المساعد الشخصي الرقمي

مشاهدة النسخة كاملة : صندوق الخدمة فاضى ولا مليان !! ولية ؟؟


emmmy
12-08-2011, 02:44 PM
طبعا كل خدمة بتحتاج لمصاريف
وبيبقى فى صندوق للخدمة مسئول عنة خادم معين
وكتير من الخدمات بتجمع اشتراك شهرى من الخدام
بالاضافة الى التبرعات والبركات اللى بتيجى من برة - صح يا خدااام !!
السؤال بقى لية بنلاقى بعض الخدامات دايما بتشتكى ان الصندوق فاضى والمال مش مكفى طلبات الخدمة وهدايا المخدومين وطلباتهم فى الاعياد والمناسبات وغيرة بتبقى كتير والصندوق مفهوش
تفتكروا المشكلة فين ؟؟ فى الخدمة ولا فى الخدام ولا فى المخدوم وطلباتة وتمردة على الهدايا البسيطة ولا فى الكنيسة اللى مبقتش تساهم غير بالقيل جدا جدا جدا
وتفتكروا اية السبب واية الحل ؟؟
عاوزة كل خادمة وخادمة يقولى راية الشخصى واقتراحاتة عشان نعرف الاسباب اللى بتخلى فى صندوق مليان فى بعض الخدمات وصندوق فاضى فى البعض الاخر ؟؟
ونعرف كمان اية الحل ؟؟

اناستاسيا
12-08-2011, 04:07 PM
هههههه شكلك مزنوقة يا ايمى فى هدايا العيد على العموم احنا بنستعين ببابا نويل نادى علية وربنا يسهل

emmmy
12-08-2011, 04:22 PM
هههههههههههه لا صدقينى مش بالظبط
ثم الصندوق مش معايا مش مسئوليتى
بس انتى قصدك اية انا مش فاهمة - يعنى اية بتستعينى ببابا نويل
بتشفعى بية قصدك -- ما هو احنا عارفين ان بابا نويل دة قديس فى الاساس

YoUsSeF_JeSuS
12-08-2011, 07:29 PM
موضوع جاى فى وقته بالظبط يا ايمى ربنا يباركك

" وكتير من الخدمات بتجمع اشتراك شهرى من الخدام "

انا مشفتهاش فى حياتى بصراحة انا اللى شفته فى خدمتى انه الخدمه بتاخد مصاريفها من فلوس الكنيسة اللى الناس دفعاها اصلا علشان اخوة الرب فهما بياخدوها يجيبوا بيها ( لعب ) وكلام فاضى واكيد عارفين بتروح فين فلوس الخدمه
اما ايام الاعياد والمناسبات فبيبداوا يجمعوا من بعض فلوس ولو احتاجوا فلوس اكتر بياخدوا من فلوس الكنيسة بمعنى ادق مفيش اكتفاء ذاتى لكل خدمة

والخدمة اللى مبتلاقيش فلوس هى الخدمة اللى مبتديش
الخدمة اللى متعرفش حاجة اسمها اعطاء الجميع

انا سمعت البابا شنودة بينبه فى عدة محاضرات من فترة قريبة ان الكنايس لازم تدى للناس كلها حتى من اعوازها ومن احتياجاتها زى المرأة اللى اعطت من اعوازاها
فلو شلنا كلمة الكنايس وحطينا كلمة الخدمات ( اجتماعات الخدمة )

ولازم كمان ان الكنايس اللى فى منطقة واحدة ، يكون بينهم تعاون ان ك كنيسة تغطى احتياجات الكنيسة التانية
يعنى مثلا لو كنيستى عايزة ملابس جديدة علشان العيد علشان الفقراء وكنيستى مش قادرة توفر كده تيجى اكنيسة اتانية وتحاول تساهم لمساعدة كنيستى وهكذا
ومتبقاش بس على مستوى احتياجات الاعياد تكون كمان فى الايام العادية فى الخدمة
والفكرة دى مش هتنجح الا تعاون الخدام فتقريبا كل خدام الكنايس اصحاب وزملاء فلو اتفقوا ونظموا بينهم وبين بعضهم هنشوف اختلاف وتطور كبير جدا فى الاجتماعات والخدمات والكنايس

سلام المسيح معاكى ومع كل الناس

ريم الخوري
12-08-2011, 07:30 PM
شوفي ايمي مفيش مشكلة يا قمر الموضوع دا متقدريش تقيسي فية للكل بنفس المقياس يعني ممكن اوي كنيسة يكون رعيتها كتيرة ومتوسط دخلها حلو وطبيعة التبرعات تبقي سخية اوي في حين البعض الاخر بيكون في بس قليل وفي ميكونش ابدا فدي مسالة نسبية ودي ليها اثر بالنسبة لمقدرة الصندوق ليكون قادر يغطي مصاريف الخدمة اما لا

اما لو في فليش بيكون حد قادر يغطي مصاريف الخدمة وفترة الاعياد والمناسبات فدي اقولك شطارة خدام بنسبة معينة بالاضافة لكتير اشياء مساعده جنب منها
كيف
يعني ممكن اوي لو فرضاً معاي مبلغ في الصندوق مدكنيش علية او اصرفة بغير محلة
لالالالالالا اشتغلي فيه بحيث يجيب ربح حتي لو قليل واصرفي على خدمتك كيف استغلة دي اللى محتاجة جهد بس بالعموم ربنا بيدبر للخدمة احتايجها

hany1982
12-08-2011, 10:41 PM
اه غالبا عندك حق وبنشتكى كتير من قلة الماديات فى الخدمه فى الحفلات والاعياد بس دى بتبقى عاوزه تدبير شويه من الخدام ومنعتدمتش على الفلوس

