المساعد الشخصي الرقمي

مشاهدة النسخة كاملة : سؤال هام : عن معلومة شبه منتشرة بخصوص عيد القيامة


مايكل ماهر
06-18-2011, 05:38 AM
سؤال ارجو اجابته من الاستاذ ايمن والاعضاء
توجد معلومة شبه منتشرة بخصوص تاريخ طقس عيد القيامة : والمعلومة دي بتقول ان عيد القيامة كان بيتعمل زمان كل 33سنة حسب عمر تجسد السيد المسيح على الارض . وان ميعاد الاحتفال بالعيد تغير لكل سنة لأن فيه ناس كانت متقدرش تحضر العيد وكانت ممكن تتوفى قبل ماتحضر العيد ........ هذه المعلومة منتشرة في بعض الكنائس وعلى لسان بعض الكهنة والخدام , .
والسؤال هنا ماهو مصدر هذه المعلومة , وايه المراجع التاريخية والكنسية اللي بتقول كدة ؟ ومين من اباء الكنيسة تكلم في كتاباته عن هذا الامر .؟
مع العلم لم اجد مرجعا او مصدرا كنسيا يذكر هذا الامر . لا في الدسقولية ولا تاريخ المجامع المسكونية ولا المكانية ولا اقوال الاباء , بل كل الادلة وهذه المراجع تشير انه كان بيتعمل كل سنة .
واجد بعضهم يقول بأن البابا ديمتريوس الكرام رقم 12 في البطاركة ,
هو اللي غير الاحتفال من 33 سنة لكل سنة .
وهذا ايضا لااجده في تاريخ البابا ديمتريوس الكرام , لأن كلنا عارفين
ان الابا ديمتريوس كل اللي عمله انه كان بيرد على اللي كانوا بيعملوا عيد القيامة غي ملتزمين بيوم الاحد فرد عليهم بأن صلب المسيح حدث يوم جمعة والاحد كان القيامة وهذا حسب ماتسلمناه من الرسل , وحاجة تانية انه ضم صوم الاربعين المقدسة لأسبوع الالام كنوع من الترتيب ليس اكثر,
ودة كل اللي عملوا حسب ماهو مسجل في تاريخه , ولا يذكر شيء بتاتا عن حكاية ال 33 سنة دول , رجاء محبة اللي يعرف اي مرجع أو مصدر لهذه المعلومة يقولهولي ويفيدني , واتمنى اعرف رأي الاستاذ ايمن في هذا الموضوع

aymonded
06-18-2011, 11:25 AM
سلام لنفسك يا أجمل أخ حلو من نور المنتدى بحضوره الرائع فيه
أولاً هذا الكلام أول مرة أسمع عنه لأن حتى الآباء المُعلمين في الكنيسة كانوا بيحددوا ميعاد عيد يوم القيامة كل سنة برسالة فصحية (القرن الرابع) وهذا واضح في رسائل القديس أثناسيوس الرسولي والقديس كيرلس الكبير والقديس أغريغوريوس وغيرهما الكثيرين سواء في الشرق أو الغرب ، فكان عيد القيامة بيُحدد من البطاركة أو المجمع المقدس بس كان ذلك كل عام وليس كل 33 سنة كما يُقال لأن هذا الكلام غير معلوم مصدره ولم يوجد ولا في مرجع واحد إطلاقاً (أعرفه على السمتوى الشخصي فقط)، وعيد القيامة عيد أساسي ورئيسي في الكنيسة منذ قيامة ربنا يسوع ويستحل أن لا يتم التعييد به ، لأنه يعتبر في الكنيسة الأرثوذكسية عيد الأعياد ويستحيل أن تمر سنة ولا يُعيد به إطلاقاً ، ولا أعلم مصدر هذا الكلام لأنه لم أجده مثلك تماماً ولا في أي مرجع إطلاقاً أعرفه، وكل ما أعرفه هو كتابات الآباء ورسائلهم الفصحية وكتاباتهم عن عيد القيامة ، وهذا بحد معرفتي وعلمي ، وفي الدسقولية الفصل الثامن عشر تقول :
[ ليكن عندكم جليلاً صوم الأربعين تذكاراً للفضيلة والحسنات التي للرب . وليكتمل هذا الصوم قبل الفصح . وتكون المدة من يوم الأثنين الثاني من السبوت وكماله قبل الفصح ] (وبسبب أن هذه الفقرة طويلة وصعب اكتبها كاملة هنا فممكن الرجوع لكتاب الدسقولية للدكتور وليم سُليمان قلادة لأنه بحث تفصيلي عن الدسقولية وترجماتها وتوثيق كل كلمة بالدليل والمخطوطات) وكان يُصام بعد ذلك اسبوع الفصح وحده قبل انضمام الأربعين المقدسة مع الفصح حسب الأنبا ديمتريوس وقرار وتأكيد المجمع المقدس وقوانين الآباء في المجامع ، ثم يُعيد عيد القيامة يوم الأحد كل سنة بانتظام بعد الفصح ، والفصل الثامن من الدسقولية والحادي والثلاثين بيوضح ويؤكد على ميعاد أيام عيد الفصح أي القيامة وعيد الصعود من كل عام والتأكيد على الاحتفال به ، فكانت الكنيسة تُعيد عيد القيامة والصعود بانتظام من بعد صعود الرب إلى يومنا هذا (رغم بعد اختلافات التواريخ في القرون الأولى) ، وهي أيام فرح للكنيسة كلها ويُقام لعيد القيامة تذكار على مدى السنة كلها كل يوم أحد ، لذلك يُمنع الصيام في كل يوم أحد من أيام السنة ، وأن أتى الأحد في أيام صوم لا يُصام فيه انقطاعي لأنه يوم تذكار قيامة الرب كما نعلم لهذا اليوم ، كما أن كل يوم جمعة هو تذكار صلب الرب من أجل خطايانا ، هذا هو ملخص كل قوانين الآباء على مر العصور وتناقلتها كل الأجيال عبر المخطوطات والمجامع المقدسة ، وإلى اليوم الكنيسة لم تغير شيئاً قط على الإطلاق ....

