مشكلة طفلة ذكية جدا

[emmmy]

بصوا يا جماعة انا عندى مشكلة طفلة تخصنى قريبتى وعايزة اتكلم معاكم واخد رايكم فى حاجة تخصها لانها تهمنى جدا انا مش عارفة ارد عليها ولا مامتها كمان

الطفلة اولا عمرها 4 سنين بس عقلها وذكائها اكبر من كدة بكتير
الطفلة دى كانت بتحب جدها اوى ومرتبطة بية لانة كان بيلعب معاها ويحبها ومن حوالى سنة مات الجد دة ولما سالت عنة فين جدوا قالوا لها راح السماء عن بابا يسوع والملايكة يا حبيبتى لكنها مقتنعتشى وزعلت من بابا يسوع لانة اخد منها جدوا اللى هى بتحبة وبدات اسئلتها الكتيرة اوى اللى مبتخلصتشى ابدا
لية بابا يسوع اخد جدو انا بحبة انا مش بحب بابا يسوع علشان اخد منى جدوا
طيب هو هيجى تانى
هو انا هروح عندة
وانتى ياماما هتيجى معايا انتى وبابا ولاهروح لوحدى
طيب هو انتوا ممكن تروحوا عند بابا يسوع وتسبونى لوحدى
انا مش عايزة اروح هناك انا مش بحب بابا يسوع
لو انا قلت لبابا يسوع خلى جدوا يجى تانى هيسمعنى ويعملى اللى انا عاوزاة
رد الام : لا يا حببتى
الطفلة :لية مش انتى بتقولى ان بابا يسوع بيحبنى
رد الام : ايوة يا حبيبتى طبعا بس جدوا مبسوط هناك وفرحان مع بابا يسوع والعدرا والقديسين والملايكة الحلوة واحنا لما هنروح هناك هنكون معاة وهنكون فرحانين ومش هنحب اننا نيجى تانى هنا لان هناك احسن بكتير
رد الطفلة : لا مش عايزة انا بخاف منة بخاف من بابا يسوع ومش بحبة ماما يعنى اية موت انتى قلتلى جدوا راح عند بابا يسوع وعمتو قالتلى جدوا مات يعنى اية مات يا ماما مات ازاى ؟؟؟

وكلام كتير واسئلة صعبة وعجز امام ذكاء طفلة رهيب لانها مش مستوعبة يعنى اية سماء وحياة مع ربنا يعنى موت


وفى مشكلة تانية الطفلة دى كانت مش بتخاف خالص وكانت مقتنعة تماما ان بابا يسوع معاها ومصدقة دة ومومنة بية بشكل عجيب لكن دلوقتى لا بقت بتخاف من اقل حاجة وكل حاجة لدرجة مبالغ فيها لانها فقدت ثقتها فى بابا يسوع والاحساس بالامان واللى زود الموقف تعقيد وتعقيد اكتر انها شافت فيلم القديسة مارينا الشهيدة ومنظر الشيطان اللى ظهر لها اترعبت وزادت اسئلتها واحلامها
طبعا انا عارفة انة غلط الظفلة تشوف افلام استشهاد اصلا فمبالك من منظر زى ظهور الشيطان بابشع صورة امام طفلة بريئة بس للاسف دة اللى حصل ومن غير قصد او وعى من الام صدقونى الام حريصة اد ما تقدر بس فى حاجات بتبقى غصب ومش معمول حسابها

معلش انا طولت عليكم بس عايزة الصورة تكون واضحة علشان لما اسمع ارائكم ونصائحكم وخبراتكم تكونوا فاهمين المطلوب وسبب الكلام
ارجوا منكم المساعدة والنقاش وانا هبلغ كل كلامكم للام دى
وربنا يعوضكم ويبارك حياتكم

[emmmy]

ياريت يا جماعة رجاء محبة محتاجة مشاركتكم
وخبراتكم وارائكم وعلى فكرة انا عارفة انة غلط انة يتقال لطفل فقد عزيز علية بابا يسوع اخدة او راح عند بابا يسوع بس دة اللى حصل وخلاص بقى انا اللى حل للمشكلة ونقول اية دلوقتى للطفلة دى انا قلت كل اللى اقدر علية بس بردوا مش مكفى وعلشان كدة لجاتلكم ساعدونى بقى ارجوكم وربنا يعوضكم

[aymonded]

سلام بمحبة لشخصك الحلو يا محبوبة ربنا يسوع والقديسين
المشكلة دائماً ما تأتي من الأسرة لأنهم لا يمهدوا للطفل موت الأحباء وهم في ضعف المرض مع يقينهم أنه سيرحل في اي وقت ، لأن لابد من أن الطفل يعي بهدوء معنى الفراق ، فالأول يتم التمهيد بالسفر والفراق لفترات طويلة ، ثم الرحيل عن العالم في سفر نحو السماء لأن لكل إنسان فترة يعيش فيها ثم يرحل إلى السماء في الهدوء وعدم الأوجاع ...