soso-simsim
12-09-2011, 01:29 AM
اولا فى حاجه يا ايمى انتى بتقولى ان هل العيب فى الخادم اللى بيتمرد على الهدايا البسيطة طيب ليه اصلا خادم ويتنرد ما لو فعلا الخادم اللى ماسك الصندوق بيصلى وبيخدم من قلبه فعلا هاتلاقى بركة غير عادية فى الصندوق وممكن حاجه تانى بس سامحينى فيها ممكن يكون مش امين علشان كده مافيش بركه انا بتأسف تانى علشان العبارة دى بس لازم هاقولها ممكن يكون دى المشكلة اللى بتخلى انه مافيش بركة فى الصندوق .
تانى حاجه امين الخدمة ممكن يباشر كل الخدمات وايه الى مقصر فى خدمة فلان وخدمة فلان ونشوف وبعدين نشوف الى مقصر ده ليه هل مافيش اطفال ولا كبار بيجو الخدمة وبيدو عطا ولا ايه ما الصندوق عبارة عن ايه بيكون العطا والخدمات الاخرى والعطايا الخارجبة ممكن حد يسعى من برة ويقول لكل الخدام انهم لما يروحو يفتقدو حد يقولو لاهل المخدوم ان الخدمة محتاجة لمساعدتكم وبكده لو كل خادم اتبع الموضوع ده هاتلاقى البركة تعم علشان الكل بيخدم بروح واحده وهى البذل كل واحد يبذل مجهود فى الافتقاد والمحبة هى الاساس فى الخدمة وروح الصلاة اللى بتحصل بعد مدارس الاحد وامين الخدمة كمان يشوف ابونا ويقوله انه ينبه فى القداس ان الخدمة محتاجة لمساعدتكم والى يقدر يساعد بحاجة ولو بسيطة يساعد وصدقينى لما كل واحد يشتغل بحاجة هاتلاقى بركة غير عادية .
وممكن يكون التقصير من ان فى خدمات تانى مفتوحة فا يكون مثلا خدمة المرضى محتاجة وخدمة اخوة الرب محتاجة فا كل حاجة من الخدمات دى هاتلاقى الناس مش عارفه تساعد مين ولا مين فا هاتروح لابونا وهاتديله الفلوس وهو يوزعها بمعرفته دى حاجة تانى بس برده مش مبرر انه الصندوق بيكون فاضى .
وبعدين فوق كل ده ربنا مش بينسى حد يعنى هاتلاقى قبل العيد هاتلاقى ناس كتير متبرعة بحاجات دى اهم حاجه فى الخادم انه يكون واثق ان ربنا مش بينسى اولاده . وربنا يفرح قلوب اولاده بكل عطاياه الحلوة والجميلة يارب ويساعدك يا ايمى فى خدمتك . امين سلاك المسيح معاكى . ومعلش ان كنت طولت عليكى

elphilasouf
12-10-2011, 12:14 AM
صدقيني أنا شايف إن الخدمه مش محتاجه فلوس ولا تبرعات ولا الكلام ده كله
هي بس زي ما قال بعض الاخوه في الردود اللي قبل كده
محتاجه شويه إيمان بس ، وحسن تدبير وربنا عموما بيدي -بحكمته- للخدمات كل اللي محتاجه ـ
و ويمكن اللي يعرفوا ده أمناء الصناديق بالخصوص أن الفلوس أو الإحتياجات عموما بتيجي في وقتها المناسب .
بس دور الكنيسه هو العطاء (بإيمان ) وربنا دوره إنه يبعت
طول ما الكنيسه مش بتدي ربنا يبعت إزاي ؟!

emmmy
12-10-2011, 10:46 AM
اولا انت منور القسم يا يوسف حقيقى اسعدنى وجودك ومساركتك
موضوع جاى فى وقته بالظبط يا ايمى ربنا يباركك
لية عشان داخلين على العيد !! ؟؟
ولو انى مقصدتهاش بس اتمنى يكون سبب افادة وبركة للجميع


" وكتير من الخدمات بتجمع اشتراك شهرى من الخدام "
تفتكر ان اشتراك الخدااام الشهرى هيكفى الخدمة وطلباتها ؟؟
الخادم بيدفع اد اية شهريا ؟؟
هدايا العيد بتعدى الالف جنية عندى والعدد مش كبير بالنسبة لكنائس تانية كتير اشتراك الخادم ميكفيش حاجة يا يوسف

انا مشفتهاش فى حياتى بصراحة انا اللى شفته فى خدمتى انه الخدمه بتاخد مصاريفها من فلوس الكنيسة اللى الناس دفعاها اصلا علشان اخوة الرب فهما بياخدوها يجيبوا بيها ( لعب ) وكلام فاضى واكيد عارفين بتروح فين فلوس الخدمه
اما ايام الاعياد والمناسبات فبيبداوا يجمعوا من بعض فلوس ولو احتاجوا فلوس اكتر بياخدوا من فلوس الكنيسة بمعنى ادق مفيش اكتفاء ذاتى لكل خدمة
( كلام فاضى ) هى لعب الاطفال وهدايا المخدومين بالنسبة لك كلام فاضى يا يوسف ؟؟
انت لما كنت صغير وبتأخد هدية من الكنيسة عشان انت شاطر وبتحفظ المزامير او عشان انت مواظب وملتزم كنت بتحس باية ؟
دى فرحة المخدوم اغلى من كنوز الارض كلها
اختلف معاك يا يوسف ومصاريف الخدمة متقلقش اهمية عن مصاريف اخوة الرب اللى دايما بنركز عليهم بشدة غريبة


والخدمة اللى مبتلاقيش فلوس هى الخدمة اللى مبتديش
الخدمة اللى متعرفش حاجة اسمها اعطاء الجميع
يعنى اية ؟؟
هتعطى ازاى اذا كانت هى مفيهاش يا يوسف
انا مش فاهمة قصدك

انا سمعت البابا شنودة بينبه فى عدة محاضرات من فترة قريبة ان الكنايس لازم تدى للناس كلها حتى من اعوازها ومن احتياجاتها زى المرأة اللى اعطت من اعوازاها
فلو شلنا كلمة الكنايس وحطينا كلمة الخدمات ( اجتماعات الخدمة )
بردوا يعنى اية ؟ اية دخل اجتماعات الخدمة فى صندوق الخدمة ؟
ما هة خدمة زى باقى الخدمات عندها نفس المشكلة
اشمعنى اجتماع الخدمة اللى هيحل المشكلة ؟؟

ولازم كمان ان الكنايس اللى فى منطقة واحدة ، يكون بينهم تعاون ان ك كنيسة تغطى احتياجات الكنيسة التانية
يعنى مثلا لو كنيستى عايزة ملابس جديدة علشان العيد علشان الفقراء وكنيستى مش قادرة توفر كده تيجى اكنيسة اتانية وتحاول تساهم لمساعدة كنيستى وهكذا
ومتبقاش بس على مستوى احتياجات الاعياد تكون كمان فى الايام العادية فى الخدمة
والفكرة دى مش هتنجح الا تعاون الخدام فتقريبا كل خدام الكنايس اصحاب وزملاء فلو اتفقوا ونظموا بينهم وبين بعضهم هنشوف اختلاف وتطور كبير جدا فى الاجتماعات والخدمات والكنايس
فكرة التعاون فكرة جميلة طبعا بس دة اذا فاض حاجة من كنائس عشان تساهم بمساعدة كنائس اخرى -- ولو انى اشك بصراحة
يااااريت كل كنيسة تكفل نفسها بس

