سؤال ضروري ومُلِح عليكم انتظر إجابته فعلاً

[aymonded]

سلام بمحبة يا أجمل أعضاء منورين المنتدى كله
عندي اليوم سؤال مهم جداً ، وهو :
هل هناك فعلاً حاجة أسمها (( قسمة ونصيب ))


وهل بناء على القسمة والنصيب ، نقدر نقول أن الله مخطط ومدبر لكل إنسان حياة كاتبها على جبينه ، والمقسوم له ها يكون ، ونصيبه لازم يناله مهم ما لفت الأيام ودارت !!!



ولو كان هذا الكلام صحيح ، فهل معنى هذا أن الإنسان ليس له أي إرادة في توجيه حياته بل توجه حسب قسمته ونصيبه مهما فعل أو حاول يخطط لحياته ، وتُصبح أي ملامة من الله للإنسان في غير محلها ، أو أي حكم على الإنسان من أجل خطية أو انحراف غير صحيح ، فالله في هذا الموقف ظلم الإنسان الذي خطط ودبر له وكتب له نصيب خاص به !!! وهل فعلاً الله خلق واحد شرير مصيره الجحيم وواحد بار مصيره الملكوت والحياة الأبدية !!!



ولو الإنسان اختار شريك حياة عذبه أو إنسان غير سوي ، يبقى أي اختيار مش خاطئ ، بل هذه قسمته وده نصيبه الخاص ....


ووصايا الله لا تنفع فعلاً ، لأنها لا تتفق أحيانا حسب نصيب الإنسان في الدنيا ، لأن من الجائز يطلع ابنه حرامي أو قاتل ، أو حتى أن والده منحرف أو يحيا في أي خطية ما ، فكيف نقول له أن يتوب ، مع أن نصيبه كان يعيش وسط هذا الجو الموبوء !!! ولو كان إنسان أمين يعمل في مكان ما والناس بسبب أمانتة طردوه ، يبقى ده قسمتة ونصيبة والله خطط حياته كده !!!



القسمة والنصيب تعرضنا لأسئلة كثيرة ليس لها حلّ فعلاً ، والسؤال الذي تطرحه أمامنا هذه المقولة السائدة في عقول الناس وفكرهم الخاص ودائماً ما يفلسفوها حسب كل موقف ، بمعنى لو تكلموا عن الإنجيل ووصية الله يلغوها ويحوروها لمعنى آخر ويركزوا على الطاعة وحفظ الوصية والخضوع لكلمة الله ، وحينما يتكلموا عن حياتنا في المجتمع يتمسكوا بيها حرفياً ، وهكذا يختلف تفسيرها من حال لحال حسب الموقف !!!



والسؤال الذي تطرحة علينا (( القسمة والنصيب )) هو :
ما هي مشيئة الله وحدود حرية الإنسان !!!
وما هي علاقة مشيئة الله بالقسمة والنصيب !!!
وكيف يدين الله المسكونة بالعدل ، مع أنه لكل إنسان قسمة ونصيب !!!

[حنان الأخ]

شكراً على الموضوع الجميل
سلام و نعمه و بركه يا أيمن،
أولاً: الإنسان حر، حريه كامله بدرجة 100%
طب و مشيئة ربنا إيه علاقتها بالموضوع بحرية الإنسان؟!
بص يا سيدي
لازم أولاً نفرق بين علم الله و حرية الإنسان. فعلم الله غير محدود، يعني له علمه سابق بكل حاجه هانعملها قبل ما ننوي نعملها أو حتى نفكر فيها، لكن ده لا ينقص حريتنا شيء لأن رغم علم الله فبرضو الإنسان بيعمل اللي هو عاوزه. فده شيء يوكد على حرية الإنسان.
مع ذلك، ممكن أضيف نقطه، إن الله ممكن يدخل و يوجه الإنسان كأب بيوجه إبنه، لسبب من إثنين:
ممكن يكون لخير الإنسان نفسه، زي ما عمل مع بلعام
و ممكن يكون لأن الإنسان ده مكلف بمهمه، زي عمل الرب مع يونان النبي.
مع خالص حناني

[aymonded]