وبالطبع من الخطورة الشديدة يرى الطفل الأفلام المرعبة ويسمع عن الشيطان وقصص الذبح والقتل لأن هذا يسبب خلل في حياته الطبيعية ويؤثر على نموه الطبيعي ويصيبه بالأكتآب والحزن القاتل للنفس وعدم الثقة في كل من حوله وعلى الأخص الله إذ يشعر أنه قاسي جداً لأنه يأخذ منه الأحباء ...

المشكلة الآن معقدة جداً وفي هذه الحالة يفقد الطفل ثقته في كل من حوله ، لأن الكل صور له الله كأنه إله قاسي مرعب ، والأفلام تدعم نفس الفكرة عند الطفل ، وإعادة الثقة ليست سهلة أبداً !!!
والمشكلة عموماً تتلخص في الأهل نفسهم ، فلابد من أن يكون لهم مبدأ أن يمنعوا كل الأفلام المرعبة والتي فيها شياطين وأي قصة تثير القلق عند الطفل أو الموت ، فممكن أن تستبدل كلمة الموت بالانتقال من عالم الأوجاع إلى عالم الأفراح ...

بمعنى أن نوضح للطفل أن جدو كان مريض قوي وتعبان ونظهر حالة تعبه الشديدة ، ونوضح أن أنتقاله من هذا العالم وجسده التعبان والمتألم ، قد تبدل فخلع الجسد كما نخلع الثوب القديم ونلبس جسد جديد مش نقدر نشوفه إلا لما تيجي ساعة أو الوقت لما نكبر ونبقى عواجيز ونخلع جسدنا احنا كمان ونلبس جسد جديد حلو نوراني ونشوف يسوع وجدو معاه فرحان ...

وممكن نقول للطفل أنه لما يتذكر جدو - ونحكي له عن جده - بكده هانلاقيه معانا في فكرنا ومش نفارقه ابداً ونفتكر يسوع معاه ، والموضوع يحتاج الجهد الشديد من الأب والأم حتى يقدروا أن يعيدوا الثقة في الطفلة مرة تانية مع الحكايات والأمثال الحلوة عن الزهور والنباتات والجمال ، وإظهار القصص الجميلة من الكتاب المقدس اللي كلها أفراح ومسرة ، ونحاول أن نختار القصص الحلوة من القديسين وبلاش الأفلام اللي فيها صلب وموت وجروح ودم وشياطين ...

أرجو أن أكون بإيجاز ذكرت النقاط المهمة جداً ، مع العلم أن هذا الموضوع لن تنجحوا فيه في يوم وليلة لأن الساعة الواحدة التي تصيب الطفل بالقلق يبقى أمامها شهور وأيام طويلة جداً لتصحيحها ؛ النعمة معك يا محبوبة يسوع والقديسين

[ماروجيرافك]

اشكرك حقيقي لطرحك هذه المشكله لانها بجد بتواجه ناس كتير ومش لازم يكون الطفل ذكي او لا
وبجد اشكرك يا استاذ ايمن لردك الرائع الي استفد منه كتير
الرب يعطينا روح الحكمه

[ادروسيس]

صدقنى ان مشكلة المشاكل هو الذكاء الزائد عند الاطفال
هو مبقاش فى اطفال صدقنى دلوقتى
اعتقدانه مامتهاتقولها ان الارض احنا بنعيش فترة
ولما بنكبربنروح السماء وتفهمها ان السماءمكان حلو جميل
ان انسان يتمنى يعيش فيها وان القديسين تعبوا كتير علشان
يروحوا السماء وتحاول تشغلها تخرج تلعب المهم متقعدش
لوحدهاومع الوقت هاتنسى
انا عارفة انى مقدرتش اوصل المعلوم بس على اد فهمى
ميرسى ايمى ياجميلة على الموضوع الجميل دة

[aymonded]