سلام المسيح معاكى ومع كل الناس

شكرا يا يوسف حقيقى اسعدنى وجودك الجميل ومشاركتك
سبلم المسيح معاك ويحفظك دايما

emmmy
12-10-2011, 10:57 AM
شوفي ايمي مفيش مشكلة يا قمر الموضوع دا متقدريش تقيسي فية للكل بنفس المقياس يعني ممكن اوي كنيسة يكون رعيتها كتيرة ومتوسط دخلها حلو وطبيعة التبرعات تبقي سخية اوي في حين البعض الاخر بيكون في بس قليل وفي ميكونش ابدا فدي مسالة نسبية ودي ليها اثر بالنسبة لمقدرة الصندوق ليكون قادر يغطي مصاريف الخدمة اما لا
بصراحة ياريم انا بتكلم عن مستوى ابسط من كدة انا بتكلم عن الخدمة كمراحل مش عن الكنيسة بصفة عامة انا لو اتكلمت عن الكنيسة بصفة عامة هتدخلى فى متاهات
بصى يا حبيبتى ممكن جدا الخدمة تبقى فى كنيسة واحدة بتبقى مراحل ابتدائى واعدادى وثانوى وغيرة اوك ممكن تلاقى خدمة معينة منهم مرحلة منهم اللى دايما بتشتكى من عدم توفر طلبات الخدمة واحتياجاتها --- والباقى لأ !! تفتكرى لية ؟؟

اما لو في فليش بيكون حد قادر يغطي مصاريف الخدمة وفترة الاعياد والمناسبات فدي اقولك شطارة خدام بنسبة معينة بالاضافة لكتير اشياء مساعده جنب منها
كيف
يعني ممكن اوي لو فرضاً معاي مبلغ في الصندوق مدكنيش علية او اصرفة بغير محلة
لالالالالالا اشتغلي فيه بحيث يجيب ربح حتي لو قليل واصرفي على خدمتك كيف استغلة دي اللى محتاجة جهد بس بالعموم ربنا بيدبر للخدمة احتايجها

(( شطارة خداااام ))
طيب معلش عشان خاطرى استحميلنى
شطارة الخدام دى من وجهة نظرك تبقى ازاى يعنى !!
بصى افرضى ان انا معايا 500 جنية وهدايا العيد عاوزة 1000 جنية وفاضل شهرين على العيد -- فى رايك اشتغل واربح ازاى فى الفترة دى عشان اكمل احتياجات الخدمة بصفة عامة وهدايا العيد بصفة خاصة ؟؟

emmmy
12-10-2011, 11:02 AM
اه غالبا عندك حق وبنشتكى كتير من قلة الماديات فى الخدمه فى الحفلات والاعياد بس دى بتبقى عاوزه تدبير شويه من الخدام ومنعتدمتش على الفلوس


عزيزى هانى
اشكرك على مشاركتك الجميلة والبسيطة
بس التدبير دة معناة اية ترى ؟؟ معناة عدم التبذير قصدك ؟؟
ويعنى معتمدتش على الفلوس اومال اعتمد هلى اية يا ترى ؟؟

emmmy
12-10-2011, 11:24 AM
ساسو الجميلة اولا بشكرك على وجودك
اولا فى حاجه يا ايمى انتى بتقولى ان
هل العيب فى الخادم اللى بيتمرد على الهدايا البسيطة طيب ليه اصلا خادم ويتنرد
انا قلت الخادم بيتمرد !!؟؟ لأ يا حبيبتى محصلش انت بس مأخدتيش بالك معلش -- المخدوم يا ساسو اللى ممكن يتمرد على الهدايا البسيطة ودة طبيعى لاسباب كتير جدا صحيح مش كلهم بس اغلبيتهم

ما لو فعلا الخادم اللى ماسك الصندوق بيصلى وبيخدم من قلبه فعلا هاتلاقى بركة غير عادية فى الصندوق وممكن حاجه تانى بس سامحينى فيها ممكن يكون مش امين علشان كده مافيش بركه انا بتأسف تانى علشان العبارة دى بس لازم هاقولها ممكن يكون دى المشكلة اللى بتخلى انه مافيش بركة فى الصندوق .
قصدك ان الصندوق ممكن يكون فى ايد يهوذا تانى !!؟؟
تصدقى بأمانة عمرى ما فكرت فى حاجة زى دى - مع انه وارد مهو يهوذا متعملش منة نسخة واحدة صحيح -- طيب يعنى المفروض يكون فى اختيار للخادم اللى يمسك الصندوق ؟؟
طيب اختيار الخادم اللى يمسك الصندوق يكون على اى اساس يا ترى ؟؟ عشان نتجنب مشكلة يهوذا دى يا ساسو !!
تانى حاجه امين الخدمة ممكن يباشر كل الخدمات وايه الى مقصر فى خدمة فلان وخدمة فلان ونشوف وبعدين نشوف الى مقصر ده ليه هل مافيش اطفال ولا كبار بيجو الخدمة وبيدو عطا ولا ايه ما الصندوق عبارة عن ايه بيكون العطا والخدمات الاخرى والعطايا الخارجبة ممكن حد يسعى من برة ويقول لكل الخدام انهم لما يروحو يفتقدو حد يقولو لاهل المخدوم ان الخدمة محتاجة لمساعدتكم وبكده لو كل خادم اتبع الموضوع ده هاتلاقى البركة تعم علشان الكل بيخدم بروح واحده وهى البذل كل واحد يبذل مجهود فى الافتقاد والمحبة هى الاساس فى الخدمة وروح الصلاة اللى بتحصل بعد مدارس الاحد وامين الخدمة كمان يشوف ابونا ويقوله انه ينبه فى القداس ان الخدمة محتاجة لمساعدتكم والى يقدر يساعد بحاجة ولو بسيطة يساعد وصدقينى لما كل واحد يشتغل بحاجة هاتلاقى بركة غير عادية .
بصراحة هو اقتراح جميل صدقينى ومنطقى بس انا شايفة ان صعب تنفيذة لاسباب كتير
وانا واحدة من الناس مش هعرف اعمل دة انى انزل افتقاد واطلب مساعدة من الاهالى للخدمة
وممكن يكون التقصير من ان فى خدمات تانى مفتوحة فا يكون مثلا خدمة المرضى محتاجة وخدمة اخوة الرب محتاجة فا كل حاجة من الخدمات دى هاتلاقى الناس مش عارفه تساعد مين ولا مين فا هاتروح لابونا وهاتديله الفلوس وهو يوزعها بمعرفته دى حاجة تانى بس برده مش مبرر انه الصندوق بيكون فاضى .
تمام انتى رديتى على نفسك اهو فى خدمات تانى كتير وكل خدمة بتكفل نفسها بالعافية
حبيبتى ساسو من ساعة ما وقفوا موضوع توزيع الطبق فى القداسات والمناسبات والنهضات الميزانية نزلت 180 درجة والاباء بيجوا قرب العيد ويعملوا المستحيل عشان يكفلوا احتياجات اخوة الرب وطلباتهم فمش فايض منهم حاجة وخصوصا فى الايام العادية يمكن فى الاعياد ( الميلاد والقيامة ) بتساهم بمبلغ معين والخدمة بتكمل
وبعدين فوق كل ده ربنا مش بينسى حد يعنى هاتلاقى قبل العيد هاتلاقى ناس كتير متبرعة بحاجات دى اهم حاجه فى الخادم انه يكون واثق ان ربنا مش بينسى اولاده . وربنا يفرح قلوب اولاده بكل عطاياه الحلوة والجميلة يارب ويساعدك يا ايمى فى خدمتك . امين سلاك المسيح معاكى . ومعلش ان كنت طولت عليكى