أشكرك يا محبوب على الله على إجابتك الحلوة فعلاً والواقعية جداً
أقبل مني كل حب وتقدير لشخصك الغالي
النعمة معك كل حين

[eng_fofa]

المفروض انى اقول ان الكلام ده مظبوط ميه فى الميه
بس انا احيانا مش بقتنع بكده لانى بشوف ناس كتير فى حاجات بتحصل فى حياتهم غصب عنهم ومالهمش اى يد فيها
وهاقول مثال حصل حقيقى علشان كلامى يبقى واقعى
انا اعرف واحده جوزوها واحد غصب عنها واللى عمل كده هو اخوها الكبير وبكل اسف ولا والده ولا الدته ولا اى حد قدر يقف قصاده
ويمنع الجوزاه دى حتى الكهنه
وكانت النتيجه بيت تعيس واولاد مدمرين نفسيا واجتماعيا وماديا
تفتكر حضرتك اللى حصل مع الست دى كان باردتها ولا قسمه ونصيب
ميرسى ليك استاذ ايمن

[aymonded]

الموضوع له جوانب متعدده يا جميل
ودية لا قسمتها ولا نصيبها طبعاً المشكلة في طبع من هم حولها
ومثلاً لو شخص ما قتل شخص ما طمعاً في السرقة أو بسبب الحماقة أو الاندفاع بالغضب
فهل هذا قسمة ونصيب من مات !!! أم أن هناك من يحيا في الشر والفساد !!!
النعمة معك كل حين

[hana montana 2010]

اولا شكرا جدا ليك يا استاذ ايمن على الموضوع الحلو ده
لانى فعلا كنت بسال هو احنا بسبب القضاء والقدر مجبرين فى حياتنا
سؤال تانى هو يهوذا لما سلم ربنا لليهود مش ده برضه ربنا كان مرتب ليه يعنى كان لازم يعمل كده ويخون الرب يسوع المسيح له المجد؟
معلش اصل السؤالين دول محيرنى اوى من وانا لسه صغيره فنفسى اعرف اجابتهم

[aymonded]

سلام لنفسك يا محبوبة الله
الؤالين المهمين المطروحين هما :
هو احنا بسبب القضاء والقدر مجبرين فى حياتنا ؟
سؤال تانى هو يهوذا لما سلم ربنا لليهود مش ده برضه ربنا كان مرتب ليه يعنى كان لازم يعمل كده ويخون الرب يسوع المسيح له المجد؟

أولاً من مستحيل أن الله يخلق الإنسان ويحط له قداء وقدر في حياته ويخططها بشكل محدد ، ولو الله صنع هذا فلماذا يعطي كل واحد حسب اعماله !!! أو لماذا نُحاسب أو يظهر ملامة في ضمائرنا على أننا ناقصين وفي حالة بعد عن الله ، ولماذا يسألنا الله عن المحبة أو شركتنا معه ومع بعضنا البعض ، ولماذا نتوب ، إذ كنا معينين للخطية أو للسقوط أو الضعف ... الخ الخ !!!

الحقيقة أننا دائماً نهرب من مسئوليتنا ونضع أمامنا القضاء والقدر ، فمثلاً طالب كسول لا يُذاكر ، ويذاكر ليلة الامتحان أو قبلها بأسبوع ويقعد يصل أن ربنا ينجحه ، وان لم ينجح يقول أن هذا قداء وقدر أو قسمة ونصيب ، ويرمي كسله وتراخية وتقصيره على الله ، ويجعل الله هو المسئول عن هذا !!!
وهكذا في امور كثيرة جداً نتواكل فها ونرمي المشكلة على الله وكأنه هو المسئول أو معين لنا هذا ن بل والختطي أيضاً يرمي خطيئته ويلوم الله أنه خلقة من أجل الخطية ، مع ان الخطية هي اختياره الحرّ ، فمثلاً من يحيا في حالة من السكر وشرب المخدرات ، يلوم الله في النهاية ويقول قسمته ونصيبه بقى هايعمل ايه !!!

أليست هي نفس خطية آدم حينما قال لله ، المرأة التي اعطيتني هي التي جعلتني آكل ، اي رمى المسكلة على المرأة انها هي السب وفي النهاية اللوم على الهل ، لأنه هو من أعطاه أياها ، وبالمثل قالت المراة أن الحية هي السبب ، والإنسان نسي أنه هو المسئول الأول لأنه قبل الغواية وأخطأ وخالف الوصية بحريته وإرادته وحده فقط !!!