عموماً يا أحبائي الطفل عنده فضول بطبعه وحينما يتعلَّق بأحد يصبح عنده كل شيء في حياته وغير قادر أن يستوعب البعد عنه ، والمفروض اننا نحبب الأطفال في الكل سواسية لكي لا يتعلَّق بشخص معين ، لأني أرى أن هذه الطفله يشبعها جدها بالحنان التي تحتاجه ، لأنها دائماً ما تحتاج الصبر ومن يلعب معها باهتمام ويحكي لها ويؤانسها ، فتشعر أنها مقربه منه ، وعلى الأسرة أن تجتمع معاً في لقاء مثمر بالمحبة مع تخصيص وقت لكل شيء ، للصلاة بمحبة واستمرارية والتزام يومي مع القداس على الأقل مرة كل اسبوعين ، واللعب معها وتذكر الحكايت الحلوة أو القاء حكايات كلها أمثال حلوة وتعليم رقيق للطفلة بهدوء ، والفسح معها ولو مرة في الشهر ، وهذا ضروري جداً ولا غنى عنه تحت أي ظروف ...

وأية مشكلة تظهر في حياة الطفل دائماً ما نكون السبب فيها كأهل وبخاصة الأبوين ، والمشكلة أن الأهل يغفلوا أشياء يظنوها أنها طبيعية وبديهية مع أنها تكون صعبة عند الأطفال جداً ، لأن مشكلة الموت والشيطان والعنف والحرب والاضطهاد والقسوة والكذب وغيرها من الأشياء السلبية لا يقدر أن يستوعبها الطفل ويظل يسأل : ليه وأيه السبب !!! ؛ ولا يجد إجابة لفضوله أو يجد سبب مقنع بسبب أنه لم تكتمل خبرته في الحياة ولم يواجه هذه الأمور بعد ، بل هي أول علاقة له بها !!!

فينبغي أن نراعي كيف نقدم كل شيء بمعرفة وهدوء وببساطة وايه الوسيلة في إطار علاقة محبتنا لله من خلال كلمة الله في حلاوة الشركة المقدسة التي تنعكس بدورها على شركة الأسرة المسيحية الحقيقية ...

كل سنة وانتم طيبين
النعمة معكم كل حين آمين

[emmmy]

شكرا للاستاذ ايمن - وماريو - وادروسيس
على محبتكم وردودكم
على فكرة يا استاذ ايمن كل اللى انت قلتة دة انا موافقة علية وقلتة زيك تمام للام
ولكن فعلا جرح ساعة ميدوهوش ساعة محتاج كتير المشكلة ان الطفلة رافضة التفاهم رافضة تسمع اى حاجة عن ربنا
الغريب ان البيت فية اطفال تانى كتير ومع ذلك مفيش حد منهم عمل زيها كدة كلهم نسيوا وعادى بالنسبة لهم
اما بالنسبة للافلام فدى حصلت غصب والام ماخدتشى بالها الا بعد رد فعل الطفلة من الفليم
هو طبعا اكيد هى هتاخد بالها بعد كدة لكن فى دلوقتى وفى صدمتها دلوقتى
وبعدين حتة انى انا امهد للطفل معنى الفراق والسفر دى صعبة اوى -- هتسال ازاى ولية وفين واسئلة كتير
وهى فعلا بتسال ولما بيحاول الاب والام الشرح قد ما يقدروا بتقولهم عايزة اروحلة
والجديد فى كلامك هقولة للام انها تحاول تشغلها بالصور واللعب والقصص المفرحة


شكرا يا استاذ ايمن

شكرا يا ماريو على مشاركتك وشكرا يا ادروسيس على كلامك وانا هوصلة بردوا

[emmmy]

عموماً يا أحبائي الطفل عنده فضول بطبعه وحينما يتعلَّق بأحد يصبح عنده كل شيء في حياته وغير قادر أن يستوعب البعد عنه ، والمفروض اننا نحبب الأطفال في الكل سواسية لكي لا يتعلَّق بشخص معين ، لأني أرى أن هذه الطفله يشبعها جدها بالحنان التي تحتاجه ، لأنها دائماً ما تحتاج الصبر ومن يلعب معها باهتمام ويحكي لها ويؤانسها ، فتشعر أنها مقربه منه ، وعلى الأسرة أن تجتمع معاً في لقاء مثمر بالمحبة مع تخصيص وقت لكل شيء ، للصلاة بمحبة واستمرارية والتزام يومي مع القداس على الأقل مرة كل اسبوعين ، واللعب معها وتذكر الحكايت الحلوة أو القاء حكايات كلها أمثال حلوة وتعليم رقيق للطفلة بهدوء ، والفسح معها ولو مرة في الشهر ، وهذا ضروري جداً ولا غنى عنه تحت أي ظروف ...