صححح ربنا مش بينسى حد تمام
شكرا يا ساسو على مشاركتك الجميلة وشكرا على التطويل

emmmy
12-10-2011, 11:31 AM
صدقيني أنا شايف إن الخدمه مش محتاجه فلوس ولا تبرعات ولا الكلام ده كله
هي بس زي ما قال بعض الاخوه في الردود اللي قبل كده
محتاجه شويه إيمان بس ، وحسن تدبير وربنا عموما بيدي -بحكمته- للخدمات كل اللي محتاجه ـ
و ويمكن اللي يعرفوا ده أمناء الصناديق بالخصوص أن الفلوس أو الإحتياجات عموما بتيجي في وقتها المناسب .
بس دور الكنيسه هو العطاء (بإيمان ) وربنا دوره إنه يبعت
طول ما الكنيسه مش بتدي ربنا يبعت إزاي ؟!


برغم عدد الاسطر الصغيرة وبساطة الكلمات واختصارها لكنها عمق ما تمنيت ان اسمعة
عزيزى جورج الذى اكن لة كل الحب والاحترام والتقدير
ابدعت فى الرد اشكرك حقيقى

emmmy
12-10-2011, 11:46 AM
احبائى فى الرب يسوع وكل الخدام الذين احبهم واجد متعتى معهم
انا عاوزة اشارك معكم الحوار واقول رايئ وتجاربى مع سنين الخدمة
انا مسكت الصندوق فترة وجربت ودقت عمل اللة العجيب
وارجوا انكم تسمعونى وتردوا عليا ولكم ان تقبلوا كلامى او ترفضوة
يا احبائى صندوق الخدمة لازم التعامل معاة يكون بالايمان والثقة فى تدبير اللة ومواعيدة وتدبيرة
مش بالمنطق والعقل والتفكير والتدبير البشرى صندوق الخدمة بيكون مليان فى ايدى بعض الخدام لانهم قلوبهم مليان بالايمان فعلا واحتياجات الخدمة بتيجى فى وقتها بشكل عجيب وغريب لانة دة صنع يد اللة
وبيكون فارغ فى ايدى البعض الاخر لانهم بيبدروها بالعقل والمنطق لان الموضوع بيأخد من تفكرهم اكثر من حجمة لان اعتمادهم كلة بيكون على الماديات والخدمة بالنسبة لهم مجرد نشاط وحركة ومعلومات واكسب واخسر
مفيهاش روح وحياة وتسليم وعلاقة حية حقيقية مع شخص الرب يسوع
احبائى الخدااام صدقونى الموضوع كلة يتوقف على حاجة واحدة -- واحدة بس -- طريقة تفكيرنا تجاة الصندوق واهتمامنا بية الى اى حد والى اى مدى
وابرع مثل للكلام دة كان الابنا ابرام والمعلم ابراهيم الجوهرى
اللانبا ابرام كان معاة اخر جنية مفيش غيرة فى المطرانية واداة لواحد محتاج وكلة ثقة وايمان ان ربنا هيبعت تانى وتلميذة مكنشى مقتنع - بس ربنا بعت فى نفس اليوم اضعاف ما اعطاة الانبا ابرام
صندوق الخدمة المليان بيكون فى ايدى اناس قلوبهم مليانة بالايمان
دى رايئ واللى جربتة وشفتة وعشتة صدوقونى

aymonded
12-10-2011, 01:02 PM
سلام في الرب
ليس لي إلا أن أكتب ما نقوله دائماً في صلواتنا الطقسية التي هي حياتنا كلنا وصدق إيماننا الحي: [ دبر حياتنا كما يليق، بارك إكليل السنة بصلاحك من أجل فقراء شعبك، من أجل الأرملة واليتيم والغريب والضيف ومن أجلنا كلنا نحن الذين نرجوك ونطلب اسمك القدوس، لأن أعين الكل تترجاك، لأنك أنت الذي تعطيهم طعامهم في حين حسن. أصنع معنا حسب صلاحك يا معطياً طعاماً لكل جسد. أملأ قلوبنا فرحاً ونعيماً لكي نحن أيضاً إذ يكون لنا الكفاف في كل شيء كل حين نزداد في كل عمل صالح ] القداس الإلهي - ختام الأواشي

