لا للشبكة .. كفاية دبلتين وخاتم

[zaza2006]

http://files.arabchurch.com/upload/images2010/476300496.jpg (http://www.arabchurch.com/upload)


لا للشبكة .. كفاية دبلتين وخاتم



لا للشبكة

مع ارتفاع أسعار الذهب، وغلو تكاليف الزواج وتعنت أهالي العروس، أصبح الشباب الآن في ورطة، حيث لا يستطيعون مجاراة أهل العروس في مطالباتهم المادية، مما ينتج عنه عزوفهم عن فكرة الارتباط وتأخر سن الزواج عند الفتاة.

وفي محاولة جادة من شباب الفيس بوك عبر الموقع التواصل الاجتماعي الأول، قام شاب بجامعة عين شمس، بإرسال صرخة لكل الأهالي الذين يفسدون فرحة أبنائهم، لمجرد الحصول علي شبكة غالية الثمن لا تمثل لهم شيئا سوى المنظرة أمام أفراد عائلتهم، ليؤسس جروبا تحت عنوان ” لا للشبكة .. كفاية دبلتين وخاتم”.

يمكنك كتابة رأيك الشخصي حول موضوع الشبكة، وما هو الحل الأمثل لتفادي تلك المشكلة مع الأهل، وتوضح أن الشبكة الباهظة الثمن ليست شرطا أن تدل على مدى حب الشاب للفتاة، ولا هي الضامن الوحيد لنجاح الزيجة، فكم من حالات زواج فشلت رغم شراء شبكة غالية الثمن.


وفى هذا الموضوع نستقبل تعليقاتكم حول هذه الفكرة ,, من يؤيدها ومن يعارضها ؟؟

فى انتظار آرائكم فى هذا الموضوع .. مناقشة: لا للشبكة .. كفاية دبلتين وخاتم

منقوووووووووووووووول

[magdy totti]

موضوع جميل يانهى
انتى عارفه يانهى انه حتى بعد ما يجيب الشبكة بعد الفرح علطول بيبعها علطول لانه ببساطة بيبقى العريس داخل مد يون وبيبعها علشان يسد الديوان الللى عليه

كنت سالت قبل كده واحد لابتطلبى شبكة غالية
قالت علشان احس بقمتى عنده وغلوة الشبكة من غلاوتى
طبعا لاتعليق

اما بقى لموضوع الشبكة نفسه
هايجى الوقت اللى مغيش حد هايتجوز خالص او ممكن يحصل مشاكل
الواحد مش عارف اخرتها اية
بس الدنيا عليها السلام

[marmargogo]

طبعا هو مش بغلو ثمن الشبكة لان ممكن بدبلتين الاتنين يكونوا سعداء احسن مايجبلها شبكة غالية وماتبقاش سعيدة وكمان على راى مجدى ماهو بعد مايتجوز ممكن يبعها يبقى اية لزمة التعنت دة وبعدين الشبكة دى كدة كدة هترجع للعريس يبقى اية لزمة تعنت الاهالى يبقى يسيبوا هو اللى يحدد اية اللى يقدر علية المهم سعادة الاتنين

[فرح®]

ميرسي نهى على الموضوع المهم جداااااااااااااا
بس المشكلة الرئيسية حسب وجهة نظري ....أين العريس المناسب ؟؟؟
يا جماعة المهر لا يهم ابداااااااااااااااااااااا اااا المهم الشخص بس للآسف شباب هالأيام موش مسؤولين حتى على وعودهم و كلامهم طبعا اكيد موش الكل بنسبة 99% :)

[كيرو رافت]

يا جماعه القصه كلها فى الاهل
لما بيكون فيه اتنين بيحبوا بعض بجد
هاتلاقيهم لا يهتموا لا بذهب ولا فضه الاهم عندهم انهم يكونوا مع بعض
وكلام الافلام بقا نبنى بيتنا طوبه طوبه وعش العصفورة يسعنا
وكلاااااااااااام كتير من ده
ناسيين ان ليهم اهل هما اللى بيتحكموا فى امور حياتهم الاداريه
مالهومش دعوه بحياتهم ومشاعرهم العاطفيه
فاكرين انهم كدا بيأمنوا مستقبل بناتهم
انما لو كل والد او والده بنت حطت نفسها مكان ابو العريس اكيد الاوضاع هاتتغير
والنظرة نفسها هاتتغير
صدقونى الحياه الزوجيه نجاحها لا يتوقف على الذهب وقيمته انما على الحب والتفاهم
ووجود ربنا فى وسطهم
يا ريت بجد الحمله دى يكون لها مردود عملى لانه بجد بيصعب عليا الشباب
فى وقتنا الحالى وظروف البلد السيئه
ربنا قادر انه يتدخل ويدبر امور كل شاب وكل فتاه

[elphilasouf]

حلوه الفكره دي فعلا ....