أقبل مني كل حب وتقدير لشخصك المحبوب في الرب
النعمة تملأ قلبك سلام ومسرة آمين

aymonded
06-18-2011, 11:29 AM
ان الابا ديمتريوس كل اللي عمله انه كان بيرد على اللي كانوا بيعملوا عيد القيامة غي ملتزمين بيوم الاحد فرد عليهم بأن صلب المسيح حدث يوم جمعة والاحد كان القيامة وهذا حسب ماتسلمناه من الرسل , وحاجة تانية انه ضم صوم الاربعين المقدسة لأسبوع الالام كنوع من الترتيب ليس اكثر,


كل هذا الكلام التي ذكرت هو صحيح 100% وهذا ما حدث بالفعل ومثبت في أكثر من مرجع وكتاب وعالم في كتابات الآباء ، وهذا هو فعلاً ما فعله ولم يُذكر موضوع 33 سنة إطلاقاً لا من بعيد ولا من قريب، وحقيقي مندهش من موضوع 33 سنة ومش عارف جه منين خالص !!! وبصراحة أول مرة اسمعه !!!
هو بس كان بيتم رسم الكهنة مش قبل 30 سنة حسب قوانين الكنيسة قديماً على أساس أن الرب يسوع لم يخدم قبل 30 سنة ، فيمكن يكون حدث لبس بين رسامة الكهنة حسب القوانين القديمة وبين موضوع العيد ، احتمال والله واعلم مع أني أشك يكون حدث في هذا خلط ، بس غريب موضوع أن عيد القيامة لم يُعيد به كل عام ولا أدري أو أعرف المرجع الصحيح لهذا !!!

كراكيب
06-18-2011, 11:35 AM
للأسف الكهنة بيخترعوا وبيقولوا الكلام ده ع المنبر لإن الشعب معظمه " أبيض " وبيتأثر وخلاص وأنا فعلا سمعت المعلومة الغريبة دي وسمعت كمان ان المجوس كانوا أربعة وحاجات غريبة كدة
ياريت فعلا كل اللي يكون متأكدة من كلمة يقولها وإللي ميكونشي عارف ميفتيش

elphilasouf
06-19-2011, 12:03 AM
أنا متهيألي الكلام علي أسبوع الألام هو اللي كان بيتعمل كل 33 سنه :) بس :d
مسمعتش حد قال قال عيد القيامه :)