والموضوع يحتاج إيمان كما قال فيلو وقلتي أنت ايضاً في التعليق الأخير، والخدام فعلاً بيعطوا من أعوازهم وكل واحد حسب إمكانياته بيعطي ولا يتأخر فعلاً، وبعدين المفروض أن الخدام يحاولوا يعلموا الأولاد القناعة، بهدايا رمزية مفيدة بقدر الإمكان عوض الشيكولاتة والبسكويت وغيرها، وطبعاً صعب أننا نُحمل الكنيسة وهق الهدايا بجوار مسئوليتها عن الفقراء وغيرها من الخدمات وتدعيمها، وأنا بكوني رأيت بعيني بعض الكنائس التي تتحمل نفقات عالية جداً لخدمتها للفقراء والخدمات الأخرى (رغم عدم قدرتها لتسديد كل شيء حسب المطلوب)، ولكن إلهنا القدوس بيعين ويعطي لكل واحد حسب احتياجه في النهاية، ومن الصعوبة التامة أننا نتكلم في المطلق لأننا لا نعلم إمكانية كل كنيسة ولا قدراتها ولا تمويلها، الأهم من هذا كله أين إيماننا، ده لو كنا عايزين نخدم الله بأمانة فعلاً ولا نصرف الأموال التي تأتي على توافه الأمور (وبخاصة الحفلات الصاخبة والتي بلا روح ولا تُرضي المسيح، وكل واحد ينظر لله بقلبه طالباً روح إفراز ليُميز بين ما يُرضي الله وما لا يُرضية) بل نصرفها في مكانها الصحيح وحسب الاحتياج، وأكيد لازم الله يتدخل في حينه (طبعاً لو فيه إيمان حقيقي وثقة في شخصه)، ولكن علينا أننا نؤمن ونطلب روح تدبير وحكمة لكي نضع الأموال التي تأتي من الله للناس في مكانها الصحيح كما يُرضي الله لئلا تنقطع في النهاية ولا نجد معونة من إلهنا القدوس ويبدأ في تأديبنا في النهاية لأننا لا نتأنى ونسمع صوته وننفذ وصاياه ونتمم إرادته حسب قيادة الروح القدس وليس حسب مجرد تفكيرنا وإراداتنا نحن...

وحينما نكون أمناء فيما لله حتماً سيتدخل ويبارك في الخمس خبزات وسمكتين، أو في الفلس الصغير، فيشبع الجميع ويفيض منهم في النهاية لأن الإيمان هو رمية ثقة على الله الحي الحاضر بملء مجده وقوته لأنه أعطانا وعد لا يُمكن أن يُنقض لأنه قال: أنا معكم كل الأيام وإلى انقضاء الدهر آمين.

ريم الخوري
12-10-2011, 01:07 PM
ميش عارفة يبدو انك بوادي وانا بوادي هي ميش كل الامور المالية للخدمة بكنيسة واحده بايد مسؤال او خادم واحد
وبيوزع المخصصات حسب الاحتياج وبيعرف بيصرف كل ملميم بيخرج من الصندوق للخدمة المهم
الكلام دا ايمي المفروض اشتغلتم علية بصورة مستمرة
كيف يعني ممكن كتير في مناسبات بتمرقان كان اجتماعية اسرية دينية
ممكن نشتغلها لندخل للخدمة فلوس تساعد مثلا عيد الام وممكن على غرارها تعملي لعيد الميلاد
ممكن تعملي مسابقة ورقية كتابية على شكل اسئلة تخص المناسبة بس من الكتاب المقدس وتصوريها دي ميش رح تكلفك غير اجرة الورق وبحثك انت ودا بفايدة بتصور بالكتاب المقدس والاباء وتعلميها عندك على جهاز الكمبويتر وتحطي اسم المركز بتاعكم والكنيسة ورقم المسابقة واية عنوان ليها يدل على الحدث بتاعها
وبعيدن تصوري عدد منها وتبيعيها او تدي كل لخادم عدد معين تكليفة يبعها ضمن محيطة الاسري
وتبعيها بملبغ مثلا نحنا عندنا نص دينار للورقه بتاعتة المسابقة
لو بعتي مثلآ ثمانين شخص اشترو بنص دينار عندنا عندكم معرفس يطلع اد ايه ههه
المهم يبقي اربعين دينار دا مبلغ حلو كلفك كام بس اجرة الورق وتعبك الشخصي حتقولي كيف الجوايز حتاخدهم للمسابقة وميش يكون في ربح اقولك لا ميش تاخدهم لانك الجوائز حتعملي لجنة من الخدام تروحو تجمعو الجوائز على شكل تبراعات حسب اللى يتقدم وبكده عملتي نشاط باتجاهين جمعتي للخدمة وبنفس الوقت عملتي نشاط مصاريفة تبرعات
وعلى فكرة دي ممكن اوي تلحقي تعمليها قبل العيد حتساعد وممكن تبيقي دورية يعني تتعمل كل سنة

او فكرة تانية ممكن تعلمو امسية مرتلة من ولادكم واللى تعلمو ا بطريقة متقنة ومرتبة ويكون في تزاكر عينية للحفلة يبقي ريعها للخدمة بردة دي مكن تجيب دخل
او فكرة تانية على شكل تبرع من المخدومين دي كل خادم يعلم حاجة حلوة تبرع من تكون كويسة تجمعوها بشكل جميل وتعملو زي البازار يعني اوكي ويتتفقوا على يوم يكون بعد الصلة وتدو كل خام عدد من التزاكر يبيعها واسعارها رمزية تكون على شان يبقي ضمن المعقول يعني والمقبول برده وكل بطاقة ليها الحق تدخل البازار وتاخد قطعة او تنين او ممكن تلاتة من الحلو
وعلى شكلها بردة بازار مستلزمات العيد من زينة وسديهات تراتيل وقداديس وكلو يعني تجيبوها بسعر اقل من الجملة وبعيدن تبيعو بالمعرض بهامش ربح معقول ليتشجعو الناس يشترو من المعرض ويكون فيها بردة ربح حلو يدخل لمدارس الاحد
دي افكار سريعة ايمي با رب تكون بفايدة للخدمة
الرب يقويك ويبارك تعبك
بالنهاية عزيتزتي الموضوع وتامين احتياجات الخدمة لازم يبقي لية فكر وتخطيط متواصل ميش قبل الحدث قبل بفترات لتكوني مستعدة للحدث

بالنهاية دي كلها تدابير بشرية بس اللى حقيقي بيبعت كل الاحتياجات لينا وللخدمة هو الرب يسوع لة كل مجد واكرام وسجود من الان والى الابد امين

emmmy
12-10-2011, 01:52 PM
شكرا للاستاذ ايمن على مشاركتة الجميلة
وردوا الحلو


عزيزتى ريم لأ يا حبيبتى مش كل الامور المالية بايد واحدة طبعا
كل مرحلة وليها صندوق دة فى يجى 15 صندوق فى مراحل التربية الكنيسية عندنا وكل مرحلة مسئولة عن نفسها ومع نفسها بقى
وبالنسبة لاقتراحاتك هى حلوة بس متنفعش عندنا ممكن تنفع فى الكنائس الكبيرة
انا مستنية اسمع الاراء من الخدام اية رايكم ؟