ثانياً بالنسبة لموضوع يهوذا ،الله - بالطبع - لم يخطط أن يهوذا يسلمه ، ولكنه كان يعلم - حسب عمله المتسع - من هو الذي يسلمه وقد تناقشنا في هذا الموضوع على صفحات المنتدى في قسم سؤال وجوب وهذا هو الموضوع ارجو الضغط على عنوان الموضوع للخول فيه ومعرفة الإجابة بالتفصيل :
ايه ذنب يهوذا انه يخون السيد المسيح ؟؟؟ (http://www.orsozox.com/forums/f32/t9908/)

اضغطي على العنوان لتدخلي على هذه المناقشة وإجابة سؤالك
أقبلي منل ك لتقدير يا محبوبة الله والقديسين ، النعمة معك

[بنت الراعي]

كالعاده يا مستر موضوع جميل وهادف
انا موافقه حضرتك جداااااااااا
لاننا لو قولنا ان في قسمه ونصيب يبقي ربنا راسملنا سكه او خطه هانمشي فيها
وهي حياتنا وتحركاتنا وحتي خطايانا يبقي بقي ازاي يحاسبنا علي خطه راسمها لنا
واحنا مشينا فيها ماهو نصيبنا بقي يبقي ربنا كده ظالم وحاشا طبعا انه يكون ظالم
لكن ربنا بعلمه السابق بيقدر يعرف احنا هانعمل ايه وهانروح فين
ورغم كدع ربنا بيحترم ارادة الانسان وحريته رغم انه يريد الكل يخلصون لكنه مش بيتدخل يعني
معرفة الله الغير محدوده لا تتدخل مع ارادة الانسان المحدوده
اما بالنسبه للاخت اللي اتجوزت غصبن عنها فكان فيه كذا طريقه تمنع الجوازه دي
لو كانت في الاكليل قالت لابونا مش عايزاه اعتقد كده ماكنش هايبقي نصيبها وقسمتها
ويهوذا برده ربنا كان عارف انه هايسلمه بس مارتبش ده له من الاول ولا اجبره عليه
بدليل انه لو كان تاب ورجع اكيييييييييد كان هايقبله
ميرسي يا مستر ومعلش طولت
وتقبل مروري مع فائق احترامي

[aymonded]

حقيقي اشكرك كتير على ردك الحلو يا أجمل أخت حلوة
والمعضلة كلها هي في محدودية الإنسان وقياسة الأمور حسب رؤيته الشخصية
والعثرة دائماً في الفكر نتيجة قصور الرؤية والانفتاح على الله الأبدي
أقبلي مني كل تقدير يا أجمل أخت حلوة
النعمة معك

[hana montana 2010]

شكرا ليك يامستلر على اجابتك الحلوة

[aymonded]

متعك الله بغنى مجد حلاوة نعمته الحلوة
ولنصلي بعضنا من أجل بعض
النعمة معك كل حين

[mummy2008]

يا عزيزى..........

الموضوع ببساطة اننا مسيرين فى اشياء ومخيرين فى اشياء اخرى...ازاى.......تابع معايا المثال دة............

لو مثلا عايز تتجوز...........وقدامك 1- بنت عمك( قريبتك)........2- واحدة غريبة عن العيلة(صديقة دراسة مثلا)

لو اخدت قريبتك هتسير حياتك فى اتجاة مرسوم مسبقا من قبل الله

ولو اخدت الغريبة سوف تسير حياتك فى اتجاة اخر مرسوم ايضا من قبل الله

يعنى مثلا لو خدت بنت عمك( قريبتك) ممكن تتقدم فى شغلك وربنا يرزقك باولاد وتعيش سعيد..............او العكس.........اوالعكس(واخد بالك)

علشان كدة احنا بنقدم مشيئة واختيار ربنا على اختيارنا

ان الانسان ينظر الى العينين اما الله فينظر الى القلب

اسمع ديما صوت ربنا وخليك ماشى وراة.