وموضوع المجوس ، في بعض الروايات بتقول كده بس دي مجرد روايات

مايكل ماهر
06-19-2011, 06:00 AM
اشكر الفيلسوف على مداخلته , وعايز اقول حاجة بخصوص اسبوع الالام ,,,,
هو برضه كان بيتعمل كل سنة مش كل تلاتة وتلاتين سنة ,,, لأن اسبوع الالام مرتبط
بعيد القيامة طبعا , وطبعا موضوع اسبوع الالام كل تلاتة وتلاتين سنة موجود فين بالضبط , في اي مرجع وأي مصدر ,,,,,,,,,
وعايز اقول حاجة بالنسبة للأستاذ كراكيب , انه بيقول الكهنة بيقولوا الكلام دة على المنبر ,,,,,
بالطبع هو مايقصدش كل الكهنة لأن اغلبية الكهنة مايعرفوش حكاية كل 33 سنة , لكن اللي بيقولوا كدة يتعدوا على اصابع اليد الواحدة .
اما حتة ان الواحد يفتي ,,, هم مش ذنبهم , دة ذنب اللي قال المعلومة دي ومعرفش سمعها منين , ولا ايه مصداقية هذه المعلومة ,
واعتب على الاباء الكهنة ( عتاب الابن لأبوه ) والخدام اللي بيقولوا المعلومة دي , : " كان لازم يسألوا سؤال مهم , وهو ايه مصدر هذه المعلومة , وهل هي موثقة تاريخيا أم لا ,
وايه هي المراجع اللي بتقول كدة , وان كان قراها في كتاب , يسأل ويقول الكتاب دة في سرده للمعلومة دي استند لأي مرجع , ويبدأ في حاجة مهمة وهي تحقيق التاريخ ,,,,,,,,,
و كنت اتعلمت في الاكليريكية من البابا شنودة
,الموضوع ده وكان سيدنابينبهنا لموضوع تحقيق التاريخ. وان مش اي كتاب يقع في ايدي اخده وخلاص , لازم اشوف .
المراجع اللي استند اليها الكاتب واحقق التاريخ
ايضا في المرجع نفسه هل هو مرجع سليم ولا لأ .
وياريت لو حد عرف كتاب بيقول حكاية التلاتة وتلاتين سنة دي يقولي عليه ,,يمكن اشوف المراجع اللي استند اليها

واشكركم على مداخلتكم الجميلة ,, وربنا يبارككم

مايكل ماهر
06-19-2011, 06:06 AM
أود أن اشكر ايضا الاستاذ ايمن على مداخلته واتفق معه تمام الاتفاق ,,
وارجو منه انه لو وجد كتاب بيقول كدة
يقولي عليه ,,, علشان نعرف مصدر هذه المعلومة ,
شكرا وربنا يباركك

aymonded
06-19-2011, 11:52 AM
ربنا يخليك يا محبوب الله الحلو وصدقني أنا لم ارى كتاب في حياتي كلها قال وذكر موضوع 33 سنة على أي عيد من الأعياد في الكنيسة إطلاقاً ، والله وأعلم جت المعلومة دية منين !!! أقبل مني كل حب وتقدير ؛ ولنُصلي بعضنا من أجل بعض ؛ النعمة معك كل حين

emmmy
06-20-2011, 04:54 PM
منور يا مايكل اخيرا شفتلك موضوع يا مايكل
بقى اول مرة اشوفلك موضوع ويطلع كدة معلومة مش حقيقية
بس حلو بجد ومهم جدا جدا فعلا انا سمعت الاشاعة دى قبل كدة برضوا بس من جوايا مش صدقتها وبصراحة برضوا معلقتش لانى معنديش ادلة على عدم صحة المعلومة الغريبة دى
وطبعا عندك حق دى حتى لو حسبناها بالمنطق هنلاقيها متنفعشى خااالص الاحتفال بعيد القيامة كل 33 سنة دى
هو ممكن زى ما قال استاذ ايمن حصل لبس عن بعض الناس فى موضوع رسامة الكاهن عندة 30 سنة !!!
مرسى يا مايكل على موضوع الجميل دة وعلى حضورك الجميل كمااان

مايكل ماهر
06-21-2011, 07:37 AM
متشكر خالص على المداخلة الجميلة ل emmmy ورجاء محبة لو لقيتي أو سمعتي عن أي كتاب بيقول المعلومة دي قوليلي عنه ,,,,, وربنا يباركك سلام

aymonded
08-23-2011, 04:51 PM
ملحوظة صغيرة احب أنوه عنها
أنا سألت خدام كثيرين كبار في السن وبعض الكهنة ولهم بحث في التاريخ وقالوا أن في القرون الأولى قبل القرن الرابع كان يُعيد بالأعياد كلها حسب عمر الرب يسوع وعيد القيامة كل 33 سنة، ولكن لم يذكر أحد لي أي مرجع، ولكوني لا أدري أو أحصل على اي مرجع لم استطيع الحكم في هذا الأمر ولم أؤكد عليه إطلاقاً ولا أستطيع ان أُنفيه أيضاً لأني إلى الآن لم يكن عندي يقين واضح وتأكيد بسبب عدم وجود مرجع لديَّ يوضح هذا الأمر، ولو وجدت مرجع سأكتبه فوراً وبكل تأكيد، وقد قمت بتصحيح وتعديل تعليقاتي لأني غير متأكد في هذا الأمر بسبب عدم المراجع، النعمة معكم