ريم الخوري
12-10-2011, 02:17 PM
بعد الردود بتاعتكم شكلي ولا فاهمة شي ههههههههههههههه لذلك افضل اتابع يا ايمي
الرب يقويك ويبارك تعبك

اناستاسيا
12-10-2011, 02:31 PM
هههههههههههه لا صدقينى مش بالظبط
ثم الصندوق مش معايا مش مسئوليتى
بس انتى قصدك اية انا مش فاهمة - يعنى اية بتستعينى ببابا نويل
بتشفعى بية قصدك -- ما هو احنا عارفين ان بابا نويل دة قديس فى الاساس


عندنا لو فية مناسبة يبقى صاحب المناسبة من القديسين هو المسئول الاول عنها
وفى المناسبة دى صاحبها بابا نويل لبداية السنة الجديدة يعنى كل قديس بيتصرف وبيبعت هداياة فى المناسبة الخاصة بة
توجد فكرة عملناها فى كنيستنا وهى عملنا جمعية اة صدقينى جمعية كل المشتركين من الخدام تبدء للفرد الواحد 25 جنية كل شهر ومن يقدر ان يدخل باكثر من فرد حسب مقدرتة ومن يقبضها هو صندوق الخدمة وهذا حتى يغطى تكلفة مناسبة عيد ميلاد او قيامة او مدارس او عيد ام
وطبعا ايد ربنا بتبارك والصندوق لا يفرغ ابد
اوعى تضحكى على الفكرة دى دى عن تجربة واثمرت كثير جدا

aymonded
12-10-2011, 02:41 PM
ازاي بقى يا أجمل أخت حلوة/ ريم
هو بس نظام كل كنيسة بيختلف عن التانية تماماً في موضوع صندوق الخدمة وموضوع التبرعات لكل خدمة، ففي مثلاً نظام الصندوق الواحد وفيه عدة صناديق وغيرها من النظام حسب ما يراه أمين الخدمة مع أُمناء خدمة المراحل، وبالطبع مش هاتلاقي النظام عام عند الجميع، أنا عن نفسي شوفت أنظمة كثيرة جداً بعضها بسيط وبعضها معقد للغاية ولكن جميعها لها هدفها الواحد، ومن الصعوبة التامة توحيد الأنظمة لأن كل جماعة بتشوف النظام الأفضل اللي يتماشى مع ظروفها علشان كده صعب نحصر الموضوع ونضعه في بنود محدده ونحكم فيها ولكن كلامك وكلامنا كلنا كلام عام ممكن يُأخذ منه فقط ما يُفيد كل مجوعة في خدمتها فقط.، ويمكن بس علشان النظام مختلف تماماً عن كنيستك فقد تهتي فيه حبتين، مع أن كل نظام في كل كنيسة يختلف شوية عن الكنيسة الأخرى ....

أقبلي مني كل التقدير لشخصك الحلو في كنيسة الله، ولتقبل أختي إيمي محبوبة الله في المسيح يسوع ردي وتعليقي معها في هذا الموضوع، النعمة معكم آمين

emmmy
12-10-2011, 02:51 PM
اهو استاذ ايمن رد عليكى ياريم
بطلى احساسك دة بقى

حبيبتى انستاسيا جمعية اية ؟
بتعملوا جمعية وصندوق الخدمة يدخل معاكم كفرد
ويقبضها الاول وبعد كدة يشارك اعضاء الجمعية لحد ما تخلص ؟؟

emmmy
12-10-2011, 02:53 PM
استاذ ايمن اية الانظمة اللى بتتكلم عنها دى
والافكار الكتير اللى شفتها اطرحها من فضلك
واعتقد ان انا وانت مش ضد الخدمة العملي
الممزوجة بالايمان والبساطة

اناستاسيا
12-10-2011, 03:04 PM
لا هو الخدام بس واللى بيقبضها كل شهر هو صندوق الخدمة

emmmy
12-10-2011, 03:25 PM
ما هو دة نفس نظام الاشتراك
بس بطريقة تانية وبشكل تانى
بيكون عندنا بيتوزع اظرف
وكل واحد مع نفسة بحسب مقدورتة
يحط فى الظرف اللى يقدر علية ويدية لمسئول الصندوق

aymonded
12-10-2011, 04:49 PM
استاذ ايمن اية الانظمة اللى بتتكلم عنها دى
والافكار الكتير اللى شفتها اطرحها من فضلك
واعتقد ان انا وانت مش ضد الخدمة العملي
الممزوجة بالايمان والبساطة

لأ طبعاً أحنا مش ضد الخدمة العملي الممزوجة بالإيمان والبساطة وكل واحد بيحاول ينظم الأمر بصور متعددة كثيرة وهذا ليس خطأ طالما هو في نور الله ولأجل مجد اسمه والخدمة...

وعموماً الأنظمة اللي باتكلم عنها يمكن بعضها لا يُناسبكم بس عموماً هاقولها: فيه نظام الصندوق الواحد، وهو الصندوق العام للخدمة اللي بينجمع فيها كل الأموال المقدمة للخدمة من الجميع، وبتكون مسئولية أمين الخدمة العام وبيعين واحد مسئول عن الدفتر اللي فيه مصادر التمويل وحصر الأموال، ثم يجتمع مع أمناء الخدمة ويعطوا تقرير كل واحد عن المرحلة التي هوأميناً عليها بعد أن يجتمع مع خدام المرحلة ويعرف احتياجاتهم ويناقشوها في اجتماع المرحلة بصورة عملية بعد الصلاة، ومن ثم يُعطي أمين الخدمة كل خدمة حسب احتياجها ومايتناسب مع الوضع المالي الموجود في الصندوق ليوازن بين الخدمات وبعضها البعض ، وهذا هو فكرة الصندوق الواحد والعام للخدمات كلها، وقد يصعب تنفيذه في بعض الأخحوال وبخاصة لو كان عدد المخدومين في كل مرحلة كبير جداً وهخذا سيسبب تعطيل في ميزانية الخدمة لأنها ستتأخر جداً ولن يتم التوازن بين الخدمات بسبب كثرة الأعداد، وهذا النظام عادة بينطبق على الخدمات الصغيرة عموماً ....

والفكرة الأخرى هو صندوق واحد لكل مرحلة يمسكها أمين الخدمة وفيها يتبرع الخدام والمخدومين حسب قدرة كل واحد ويتم توزيعها حسب الفصول وحسب الاحتياج بتدبير متقن، بحيث تُقدم ألأموال من جهة الأهم ثم المهم وهكذا ....