وسلملى على الترماى اللى بيروح المجلس الملى

[تونى كويك]

ربنا خلقنا مخيرين وليس مسيرين
وادانا عقل وحرية مطلقة فى اختيار الاشياء
ولاكن الاهم من ذلك مفيش شىءبيحدث
الا بارادة الله وبتدبيره

[mummy2008]

ربنا خلقنا مخيرين وليس مسيرين
وادانا عقل وحرية مطلقة فى اختيار الاشياء
ولاكن الاهم من ذلك مفيش شىءبيحدث
الا بارادة الله وبتدبيره


يا استاذ تونى

وضح فكرتك

ازاى تكتب الكلام ونقيضة

ازاى احنا مخيرين علطول مش مسيرين...........زى ما انت كاتب

وبعديت تقول .........مفيش حاجة بتحصل غير بارادة اللة وتدبيرة(دة بالنسبة للخير بس ولا للشر كمان)

يعنى اللى بيسرق واالى بيقتل واللى بيزنى..........الخ

دى نطبقها ازاى على كلامك

على النص الاول من الكلام.........والا النص التانى

وبعدين انت لغيت ميزة العقل والحرية المطلقة عندما ربطت الجملتين فى بعض

يعنى انا اب قولت لبنتى( عايزة تخرجى اخرجى)............ولما تيجى تخرج اقولها(لا متخرجيش)..................فين بقى العقل والحرية المطلقة
وبعدين حكاية مفيش حاجة بتحصل غير بارادة ربنا وتدبيرة( جميل جدا) اوافقك الراى و اوايدك

يعنى ايد ربنا بتدخل وتغير الامور للصالح وبتحمينا ...........ولا انت تقصد حاجة تانية

طيب هذا الوضع يندرج تحت بند اية........تخيير ولا تسيير




بص علشان الموضوع يوصل للجميع بصورة بسيطة ونتفهم جميعا موضوع الاخ الكبير
او الاخت aymonded (http://www.orsozox.com/forums/member.php?u=527)(معلش يا جماعة انا لسة جديد زى ما انتم عارفين ف لسة مش عارف الاعضاء وبعدين الاسم مش واضح بكرر اسفى)

ونفهم هو قصدة اية من الموضوع

اختار من بين الاقواس

لما الطفل يتولد يلاقى نفسة ولد او بنت...............(مخييرن ولا مسيرين)

لما تكبرتلاقى نفسك مسيحى او غير.................(مخيرين ولا مسيرين)

لما توعى على الدنيا تلاقى نفسك غنى اوفقير........(مخيرين ولا مسيرين)

لما تحصل على قدر من التعليم اولاتحصل...............(مخيرين ولا مسيرين)

لما تتجوز او يفوتك قطر الجواز ................(مخيرين ولا مسيرين)

لما تحصل على وظيفة عمل حكومى او خاص(بانواعة)..............(مخيرين ولا مسيرين)

لما تبقى صحتك زى الفل(يارب ديما)او تصاب بمرض مزمن(لاقدراللة)............(مخير� �ن ولا مسيرين)

لما تاتى الساعة التى تنتقل فيها(يارب طولة العمر للجميع وحياة حلوةمع المسيح)............(مخيرين ولا مسيرين)

يارب نكون فهمنا الموضوع الحلو بتاع العضو aymonded (http://www.orsozox.com/forums/member.php?u=527) يقصد بية اية

تابع الحتة دى

والسؤال الذي تطرحة علينا (( القسمة والنصيب )) هو :
ما هي مشيئة الله وحدود حرية الإنسان !!!
وما هي علاقة مشيئة الله بالقسمة والنصيب !!!
وكيف يدين الله المسكونة بالعدل ، مع أنه لكل إنسان قسمة ونصيب !!!