أعتقد ان فكره شراء الذهب والشبكه من الأصل ... بخلاف الزينه والمنظره ، هي وجود شئ ثمين لوقت عوزه .
ودي تبقي حاجات زيادة كده للمستريحين مالياً ، متنفعش اليومين دول .
وبعدين أصبح في بنوك ودفاتر توفير أحسن واوفر من الشبكه والدهب .

لكن لو ظروف الشاب كويسه بس علي اده ليه نحمله مصاريف زياده ومبالغ كبيره اصلا , مدام ممكن تنفعه بعد كده يشتري حاجه أهم ..

أعبال كده يارب ماشوف كل بنت وكل شاب ( وبزات بنات المنتدي الى عملين لينا صداع ) بيكونوا كنيسة مقدسة صغيره من جديد ... :)

[zaza2006]

شكرا لكل الاعضاء اللى رديت على الموضوع
بس انا معاكم ان الزمن اللى احنا فيه بقى صعب جدا
والمفروض ان الاهل تقدر حاجة زى دى
فى اهالى بتتمسك بموضوع الشبكة جدا
وبتخليه شرط لاتمام الجواز بس مش ده المهم
اهم حاجة الحب والتفاهم بين البنت والولد
وفى انتظار اراء باقى الاعضاء

[emmmy]

موضوعك لذيذ يا نهى
ومهم الى حد الما
بصى هو فعلا زى ما قال رافت المشكلة فى الاهل
البنت لما بتحب شاب مش بتفكر فى دهب ولا غيرة وبتبقى عايشة احلام جميلة مش بتفوق منها الا على صراخات والاهل ونداءهم ومطالبهم
والمظاهر قدام الناس والتفيكر الغريب
البنت قيمتها من قيمة الشبكة

انا رايئ لو الشاب يقدر يجيب شبكة كويسة يبقى خلاص ياريت وتبقى هدية معبرة عن الحب منة لخيبتة لكن مش يقدر وجاب كل حاجة وفاضل البكة يبقى مفيش داعى للتزمت والاهل لازم يتفاهموا الامر ويراعوا مشاعر ابنائم

[ريم الخوري]

بتصور هادي شكليات..........الاهل بيقدرو يتركوا حرية الاختيار لشبكة الهم هما التنين (العريس والعروس) وهم على قد مصرياتهم بيجببوا ...انشالة دبلة .حرينننننننن...... خاصة لو بيحبوا بعض
از معة وما رح يدايق علية ليش لا .......بس از ما معة وهو شب كويس والبنت عاوزة ترتبط بيه ليش لنتقل ونشلبك الموضوع كرمال شكليات شيءلزوم الشيء .......... نسير المركب احسنننننننننننننننننننننن الاهل الواعية ما بتدقق للشكليات بسسسسس بتهتم بالجوهر لانة هو الدهب الحقيقي
الرب يقويكي

[miro_rook]

بصراحه يا جماعه الموضوع ده
غريب والواحد مش يقدر بجزم فيه
لان اهل البنت لو مطلبوش شبكه واكتفوا بدبلتين
فهما بيحسوا ان بنتهم كدا مش غاليه في عين العريس عشان كدا
بيخافوا

اما وجه نظري انا بصراحه ان اهل البنت مش يضغطوا علي العريس ويكتفوا بدبلتين مؤقتا مع وعد من الخطيب انه يجيب شبكه لما ظروفه تسمح

طيب لو مقدرش يجيب اكيد اهل البنت هيكونوا عارفين ظروفه كويس هل هو فعلا مش قادر ولا ايه ويقدروا يحددوا

[kiro0oalex]

فى اعتقادى
ان اهم حاجه الحب والتفاهم والتوافق بين الاتنين ده الاساس
ولكن يجى بعد كده الشكليات
لان الشبكه من الاساسيات لان كل البنات بيجلهم شبكه
وبعدين ناس تعتقد ان العريس مدفعش شبكه يبقى بنتهم رخيصه عندهم على العكس ده بيبقى اللى يجى يرتبط لازم يعرف هو جاى لمين
ده مش كلام بس

اما موضوع انه مش قادر ديه نقطه تانيه
ممكن يبدأ بدبلتين ولكن من البدايه كده هتتنازل يبقى حياتها كلها هتكون فى تنازل
انا بتكلم فى واقع مش كلام وبس

اشكرك يا نهى على موضوعك الجميل وعلى طرحه للنقاش

[سندريلا2009]

الفكرة مش تكمن فى انها هتكون غالية ولا لا
لانها كدةكدة المفروض تبقى غالية عند عريسها
اومال هو جايى يتقدملها ليه من الاساس
لان فى رئى الشبكة مش بتحدد مدى غلاوة العروسة
نقدر نقول انها مجرد شكليات وعادات اتنقلت من جيل للتانى
النظرية كلها فى ان الشبكة دى بتكون حاجة تقدرية مابين اهل العريس والعروسة
والله شايفين انه يقدر يجيب شبكة كان بها شايفين العكس يبقى الدنيا مش هتبوظ عشان خاطر شبكة

اصلك مش هتلاقى انسان مناسب ومتوافق معاك فى حاجات كتير ويجى يقولك مش فى مكانى اجيب شبكة دلوقتى تقولى لا والله مش عندنا بنات للجواز !!

