعة هارفارد
تعالوا نشوف عمل إيه
قعد يلعن حظه السيء و فضل قاعد على القهوة يشرب شيشة ؟؟
هل فضل يلعن أساتذته اللي ماعرفوش مواهبه؟؟
بدل مايقعد يفكر في المشاكل و يدور على شماعات يعلق عليها احباطاته, اعتبر كل المشاكل دي مجرد تحدي.. فكر بأسلوب عملي بعيد تماما عن طريقة لوم الآخرين و الظروف.. و بدأ يفكر في طرق ينجح بيها و يحقق حلمه في إنشاء شركته الخاصة
تعثر أكثر من مرة.. لكنه كان بيحاول بطرق أخرى لأن فكرة الاستسلام و لوم الظروف كانت غير واردة أساسا في ذهنه
و نجح زي ما احنا عارفين و أنشأ شركته
********
الفكره هنا إيه ؟؟
لو حد واجه أي إحباط في حياته , و لقى نفسه بيفكر بطريقة لوم الآخرين دي.. اعرف انه كده مش هايحل أي حاجه و إنه اختار الطريق السهل.. و هو الاستسلام و لوم الظروف
لما الشخص الناجح بيواجه المشاكل , بيعتبرها مجرد مطبات في طريق نجاحه.. حواجز لازم يعديها عشان يوصل لهدفه
********
عارفين الموضوع عامل زي إيه ؟؟
لو في يوم الصبح لقيت الدنيا بتمطر و انت رايح الشغل.. هاتعمل إيه ؟
الفاشل ممكن يلعن الظروف الجوية و يتغيب عن عمله
الناجح بمنتهى البساطة.. هايجيب مظلة و يروح شغله
هي دي استراتيجية التفكير الإيجابي اللي بنتكلم عنها.. أي ظروف في طريقك انت قادر تماما انك تتغلب عليها ... دا لو ماستسلمتش و و قعت في فخ اسمه : لوم الآخرين و الظروف
********
عايز تكون ناجح ؟
يبقى كون أقوى من الظروف و كمل طريقك.. امسك مظلتك و امشي في العاصفة
لوم الظروف الجوية مش هايوصلك لطريق النجاح اللي انت رايحه
********

حياتنا دي احنا اللي متحكمين فيها مش أي حد تاني ( لنا أن نسلمها لله ونسعى بجدية للنجاح مهما كانت المعوقات ، متكلين على الله يالإيمان الصادق والمحبة الحقيقية ) .. مشاكلنا كلها حلها في ايدينا احنا .. مش في إيد الظروف

( المؤمن الحقيقي بالله يدرك تماماً أنه متكل على الله وحياته في ايد مخلصه الصالح ، وفي نفس ذات الوقت له المقدرة أن ينتصر على اي ظروف ويتخطاها بقوة الثقة في الله ولا يهدأ إلى أن ينجح ويتحمل كل مشقة وضيق بصبر عظيم )
********

kiko
09-05-2007, 03:44 AM
مش عاااارف اقولك اية ياريت نشوف الاراء ياجماعة

aymonded
09-05-2007, 05:00 AM
ربنا يوفق الجميع ويعطيهم روح العزيمة والأصرار على النجاح وسط المعوقات
واثقين في الله راسخين في الإيمان مملوئين محبة
النعمة معك يا اغلى كيكيو وننتظر مشاركة باقي الأعضاء

beshoy
09-07-2007, 01:01 PM
كلام جميل جدا جدا جدا

aymonded
09-08-2007, 08:02 AM
كلام جميل جدا جدا جدا

النعمة معك يا أغلى بيشو
وهبك الله النجاح الدائم يا أغلى غالي
النعمة معك كل حين آمين

Narmar
09-25-2007, 06:29 AM
شكرا ليك
استاذى الحبيب أيمن
اعجز عنم شكرى و تقديرى لك يا أستاذى الغالى
كلامك بجد فعلا مهم و فعلا خلانى اخدت بالى من اكتر من حاجة
شكرا ليك يا حبيب المنتدى و حبيب ربنا شكرا ليك أيمون

aymonded
09-26-2007, 03:51 AM
الله يخليك يا اغلى نارمر ويبارك فيك يا حبيب قلبي الغالي جدااااااااااااااااا
النعمة معك ومع الجميع كل حين آمين

kamel
12-01-2007, 05:17 AM
موضوع جميل جدا ياغالى الرب يباركك
ياريت كل منا لا يرمى حملة على الظروف بل للمسيح ..يذهب يستريح
فلا تحزن على وقت عدى وفات
فالله المحب..يأتيك بالفرحات
وكن مع المسيح دائما
تستريح
الرب مع الجميع

aymonded
12-01-2007, 05:48 AM
شكراً يا أستاذ كامل على كلماتك التي يحتاج إليها الجميع
وشكراً لأخونا المحبوب هاني على هذه الكلمات
النعمة معك