[aymonded]

أشكركم على تفاعلكم الإيحابي يا أحباء الله
واتمنى حقيقي حد يجاوب على آخر 3 اسئلة
ويفرق مابين القسمة والنصيب ومشيئة الله الحقيقية في إطار الحرية التي نلناها
النعمة معكم كل حين

[the daughter of the king]

اولا ميرسى يا استاذ ايمن على الموضوع الجميل ده
وانا عن نفسى
اولا
ما هي مشيئة الله وحدود حرية الإنسان !!!
هو المفروض انه مشيئه ربنا حاجه وحريه الانسان حاجه تانيه
يعنى مثلا ربنا عايزنا كويسن ونعمل حاجات تانيه كتير حلوه دى اللى ربنا عايزه
لكن فى ناس كتير مبتعملش كده وبتقتل وتزنى وتششتم وتعمل حاجات تانيه بارادتها هى
تمام

علشان كده ربنا ادانا العقل علشان يوم من كون معاه مش علشان هو عايزنا لا لكن علشان احنا عايزين كده وطبعا هو عايزنا كلنا
بس فى حاجه بقى هقلها فى الاخر اوك

انا شايفه هنا ان الاتنين غير بعض
وما هي علاقة مشيئة الله بالقسمة والنصيب !!!
فى حاجات كتير بتحصل فى حياتنا منقدرش نعمل فيها حاجه وبتكون فعلا قسمتنا ونصينا وبتكون هى مشيئه ربنا زى انه حد يموت حد يعيش
حد يسقط حد ينجح مع انه فى الحالتين بيذاكر برده
وساعتها بيكون فعلا ده اللى ربنا عايزه ودى برده قسمتنا ونصيبنا
وانا بعتبر ان الاتنين واحد
فى بعض الاشياء مش كلها طبعا



وكيف يدين الله المسكونة بالعدل ، مع أنه لكل إنسان قسمة ونصيب !!!

ايه علاقه بقى العدل بالقسمه والنصيب
بص ربنا هيحاسبنا بالعدل ده اساسى
لاننا لينا عقل ونفكر ونقدر نشوف هنتصرف ازاى فى الموضوع ده
يعنى لو واحد قتل مثلا هل دى قسمته ونصيبه لا طبعا لان هنا ربنا مخدوش من ايده ووداه يقتل حاشا طبعا
لكن انا عايزه اقول ان فى حاجات طبعا بتبقى هى دى قسمتنا وملهاش تدخل لالانسان فيها ودى علشان عدل ربنا عمره مهيحسبنا عليها



اتمنى اكون فهمتوا كلامى

اما بقى فى نقطه
طب مالفكره انه ربنا عارف طب سابنا نعمل كده ليه
طب ممكن كانا وقف حد فى حياتنا وخلنا نعمل حاجات صح حاجا ت كويسه
او مثلا لو حد ماتله حد وربنا عارف انه ده شىء هيحزنه جدا ويودى بيه لحاله معينه من الياس والدمار
ليه عمل كده
مش عارف
بس برده بحس انه فى اشياء كتير بتبقى قسمتنا ونصيبا غصب عننا
ممكن تكون مشيئه ربنا فعلا كده
ممكن احنا اللى سببناه معرفش
ممكن وراها هدف تانى
بس برده القسمه والنصيب دىه شىء موجود فعلا

وفى حاجه كمان
صحي ح والمفروض انه حريه الانسان 100% زى محد بيقول
طب مفى عوامل خارجيه بتاثر عليك ياترى كده هتبقى 100% ولا ايه

واتمنى طبعا اسمع رايك يا استاذ ايمن ؟؟؟؟؟؟؟؟

[aymonded]

طبعاً هو فيه خلط بين المفاهيم الأساسية في حياتنا وتحتاج لفهم أصيل لعمل الله ومشكلة الإنسان وتصرفاته ...
لأننا لابد أن نعلم أن الإنسان كفرد ليس مسئولاً عن كل المشاكل التي يواجهها ولكن الإنسان ككل عبر مراحل التاريخ مسئول بالاشتراك مع الآخرين في صنع ما يخالف مشيئة الله ، بسبب الحرية التي له وانه بمحض اختياره الحر اختار الشر ودمار العالم بسبب طموحه وكبرياء قلبه وحبه للسلطان الأرضي والمادة !!!

ولكن مش في حاجة اسمها قسمتنا أو نصيبنا ، لأن معنى الكلمة غير دقيق ، وبالنسبة للموت الإنسان الذي أوجده بفعل العصيان والخروج عن طريق الحياة ، وهذا كان اختيار آدم في البدء ومن بعده كل إنسان وكما نقول في القداس الإلهي : والموت الذي دخل إلى العالم بحسد أبليس ...