ويوجد فكرة عدة صناديق للمساعدة والمساهمة، وهو أولاً الصندوق المستقل بحيث أن كل فصل به صندوق خاص به يتبرع فيه الخدام والمخدومين لأجل الفصل فقط واحتياجاته الشخصية، هذا بخلاف الصندوق العام للمرحلة الذي يُساهم في الأعياد والمناسبات المتنوعة غير أيضاً الصندوق العام للخدمة الذي يُساهم في المؤتمرات وغيرها من الاحتياجات المختلفة...

وهكذا يختلف نظام الصندوق من خدمة لأخرى ومن كنيسة لأخرى وتوجد أفكار كثيرة متعددة صعب حصرها وكتابتها كلها، ولكن الفكرة العامة تدور حسب ما شرحت بإيجاز شديد... أرجو أن أكون وصل الفكرة كما قصدتها كل خدمة وتخدمها كل فكرة... النعمة معك

emmmy
12-10-2011, 06:57 PM
شكرآ إستاذ أيمن ع التوضيح
فكره الصندوق الواحد دي جميله جدآ وجديده علي الأقل بالنسبه لي أنا
بس متنفعش خالص هتسبب مشاكل لا حصر لها بين الخدمات وبعضهم

YoUsSeF_JeSuS
12-10-2011, 09:48 PM
انا اللى سعيد جدا يا ايمى ان اتشارك معاكى فى حوار مفيد زى الموضوع ده

( كلام فاضى ) هى لعب الاطفال وهدايا المخدومين بالنسبة لك كلام فاضى يا يوسف ؟؟
لالالالالالالا يا ايمى انا قلت لعب و كلام فاضى
( و ) فى حاجات كانت بتيجى الخدمة من فلوس الخدمة ملهاش لازمة وبدون ما اذكرها وصدقينى دى كانت سبب رئيسى انى اسيب الخدمة
وانا موافقك على كل اللى قلتيه وابصم بالعشرة كمان وعلى فكرة انا كنت هكتب كلامك ده بالظبط بس مسحته انا موافقك
اسيب الخدمة مش اسيب خدمتى علشان الخدمة لربنا واولاده مسيحيين او غير مسيحيين

يعنى اية ؟؟
هتعطى ازاى اذا كانت هى مفيهاش يا يوسف
انا مش فاهمة قصدك

اولا يا ايمى مفيش خدمة مفيهاش فلوس ولو حتى ربع جنيه بس
بس الفكرة هل الخدمة بتثمر الربع الربع جنيه ولا بتحوش علشان معهاش غيره
يعنى المرأة اللى مكنش معاها غير فلسين بس والفلسين كانت محتاجاهم جداااااااا بس اعطت من اعوازها والسيد المسيح فرح بيها اكتر من الغنى اللى اعطى اكتر منها بس مش من اعوازه
ثانيا الانبا ابرام اسقف الفيوم ربنا ينيحه روحه كان ومازال حبيب الفقراء ومعطى الفقراء والمساكين كان بيدى ويقول لربنا دى فلوسك انت يا رب وانا بوزعها لاولادك يعنى بيدى من احتياجات الاسقفية
ثالثا البابا شنودة نبه كتييييييير جدا على الموضوع ده على الكنايس اللى مبتديش الفقراء علشان بتطور الكنيسة
البابا شنودة بيقول انه طالما الناس بتلاقى الكنايس مبتديش الفقراء يبقى الناس نفسهم مش هيدوا الكنيسة
يدوا الكنيسة ليه اذا كانت مبتساعدش الناس وكمان فى القصة الحقيقية اللى كتبها البابا شنودة عن اسقف عرف موعد نياحته قبلها باسبوع انه اخذ الاموال اللى الناس دفعاها للكنيسة واداها لكل الفقراء اللى يعرفهم
بصراحة انا بعد الكلام الكتير ده كله ومش قادر اوصلك انا عايز اقولك ايه يا ايمى
بس بالمختصر الخدمة تدى للاطفال وتدى المحتاجين وتشجعهم علشان يجوا الكنيسة هيلاقوا ربنا جاب فلوس للخدمة زى ما بيقولوا كده من تحت الارض

فى خدمات كتيرة بتعملها الكنيسة زى خدمة اخوة الرب واعانة المسافرين واعانة الطلبة والانشطة الرياضية وانشطة الترانيم والالحان والمسرح .... الى اخره
فاحنا بنتكلم عن اجتماعات الخدمة تحديدا اللى بيتسمع فيها وعظ وشرح للكتاب المقدس وعن الكنيسة وطقسها وعقيدتها .... الخ
فلو شلنا كلمة الكنايس وحطينا كلمة الخدمات ( اجتماعات الخدمة )
ان اجتماعات الخدمة لازم تدى للناس كلها حتى من اعوازها ومن احتياجاتها زى المرأة اللى اعطت من اعوازاها

كلامك مظبوط يا ايمى ان الكنايس اللى عندها فائض تساعد الكنايس اللى عندها عجز
احنا فى منطقتنا وده مثال حى فى اكتر من كنيسة
فلما تكون كنيسة بتعمل تجديدات او اى حاجة محتاجة مصاريف كتيرة الكنايس التانية بتساعدها فعجبتنى الفكرة جدا فكتبتها

وسمحينى يا ايمى وسامحينى يا ريم انا هقتبس من كلامكم الرائع
انا يا ايمى لو معايا 500 جنيه وهدايا العيد 1000 جنيه انا هحاول ادبر الفلوس من خدمة تانية زى خدمة ابتدائى او اعدادى او ثانوى وكده يعنى من الخدمات اللى فى كنيستى لو مكملش المبلغ ان هلجا لاباء الكنيسة وهما يدونى الفلوس اكيد لانها خدمة لاولاد ربنا مش هاخدهم احطهم فى جيبى وكل الكلام ده هيحصل فى يوم او يومين بالكتير تكون عندى كل احتياجات خدمتى ومتنسيش برده ان ربنا لازم لازم لازم هيدبر مصاريف خدمة اولاده مهما كانت درجة اهتمام الخدام المسئولين

سلام المسيح معاكم ويدبر كل خدماتكم ومحبتكم لربنا فى صورة اولاده

ريم الخوري
12-10-2011, 10:32 PM
ازاي بقى يا أجمل أخت حلوة/ ريم
هو بس نظام كل كنيسة بيختلف عن التانية تماماً في موضوع صندوق الخدمة وموضوع التبرعات لكل خدمة، ففي مثلاً نظام الصندوق الواحد وفيه عدة صناديق وغيرها من النظام حسب ما يراه أمين الخدمة مع أُمناء خدمة المراحل، وبالطبع مش هاتلاقي النظام عام عند الجميع، أنا عن نفسي شوفت أنظمة كثيرة جداً بعضها بسيط وبعضها معقد للغاية ولكن جميعها لها هدفها الواحد، ومن الصعوبة التامة توحيد الأنظمة لأن كل جماعة بتشوف النظام الأفضل اللي يتماشى مع ظروفها علشان كده صعب نحصر الموضوع ونضعه في بنود محدده ونحكم فيها ولكن كلامك وكلامنا كلنا كلام عام ممكن يُأخذ منه فقط ما يُفيد كل مجوعة في خدمتها فقط.، ويمكن بس علشان النظام مختلف تماماً عن كنيستك فقد تهتي فيه حبتين، مع أن كل نظام في كل كنيسة يختلف شوية عن الكنيسة الأخرى ....