انسطاسيا
01-25-2008, 12:48 AM
ميرسي مستر ايمن علي الموضوع الجميل ده
ربنا يدينا ونقدر نواجه اخطائنا ونحلها ويكون عندنا اراده وقوه وعزيمه للتغيير
ربنا يبارك حياتك ويحافظ عليك ويقويك
اختك الصغيره
انسطاسيا

aymonded
01-26-2008, 01:37 AM
آمين فآمين
الله قادر أن يعطينا أن نحيا كرجال الله لنا ثقة في شخص الكلمة الحاضر معنا حسب وعده
النعمة معك يا أغلى أنسطاسيا

مايكل عبد الشهيد
02-08-2008, 07:03 AM
عشان تكون المقارنه صحيحه ماتجبش واحد عايش فى بلد عاندها لجنه لحقوق الانسان ببلد ماعندهاش قانون لحقوق الانسان اميركا زي شاب عايش فى مصر اديك قولت انه اسس شركه تعالى بقى قولى ان شاب لقى عنده فكره فيها ميزه ليه ولغيره وقولى هنا ازاى يحققها بص وعشان تبقى فاهم هنا فى بلدنا صعب اوى يكون فى بيل جيتس ومش عشان هو ازكى مننا ولا هو عانده اراده ولا حتى عشان هو الرجل زو القناع الحديدى او سوبر هيرو بس احنا هنا كشباب لما واحد بيمشى معوج ومين قده بيبقى مرتبه 500 جنيه فى وقت كيلو اللحم ب50 جنيه ياعنى احنا من الاخر كشباب ماعندوش حد يساعده اخر واهم حلم عاندنا الستر وهنا بقى تعرف قيمه كلمه ظروف ماحطناش نفسنا فيها احنا الشباب بس اتولدنا فيها وهى عباره عن طوق كل مانكبر يصغر فى رقبتنا لغايه مايخنقنا ظروف بلد وظروف الاقباط فى البلد وعايز تعرف كلامى روح قدم على شغل فى مؤمن ولا فراجله وساعتها هاتعرف وتعد تغنى ماشربتش من نيلها

مايكل عبد الشهيد
02-08-2008, 07:04 AM
اسف كنت عايز اقول لجنه لحقوق الحيوان

aymonded
02-08-2008, 10:49 AM
حبيب قلبي الغالي
أنا عايش في نفس البلد ونفس الشخص كاتب الموضوع في نفس البلد ، وكلنا تحت الضيقة عينها ، وليس في أحد هنا خارج مصر عايش في حته أخرى ، وياترى ليه انت حكمت على هذا الموضوع أننا مش من هنا أو عايشين في مصر يا احلى غالي ، وبعدين لما نعطي مثل عن أي شخص في أي بلد ما مش المقصود أن نكون مثلة بالحرف الواحد ، إنما مجرد مثال لنا أن نتعرف عليه ونسعى أن نكون مثلة ولا نقول ظروف أو كلمة مستحيل ...

ومش تنسى كلمة الرب يسوع / اين إيمانكم !!!
لنا ثقة في الله الذي قال لا أهملك ولا أتركك ، ولنا أن ننطلق بعزيمة أننا ننجح ونقوم بكل ما علينا ، وليس معنى كلامي أو طرح الموضوع اننا في رغد الحياة أو لا نسعى للعمل ونحارب من أجل أن نكفي بيوتنا ونكتفي بما عندنا ، يا حبيب قلبي الموضوع مش موضوع مثالية وضعناها ونحن يدانا في ماء بارد لا نشعر بضيقة هذه الأيام الصعبة جدااااااااااااااااا

ولكن هذه الظروف تشمل الجميع ، ولنا أن نتحرك بكل عزم وقوة ونكون مثال للكفاح أمام الكل ولا ننظر للأمور بالاستحالة وكأن ليس لنا حياة ونحيا في حالة ياس من كل شيء ، ولاتنسى أن الرسل وشخص ربنا يسوع نفسه كانوا فقراء ، ومع ذلك بولس نفسه في عز الضيق والشدة كان يعمل لكي يكفي حاجته ، والكنيسة وكل ابنائها كانوا تحت ضيق اشد مما نحن فيه ، وارجع للتاريخ ، لأن بالرغم من كل هذا كان رجائهم في الله ...

ولا يقول أحد أنهم كانوا قديسين والله معاهم ، لأن معنى ذلك اننا نعتبر أنفسنا خارج الإيمان وهذا خطير جداً

السلام لنفسك يا احلى غالي / طالباً من الله أن نشترك في الصلاة معاً لكي ينعم الله على كل من في الوطن بأن يقدر على أن يحيا وشط هذه الضيقة العظيمة ...