طبعاً لأننا انفصلنا عن قوة الحياة أي الله فانفصل الجسد عن نبع الحياة واصبح للعمر أجل قصير بسبب الفساد الذي دخل إليه ، لذلك اتى ربنا يسوع وجدد الخليقة فيه ، وفي مجيئة الثاني سيعطينا جسد مججد لا يموت أو يسود عليه موت على الإطلاق على صورة جسد مجده كما قال القديس بولس الرسول ...

كلنا نحتاج نعود للكتاب المقدس باحثين بتدقيق في العهدين وبخاصة رسائل القديس بولس الرسول لأنها تشرح بدقة عمل الله ومشيئته وسرّ حرية الإنسان واختياره الحرّ ، وان موضوع القسمة والنصيب حجة العقل الذي لا يقدر أن يميز عمل الله ويعرف مشيئتة ، مرتبكاً ما بين علم الله السابق وما بين علمه المحدود وكيف ان الله اتخلى عنه تركه يواجه مصيره وحده ، وتحدث اشياء خارج إرادته ، مع ان العكس هو الصحيح ، فالإنسان هو الذي ترك الله وليس الله هو من ترك الإنسان !!!

فالإنسان اصبح كإنسان مجنون مسك سيف وطعن به نفسه ظناً منه أن هذا هو التعقل ، مع أنه فقد الرجاء والحياة في الله لأنه قد اصابه خلل في الرؤيا لأن عنده حول ، فراي عكس كل شيء وآمن وصدق أفكار الناس مبتعداً عن عمل الله وحركات الروح القدس في القلب ...

عموماً سوف اشرح قريباً جداً موضوع مشيئة الله وحرية الإنسان من خلال الكتاب المقدس وكتابات الآباء .. النعمة معك ومع الجميع آمين

[miro_rook]

مرسي ا/ ايمن علي هذا الموضوع في راي مفيش حاجه اسمها قسمه ونصيب لكن في حاجه اسمها اراده الله مع ارادتي بمعني ممكن ارادتي نكون اني اكون سارق لكن اكيد اراده ربنا الخير ولما اتمسك اقول ده نصيبي لا طبعا ارادتي هي السبب هي (القسمه والنصيب) لان اراده ربنا انا الجميع يخلصون
وكمان سمعت من احد الاباء ان اراده ربنا ممكن تتغير للخير زي ما العدراء طلبت من السيد المسيح لها كل المجد انه يساعد في عرس قانا الجليل لما حلص الخمر راح ربنا قلها مالي ولكي يامراءه لم تاتي ساعتي بعد ورغم كدا غير ارادته وسمع لشفاعه العدراء
مرسي ا/ايمن واسف علي الاطاله

[samerco75]

الحقيقة كل مواضيع حضرتك بتلمس نقط حساسة جدا فى مشاكلنا الحياتية
وطبعا حضرتك لميت الموضوع كله ومش شايف انى اقدر أضيف غير شكرك الكتير على تعب محبتك من أجلنا
الله اعطنا حرية الارادة لاننا على شبهه ومثاله والانسان هو اللى بيقرر مصيره بطرقة سيرة فى طريق الحياة
احياننا اقوله يا رب احرمنى من حرية ارادتى اللى خلتنى بيها ابقى فى اعلى مستويات الخليقة
لكن خلينى ابقى معاك دايما عبد مطيع وابن امين اعمل كل ارادتك بفرح
طموحات الانسان احيانا بتنسيه نفسه والهه ويضيع حياته من غير مايقصد!!!!!!!!!!
اذكرنى فى صلاتك يا استاذ ايمن ربنا ينفعنا ببركاتك

[aymonded]

فرح الله قلوبكم يا أحباء يسوع والقديسين
ووهبنا أن نفهم حدود حريتنا ومعرفة مشيئته في ربنا يسوع المسيح
اقبلوا مني كل تقدير يا أحباء الله المكرمين جداً
النعمة معكم كل حين

[the daughter of the king]

طب كده يعنى مفيش ولا قسمه ولا نصيب فى اى حاجه ولا ايه
وكل حاجه احنا السبب فيها
ولا ايه يا استاذ ايمن
انا منتظره بصراحه التفرقه بين التلا اسئله فعلا
ميرسى لحضرتك كتير والموضوع الجامد ده