وأية مشكلة تظهر في حياة الطفل دائماً ما نكون السبب فيها كأهل وبخاصة الأبوين ، والمشكلة أن الأهل يغفلوا أشياء يظنوها أنها طبيعية وبديهية مع أنها تكون صعبة عند الأطفال جداً ، لأن مشكلة الموت والشيطان والعنف والحرب والاضطهاد والقسوة والكذب وغيرها من الأشياء السلبية لا يقدر أن يستوعبها الطفل ويظل يسأل : ليه وأيه السبب !!! ؛ ولا يجد إجابة لفضوله أو يجد سبب مقنع بسبب أنه لم تكتمل خبرته في الحياة ولم يواجه هذه الأمور بعد ، بل هي أول علاقة له بها !!!

فينبغي أن نراعي كيف نقدم كل شيء بمعرفة وهدوء وببساطة وايه الوسيلة في إطار علاقة محبتنا لله من خلال كلمة الله في حلاوة الشركة المقدسة التي تنعكس بدورها على شركة الأسرة المسيحية الحقيقية ...

كل سنة وانتم طيبين
النعمة معكم كل حين آمين





صح تمام عندك حق انا موافقة كلة كلمة قلتها مين بقى يسمع الكلام دة
بيكون صعب وخصوصا للاب والام ذو الخبرات المحدودة او اللى مش فاهمين يعنى اية مشاعر طفل
انا بستغرب من ناس كتير بتكون مش فاهمة بجد يعنى مشاعر طفل
وبيكون صعب اكتر للام اللى عايشة فى بيت عيلة لان كل واحدالعم والعمة والتية والجدوا وبابا وماما والله اعلم مين تانى كل واحد براى وتعليم ووجهة نظر للامور والطفل اللى بيتوة ويحتار فى الوسط للاسف

[aymonded]

صح يا أجمل إيمي ، الموضوع محتاج توعية كاملة ، بس عموما مش هانضع الحلول المستحيل تنفيذها ، ولكن بقدر الإمكان ينبغي أن نطبق بهدوء ما يتناسب معنا في الجو المحيط بنا ...

وأنا طبعاً قصدي أن الأم والأب بيهيئوا الطفل بموضوع السفر ، بمعنى أنا لما الجد أو الأحباء عايشين لسه أو العم وغيره ، نبعد الطفل حبه أو ننتهز فرصة حد محبوب مسافر ونُظهر للطفل أن هناك ظروف في الحياة تبعدنا عن بعض ولكنا الشخص الغائب يظل في قلوبنا ونذكره في صلواتنا ونتذكر كلامه معنا لأنه عايش في قلوبنا وبنحبه ، ونوضح بعض الأسباب البسيطة اللي بتخلي أقرب المحبين يسافروا ويتركونا مع أنهم بيحبونا جداً ، وبعدين نظهر للطفل الناس اللي انتقلوا بفرح ولبسوا توب جديد مزركش كله ألوان حلوة جميلة ورقيقة وناخده نفرجة على حدائق حلوة واشكال ملونة وجميلة ومش نلبس اسود قدامة ونضعه في مكان الناس بتصوت فيه ، لأن التسائُل الثاني هايكون ، لما جدو راح مكان حلو ومكان للراحة ولبس توب حلو جميل الناس بتلبس اسود ليه وبتصوت وتصرخ وبابا بيعيط ليه وانت يا ماما بتعيطي ليه وزعلانه ، ده كفيل أنه يرعبها ومش تصدق الكلام ، وتزعل اكتر لأن بابا يسوع اللي اخد جدو زعل بابا أو ماما أو زعل كل الناس دول ، لأن الطفل بيعكس الجو اللي حوله ، وبيستشف كل حاجة بتحصل حوله وبيستنتج منها مهما ما حولنا نخبي ، لأنه بيلقط مشاعرنا بسرعة جداً ، لأن قلبه كالمرآة النقية تعكس كل شيء وبسرعة وبخاصة أن كان طفل بطبعه مفكر في كل ما هو حوله !!!