أقبل مني كل تقدير بمحبة يا احلى غالي

mrmr246810
03-04-2008, 11:10 PM
ميرسى اوى عالموضوع دة وربنا يدينا دايما روح الارادة والعزيمة والطموح وتنزع منا روح الكسل والاستسلام ويزيدنا جميعا نعمة

aymonded
03-05-2008, 01:30 AM
آمين يا احلى مرمر
السلام والنعمة لشخصك الغالي في ربنا يسوع
النعمة معك

tito_t
03-20-2008, 08:37 PM
الاول انا بشكرك على الموضوع ده عندى سوال انت الكاتب الموضوع ده ولا نقله من حته فى تلك الحلتين بشكرك بسي يهمنى اعرف
اما رايى بالنسبه للموضوع ده انا مومن بكل كلمه كتبتها ومصداها لابعد الحدود بسي وهى على الورق بسي لانى فى ارض الواقع انا مش شايف كدا لان كتير ما بيكنش ليك دخل فى الظروف والحل ما بيكنش فى ايدك بيبا اكبر منك بكتير
يعنى ايه كلمه ناجح وناجح بالنسبه لمين ده سوال مهم ؟؟؟؟؟
من وجه نظرى ناجح يعنى ادرت احط هدف معين واوصل ليه
ولكن الوصول لتلك الاهداف يظل مستحيل فى ظل ظروف مختلفه نعيش فيها سواء ظروف شخصيه او ظروف الحياه عموم انا نفسى اعرف كيف يتغلب الانسان على ظروفه ويصل لاهدافه او الى نصف اهدافه ارجو الاجابه
شكرااااااااااااااا

aymonded
03-20-2008, 11:00 PM
السلام والنعمة لك يا أحلى غالي محبوب ربنا يسوع
أولاً أشكرك على كلماتك الحلوة يا أحلى غالي
ثانياً أنا نوهت من بداية الموضوع أن الموضوع ليس لي ولا أنا اللي كاتبه ، وقلت في البداية أنه لعضو قد وضعه في منتدى آخر ، واسم العضو :
أستاذ / هاني كمال
المشهور ب ( مارسلينو )
ولا أعلم هل هو له أم نقله ...

وأنا علقت في نهاية الموضوع بالآتي :
( المؤمن الحقيقي بالله يدرك تماماً أنه متكل على الله وحياته في يد مخلصه الصالح ، وفي نفس ذات الوقت له المقدرة أن ينتصر على أي ظروف ويتخطاها بقوة الثقة في الله ولا يهدأ إلى أن ينجح ويتحمل كل مشقة وضيق بصبر عظيم )


أما بالنسبة لتحقيقه في أرض الواقع ، طبعاً لنا أن نحاول أن نحقق أحلامنا ونشق الصخر بقوة الثقة في الله أولاً وأن نعطي لأنفسنا الفرصة للمحاولة ونثق أن لنا قدرات خاصة ومواهب من الله ، وقادرين أن نحقق أحلامنا ولو جزء بسيط منها ...

وطبعاً مش كل أحلامنا ستتحقق بالمعنى المتسع للكلمة ، ولكن قادرين حتى ولو نحقق القليل منها ، فلنا أن نحاول مرات ومرات ولا نفشل ، فاعتقادي الشخصي أن الفشل الحقيقي ، ليس هو ما لم نقدر على تحقيقه ، إنما هو روح اليأس والإحباط التي نسمح بأن تكتنفنا وتسيطر علينا ...

ولا يوجد عيب في أن نحلم ونحاول آلاف المرات أن نحقق أحلامنا ، ولكن العيب الحقيقي في أن نعتمد عليها ، وأن لم تتحقق نفشل ونخور في أنفسنا ، ولا نحاول مرة أخرى أن نحققها أو نبدل الحلم بحلم آخر ونحققه ...

أنا عن طريق الكيفية في خطوات واضحة هذه متروكة حسب حلم كل شخص ومثابرته في المحاولة وتخطي العقبات التي يلتقيها في حياته العملية ، وكل منا طريق وفكر وقدرات على تخطي الأزمات ...

وأنا كل ما اقصد بنقل هذا الموضوع هو أن نعيد حسابتنا وننهض ونواجه أنفسنا بجدية ونتخطى كل ضعف ونحاول الوصول لأحلامنا دون الاستسلام ...

أقبل مني كل تقدير بمحبة
النعمة معك

اس اسامة عوض
03-21-2008, 04:00 AM
حياتنا دي احنا اللي متحكمين فيها مش أي حد تاني ( لنا أن نسلمها لله ونسعى بجدية للنجاح مهما كانت المعوقات ، متكلين على الله يالإيمان الصادق والمحبة الحقيقية ) .. مشاكلنا كلها حلها في ايدينا احنا .. مش في إيد الظروف


صح انا معك يا ايمن وعايز اقول انو مش كل حاجة نقول دى الظروف دا اصلى الشيطان هو هو موضوع جميل جداا

aymonded
03-21-2008, 07:16 AM
الله يخليك يا احلى أسامه ( اسحق )
وهو قعلاً مش كل حاجة ظروف ، رغم أنه يوجد أحياناً ظروف
بس مش كل الدنيا ظروف وعلى طول حياتنا

أقبل مني كل تقدير بمحبة - النعمة معك