[aymonded]

طب كده يعنى مفيش ولا قسمه ولا نصيب فى اى حاجه ولا ايه
وكل حاجه احنا السبب فيها
ولا ايه يا استاذ ايمن
انا منتظره بصراحه التفرقه بين التلا اسئله فعلا
ميرسى لحضرتك كتير والموضوع الجامد ده

سلام لنفسك يا أجمل أخت حلوة
بالطبع مش فيه حاجة اسمها قسمة ونصيب لأن الله لا يضع نصيب للإنسان أو يقسم له طريق حياة لأرغامة على السير فيه ، ولا يخطط أو يدبر لمشكلة للإنسان ، فالحروب مثلاً خطط لها الإنسان بسبب كبرياء قلبه وحب السيطرة وأدت لفقد أفضل شباب الوطن وأثر على المجتمع ككل ، وإرادة الله أن يكون سلام للعالم كله ، ولم يرد أن موت الإنسان وتترمل الأمهات وتفقد أولادها ، فطموح الإنسان وعظمته الباطلة أدت لوضع لم يكن من إرادة الله ، وهذا ليس نصيب ألسرة ولا المقسوم لهم !!!

خطة الله هي خلاص الإنسان وحياته الأبدية ، فكل تدبيرات الله أن الإنسان يحيا ويصير في حالة شركة معه لا تنفك ، وأن يكون له علاقة بأخيه الإنسان ومرتبط معه ارتباط وثيق بالحب ، والحادث اليوم هو عكس إرادة الله ونصيب الإنسان المعين من قِبَل الله ...

فنصيب الإنسان هو مقسوم من لله في حياة أبدية وشركة حلوة مع الله ومع كل أخ له في البشرية ، أما كل سوء هو من صنع الإنسان وحدة ، ولكن الحادث أن السوء بيبقى نتيجة تأتي من محصلة أفعال الإنسان ككل ، لأن ليس كل واحد كفرد وحده هو المسئول عن المشكلة بل المشكلة مترابطة بعدة عوامل أخرى كثيرة سببها الإنسان ككل وليس كمجرد فرد ...

بمعنى أن المجتمع المحيط بالإنسان له مسئولية عن التأثير السلبي ، والمجتمع الأكبر مثل المحيط الدولي أي المجتمع ككل الذي يعيش فيه له دور ، والمجتمع الأكبر يأثر على الأصغر وهكذا ، عموماً هي سلسلة مترابطة وكلها من أفعال الإنسان ونابعه من حريته الشخصية واختياراته الحرة ، عدا كل ما يخص العمل الإلهي مثل الولادة وغيرها من الأمر التي هي خارجالنطاق الإنساني ، لأنه من صميم منظومة الطبيعة التي خلقها الله ووضعها في نظام ثابت وفي دورة دقيقة ...

أرجو أن أكون وضحت الموضوع ببساطة وآسف للتطويل وسوف أجيب عن الأسئلة قريباً بإذن يسوع في موضوع مستقل ؛ النعمة معك

[ايساك]

شكرا ليك على موضوعك يا استاذ ايمن ..بس كلمة قسمة ونصيب بنسمعها اكتر فى حوارات الخطوبة والزواج ..تيجى مثلا تخطب ولمشكلة ما تفكوا الخطوبة تلاقيها بتقولك كل شىء قسمة ونصيب..هههههههههههههه

[aymonded]

شكرا ليك على موضوعك يا استاذ ايمن ..بس كلمة قسمة ونصيب بنسمعها اكتر فى حوارات الخطوبة والزواج ..تيجى مثلا تخطب ولمشكلة ما تفكوا الخطوبة تلاقيها بتقولك كل شىء قسمة ونصيب..هههههههههههههه

ههههههههههههه عندك حق يا جميل
دوة اختراع بشري لتبرير المواقف مش أكتر
حقيقي اشكرك على تعليقك الحلو وردك الواقعي لأننا فعلاً بنسمعها في الخطوبة والجواز
منور المنتدى كله بوجودك الحلو فيه ؛ النعمة معك كل حين