قى مقدرتك تجيب يبقى تمام و زى الفل

مش فى مقدرتك وشايف ان الانسان اللى قدامك كويس ومناسب يبقى تكتفى بالدبلتين مؤقتا لحد ما ربنا يدبرها ويجيب شبكة واكيد هو لو شاريها بجد هيكون عايز يجبلها كل حاجة واى حاجة



سورى للاطالة

ميرسى للموضوع

ربنا يبارك حياتك

[هابى22]

شكراا علي اثاره الموضوع الجميل ده
الصوره اللي واصله الي اهل العروسه بتقول ان غلاوتك يا بنتي من غلاوه الدهب اللي هيجبهولك والهدايه والخ الخ الخ لحد ميخربوا بيت العريس المسكين ويخلوه في حاله فقد الوعي كل بنت وفتاه عايزه تعيش الرمانسيه والدلع وتتفشخر قدام الناس وقدام اصحابها علي حساب الغلبان اللي مش عارف يلقيها منين ولا منين. ويقلوله هيا غاليه عندك وانتا شريها يبقا جيب دهب وجيب عفش وجيب مطبخ وجيب انتريه وجيب غرفه نوم اصلي بنتنا غاليه ميكنش هيتجوز الاميره ديانه هههههههههههههههههه
ربنا يحفظناااااااااااا

[كرستين صفوت]

ميرسى على الموضوع الجميل ده يانهى .
الموضوع ده وتعليقات الأعضاء فكرتنى بكلمه كانت بتقولهالنا الميس بمدارس الأحد وأحنا فى أعدادى .( إنى الولد لازم يثبت رجولته الأول وبعدين الرومانسيه) على ما أتذكر يعنى . بمعنى إنى مافيش واحد يتقدم لأى واحده من غير مايكون مستعد للأرتباط يعنى بيشتغل وبيجيب دخل مناسب وعلى أرض صلبه حتى لو بدايه بس بدايه مقبوله . ويكون جايب شقه وعنده إمكانيات لفرشها وأكيد هى هاتشارك فيها بأوضه أو أتنين أو على حسب تقاليد كل عيله وكمان يبقى شايل فلوس للشبكه .وعاوزه أقولكوا مافيش عريس دلوقتى بيجوز نفسه بنفسه بيكون فى مساعده من أبوه أو أمه او...
وبعدين الناس مستوايات (إجتماعيه) يعنى كل عريس بيدخل على بيت من مستواه تقريبا إن ماكنش أقل منه.
وانا بصراحه شايفه إن الشبكه دى هديه العريس للعروسه وزى مايقدر يجيب يجيب بس بردوا على قد مستواهم . وموش معنى كده أنه مايجبش والناس اللى بتقول أنه بعد كده ربنا يفتح عليه ويجيب . ماعتقدش لأنه فى مصاريف بيت وأقساط وأطفال جايه وبلاعه وأتفتحت.ههههههه
واللى شايفاه بجد عاوز نظر فيه هو الحفلات اللى بتتعمل بعد الخطوبه والفرح والكروت الغاليه والعزومات بتاعه الأكل اللى بتحصل فى الفرح دى حاجات لا بتودى ولا بتجيب ورايحه للناس على الأقل الشبكه محفوظه للعريس وحاجه تشرفه .
أسفه على الأطاله بجد بس مادرتش بروحى وانا بكتب.ههههههه.
شكرااا ليكوا وربنا يسهل لكل الشباب والشابات.

[peter gerges]

موضوع مهم جدا وانا اتفق معاكى
فى الرأى وانا من رأى الحب والتفاهم
والود بين المخطوبين واهل المخطوبين
اهم من الشبكه والمظاهر الكدابه
ياما ناس جابت اغلى الحاجات
لاكن بتبقى النهايه مؤلمه بسبب
حاجات تانيه غير الماديه والمظاهر الكدابه

[zaza2006]

ميرسى لمشاركتكم وردودكم
وفعلا الحب اغلى من اى فلوس واى دهب
المهم الحب والتفاهم
البنت هتاخد ايه لو الشاب جابلها كنوز الدنيا
بس كانت مش مبسوطة
الدهب مش مقياس للسعادة