وللأسف كثيراً ما نكتب في العزاء : " لي اشتهاء أن أنطلق وأكون مع المسيح ذاك أفضل جداً " ونلحق الكلام في آخرة قائلين : ((( راجين أن لا يصيبكم مكروه في عزيز لديكم ))) هذا التناقض يضع الطفل في حيرة ويصور له الإله القاسي الذي يعذب الناس ويخطف منهم محبيهم !!!

ثقافتنا المصرية تحتاج أن تتغير وتصبح روحية ذات رؤية إيمان حي بالله الحاضر معنا ...
أشكرك حقيقي على هذا الموضوع المهم للغاية لنلتفت جميعاً لحياتنا ونوجه أولادنا نحو الخير العظيم الذي للحياة الأبدية ؛ النعمة معك يا محبوبة يسوع والقديسين

[emmmy]

انا اللى اشكرك حقيقى من اعماق قلبى يا اروع اخ واستاذ
وكلامك اد اية جميل وانا هوصلة للام صدقنى هى مستنية ردى بفارغ الصبر
بس فى حاجة موضوع لبس الاسود والدموع والزعل والصويت دة نعمل فية اية دة كمان
دا فى ناس بتصوت فى الميت مجاملة لاصحاب الميت تصور
لا دى بقى صعبة اوى يا استاذ ايمن وبتكون غصب وفعلا عندك حق بتاثر على الاطفال بشكل كبير وخطير ولكن مش بايدنا خالص ومتقدرشى الام والتيتة تلبس الوان ولا حتى فترة قليلة لو فرضنا وقلنا بلاش تتطول بيبقى راجع لتقاليد وكلام الناس مش بايدنا بجد كلامك دة جميل ولكن تنفيذة مستحيل
انت فاكرهم تاسونى انجيل زوجة ابونا بيشوى كامل دى معلش اللى تلبس ابيض لما زوجها سافر على السما مش احنا

مرسى ليك كتير دايما تعباك باسئلتى ربنا يبارك حياتك ويعوض تعب محبتك

[zaza2006]

بصراحة يا ايمى مشكلة صعبة وكتير بيتعرض ليها
ومفيش رد بعد رد استاذ ايمن لازم الام تحاول
تشغل البنت باللعب وقصص وحكايات جميلة
تفرحها وتشغلها شوية عن الاسئلة
ربنا يديكم حكمة انكم تقنعوها وابقى طمنينا عليها

[emmmy]

مرسى يا نهى حبيبتى جدا على كلامك
وانا هحاول اعمل بية وحاضر هطمنك عليها واقولكم الاخبار
عنها اول باول ونتيجة ارشادتكم ومحبتكم

ربنا يخليكى يا قمر

[aymonded]

ههههههههههههههه ؛ مش قصدي احط العقدة في المنشار
أنا عارف صعوبة الموضوع ، بس على الأقل يبعدوا الأطفال عن الجو الكئيب ده لأن فعلاً شوفت أطفال دخلوا في حالة انهيار عصبي ولا زالوا تحت العلاج إلى الآن ، وربنا يعين الكل ويغير ثقافة الفكر المصري العقيم ، وحقيقي أنا عاذر الأم جداً لأن الوضع ده صعب تغييره فعلاً ، العقدة كده بقت في منشار كرتون هههههههههه ، وربنا يعين كل أسرة يا رب ....

النعمة معك يا أجمل إيمي محبوبة ربنا يسوع والقديسين

[emmmy]

ههههههههههه عندك حق
بس يعنى اية العقدة فى منشار كرتون دى كمان

بس هو بجد الموضوع ممكن يوصل لانهيار عصبى وعلاج
يا خبر ابيض صعب اوى مش واسعة شوية دى يا استاذ ايمن
ربنا يتمجد بقى ونتغير وتتغير مفاهمنا للاحسن ويكون عندنا وعى وثقافة
شوية علشان خاطر اولادنا حتى واطفالنا ربنا موجود

مرسى بجد ليك كتير لسانى عاجز عن الشكر

[elphilasouf]

مشكله فعلا ... بس كويس ادينا استفدنا :)
ربنا معاكوا يا ايمى وانشالله الموضو يتحل ويتحول لللخير :)

[aymonded]

ههههههههههه عندك حق
بس يعنى اية العقدة فى منشار كرتون دى كمان
(( هههههههههه قصدي يعني اصور صعوبة المشكلة
يعني المنشار بقى كرتون هايُثنى ومش نافع خالص ))

بس هو بجد الموضوع ممكن يوصل لانهيار عصبى وعلاج
يا خبر ابيض صعب اوى مش واسعة شوية دى يا استاذ ايمن
(( لأ صدقيني مش صعب ولا مبالغة مني ؛ لأن في حالات شوفتها لما كنت مسئول عن حضانة زمان واعرف أطفال - مش كتير طبعاً حالات قليلة جداً ، وتعتبر نادرة - لما ماتت أمهم وسمعوا الصويت والعويل انهاروا تماماً ودخلوا في غيبوية وكانت انهيار عصبي شديد جداً ))
ربنا يتمجد بقى ونتغير وتتغير مفاهمنا للاحسن ويكون عندنا وعى وثقافة
شوية علشان خاطر اولادنا حتى واطفالنا ربنا موجود

مرسى بجد ليك كتير لسانى عاجز عن الشكر


ومرسي ليكي كتير على ثقتك في المنتدى وبحثك الجاد عن حلول
وربنا يتمجد ، وكل شيء بالهدوء مع الصبر بيتحل
وربنا يمد يده بشفاعة أمنا المحبوبة عذراء الدهور
النعمة معك يا محبوبة يسوع والقديسين

[magdy totti]

اروح اناا فين وااقول ااية ياا ايمى
المشااركاات كلهاا جميلة وااقترااحات راائعة
مفيش فى ايدى غير الصلاة
وربناا يدبر ويحل المشكلة دى

[emmmy]

مرسى يا استاذ ايمن بجد ربنا يخليك
انا فعلا بحب المنتدى جدا وبثق فى اخواتى وخبراتهم وبحب
مشاركتهم وكلامهم


مرسى يا مجدى كتير اوى على محبتك ومشاركتك وياريت
متنساش وعدك بالصلاة دى فى حد ذاتها سلاح جبارذو حدين
ارجوك صلى من اجلها ومن اجلى انا كمان
ربنا يباركك ويعوض محبتك

[dr mina]

تأثرت كثيرا بما رويتيه عن طفلتنا الصغيرة و قد فكرت كثيرا قبل أن أكتب و قرأت و تأملت رد أخينا الاكبر الاستاذ ايمن , نعم هى مشكلة بحق كون اصطدام الطفلة بواقع هو الموت , بكل ما يحمله من معنى الكلمة , الأمر برمته نابع من رد فعل قبل أن يكون استيعابا للموقف
صعب جدا على طفل يرى أناسا ترتدى سوادا و تنوح على من رحل و نحاول ان نهون على طفل صغير , يتناقض واقعه مع ما يسمعه . و قد اختلف مع ما قيل بان الحزن والبكاء قد ينبع من القلب أحيانا ولكن لا يجب أن يتعمق فى مظاهرنا من لبس وصويت , لذا يا عزيزتى سادخل فى صلب الموضوع تماما بعد ان فكرت مليا :
1 لابد من إخراج الطفلة من الجو النفسى المشحون المتواجدة فيه , من ألعابا وصورا و هدايا مفرحة
الطفل بطبيعة الحال يهتم بحاضره أكثر من ماضيه أو مستقبله , هو لا ينسى ماضيه ولكن قد يتناساه بسبب حاضره
2 فيما يخص أين ذهب الجد ؟؟؟؟؟ لقد حاول الأباء كثيرا اخفاء الحقيقة عن الابنة رغم انه كان متاحا ان يخبروها بما حدث , و ستتعجبى أن الطفل استيعابه لما يقال له يتأثر بما حوله , بمعنى كان من الاسهل على الاب والام القول كما ذكرتم ان جدو كان مريضا وقد تعب كثيرا , ومثله مثل اى شخص فينا او مثل العصفور الذى تريه يعيش فترة هنا ويذهب لمكان لا يستطيع ان يعود منه . الطفل قد لا يفهم فكرة السماء ولكنه سيفهم فكرة الانتظار , نعم ستتعجبى مما اقول الصدمة النفسية الحالية التى قد تحدث افضل بكثير من وهم يعيشه الطفل ليكتشف بعده انه سرابا , وان جدو لن يعود من السفر كما قالوا له , احد كبار السن قال لى يوما : لم اكن افهم فكرة الموت مطلقا حين ماتت امى , وكنت حينها احب البابا كيرلس جدا وكان قد تنيح قريبا , وكنت أتساءل لماذا يخطف الموت أناسا أبرياء وغير متعبين , مثل أمى , فأخذنى أبى إلى مزاره و تركنى هناك وقال لى : صلى هنا هو هيسمعك بس مش هيرد غير لما تغمض عينيك اوى وتحاول تسمعه , لم اصدق كلامه حينها و لكنى احترمت المكان فجلست اصلى و بعد وقت احسست فعلا بانى سامع لصوته , هذا ما حدث يا اصدقائى صدمة قوية قد تكون شافية , لتأخذ الام ابنتها الى الكاتدرائية مثلا فى مزار ابينا مرقس الرسولى وليدور نفس الحوار
3 مهم جدا ان تتحول الذكرى وتبتعد قليلا عنها , كنوع من التغيير الواقعى للمكان ,تروح عند خالتها او احد اقربائها , مع اطفال فى مثل سنها , حينها لن تجد من تساله و ستلهو مع من هم فى مثل سنها

أخيرا أشكرك لطرحك الموضوع و قد نختلف فى سبيل المعالجة لكن فى رأيى أن ما تبنيه السنون من اعتقادات تدفعنا لان نكذب على طفلنا بخصوص الحقيقة الوحيدة فى حياتنا , و بخصوص الاستيعاب هو نفس السبب الذى يدعونا لان نكذب عليه , لنصارح طفلنا و يجعله يفهم من خلال سيرالقديسين و من خلال مزارات ابائنا المتنيحين ليقدر ماهية الموت , ولا تقلقوا فهذه الذكرى لن تؤثر كثيرا على طفل صغير مثلما يكتشفها وهو فى مرحلة اكبر من عمره بعد سنوات قليلة و بعد ان يكتشف ان اباه وامه كذبا عليه , نعم هما من يطالبانه بالا يكذب وأن يقول الصدق دوما
الرب يكون مع الجميع ويسكن الجد المتنقل فى حضن ابينا ابراهيم واسحق ويعقوب و يصلى من اجلنا لكى نبلغ المسيح الرب فى حياة ابدية لكى نطلب بحق مع ابينا بولس ( لى اشتهاء ان انطلق واكون مع المسيح فذاك افضل جدا )

[aymonded]

أجدت يا دكتور في الشرح وتفصيل الموضوع لأنه هام جداً
وأنا مش قصدي أنهم يقولوا للطفلة طبعاً أن الجد مسافر لأن هذا سيعقد الأمر جداً ، أنا قصدي أن لازم يفهم الطفل موضوع الفراق ومعناه على مستواه الشخصي في الحياة عموماً ، ثم يتم التمهيد لموضوع الانتقال من عالم لعالم آخر كما شرحت بإيجاز ووضوح في هذا الموضوع ، وبالطبع السواد وفزع الصوت العالي والكآبة هي التي في اعتقادي اثرت على الطفلة وصدمتها جداً وستظل في ذاكرتها فترة قد تطول أو تقصر حسب معالجة الأبوين لهذا الأمر الصعب ، وللأسف كثير من الآباء لا يمهدوا هذه الأمور للأطفال ، لأن فرق كبير بين الواقع الذي يجبرنا على أن نعالج الأمور بواقعية وبين الخيال الخاطئ الذي نضعه للطفل لكي ما نهرب من الموقف ، حتى أنه فيما بعد تنعدم ثقته في كلام الوالدين ....

عموماً لن أعيد الموضوع مرة أخرى ، بس حقيقي أشكرك لأنك وضحت كل جوانب الأمور في صورة عملية وباختصار شديد ، وتحتاج فعلاً لصبر ومجهود وبذل من الأبوين مع مواجهة الأمور بواقعية وهدوء ...

أقبل مني كل حب وتقدير لشخصك الجميل يا اروع أخ غالي محبوب ربنا يسوع والقديسين ؛ النعمة معك كل حين

[ابرام صموئيل]

لاتخافوا ذكرت فى الكتاب المقدس 365 مرة بعدد ايام السنة و لعلاج اى مشكلة نحتاج صلاة فعالة +تفكير ايجابى لحل المشكلة+ تناول باستمرار+ ثقة فى يسوع بلا حدود+مرشد نفسى فى المشاكل التى بها رابط نفسى.للاسف يتحدث كثير من الناس عن المشكلة و يبدو اننا لم نتذكر رحمة الله

[emmmy]

مرسى لمشاركتك يا ابرام وكلامك
ربنا يباركك