أقبلي مني كل التقدير لشخصك الحلو في كنيسة الله، ولتقبل أختي إيمي محبوبة الله في المسيح يسوع ردي وتعليقي معها في هذا الموضوع، النعمة معكم آمين



عارفة استاز ايمن وكلامك صح مية بالمية ان كل كنيسة وكل خدمة ليها خصوصيته وضعها بس بصراحة حاسة ان في توهان اوي بالموضوع يعني كل خدمة وربنا بيسهل ليها الاحتياج وان كان على الخدام دور كبير اوي انهم ينطمو الامور بشكل مستقل ومنظم حسب الاهمية بالنسبة لاحتياجات الخدمة ودا بيحدد طبيعة الصرف ليها وبشكل مسبق لتفادي هذه الاحتياجات يعني بيكون في مخصصات لكل شي على حدي بالنسبة للصندوق الواحد دا سوا الاشتراكات الشهرية او اللى بيخش كتبرع او اللى بيجي كربح لنشاط معين اتعمل من قبل الخدام
ويمكن طرحت بعض التدابير على صعيد ضيق لتامين جزء بيعتمد على مجهود الخدام بس بالاول والاخير ربنا هو اللى بينمي هذة التدابير لتعطي ثمر يسد احتياجات الخدمة
معليش انا يمكن شوية ميش عارفة حيثيات الموضوع دا على حسب طبيعة الخدمة وظروفها عندكم اي لذلك قلت بفضل اتابع بلكي قدرت اتعرف اكتر عليها يعني وكون الفكرة عنها
مرسي اوي لردك استاز ايمن الرب يبارك تعبك ومرسي لايمي لموضوعها بجد جميل ومن الامور المهمة اوي بالخدمة

ريم الخوري
12-10-2011, 10:39 PM
اهو استاذ ايمن رد عليكى ياريم
بطلى احساسك دة بقى





طبعا اشكر استاز ايمن وضح واشكرك كمان لانك طرحتي موضوع بهذه الاهمية للخدمة

بس انا فضلت اسمع واتعرف على حيثيات الموضوع من مشاركات الاخوة يعني
لقدر فيدك اكتر بس لما افهمة يعني هههههههههههه ........... ربنا يقويك يا ايمي ويبارك تعبك .

aymonded
12-11-2011, 11:11 AM
هههههههههههههههه هو الموضوع معقد للدرجة دية هههههههههه، بس هو عندك حق لأنه فعلاً ساعات بيبقى معقد لما يخرج عن بساطة الإيمان وحسن التدبير اللائق للخدمة وفق موهبة الله وتدبير الروح، كما يحدث أحياناً عند بعض الخدام الغير مدبرين، لأن للأسف مش في حد عارف أن التدبير موهبة من الله بالروح القدس، لأنه مش ينفع أن أي شخص يضع نظام صرف للأموال وهو مش عنده حسن التدبير لأجل الخدمة، ومن هنا يحدث تعقيدات كثيرة جداً وخلافات لا حصر لها ونقص في كل شيء وعدم تلبية الاحتياجات الضرورية في الخدمة لتستقيم وتمجد الله، ومش في كل الكنائس ولا كل الخدمات طبعاً بيحدجث ذلك لحسن حد يفهمني غلط، أنا بقول البعض وليس الكل فلا يأخذ أحد كلامي أنه كلام عام ينطبق على الجميع بل البعض .... وأشكرك بجد على متابعتك واهتمامك بالموضوع يا أجمل أخت حلوة، أقبلي مني كل التقدير، النعمة معك كل حين

emmmy
12-11-2011, 12:22 PM
وسمحينى يا ايمى وسامحينى يا ريم انا هقتبس من كلامكم الرائع
انا يا ايمى لو معايا 500 جنيه وهدايا العيد 1000 جنيه انا هحاول ادبر الفلوس من خدمة تانية زى خدمة ابتدائى او اعدادى او ثانوى وكده يعنى من الخدمات اللى فى كنيستى لو مكملش المبلغ ان هلجا لاباء الكنيسة وهما يدونى الفلوس اكيد لانها خدمة لاولاد ربنا مش هاخدهم احطهم فى جيبى وكل الكلام ده هيحصل فى يوم او يومين بالكتير تكون عندى كل احتياجات خدمتى ومتنسيش برده ان ربنا لازم لازم لازم هيدبر مصاريف خدمة اولاده مهما كانت درجة اهتمام الخدام المسئولين



اسامحك على اية بالظبط !! انت متصورش سعادتى بوجودك
انا عاوزة ارد بس على الجزئية دى -- معتقدتش يا يوسف ان فى خدمة هتديك حاجة فايضة منها مأظنش مع ان هو دة الصححح وهو دة المفروض وهو دة اللى لازم يحصل وهى دة المحبة وتعاليم المسيح
بس بما ان كل خدمة بقت مختصرة على نفسها من الاول للاخر بخدامها وامنائها هيقولوا احنا اولى
انا معتقدتش حتى ان كتير بيكون عندة استعداد يطلب من خدمة تانية
انت كدة عاوز ترجع لهصر الرسل بقى يا يوسف -- مكملين بعضكم بهضا فى المحبة
عموما عشان اكون صادقة معاك دة رايئ شخصة من خلال اللى النماذج الكتيرة اللى شوفتها فى حياتى
لو فى حد بيعمل اللى انت بتقولة دة يبقى مش كتير -- قليل اوى

emmmy
12-11-2011, 12:41 PM
عارفة ياريم لو عملنا نظام الصندوق الواحد اللى قال علية استاذ ايمن دة ويكون مشئول عنة خدام حقيقى يعرف يدير الامور بحكمة
هنتجب مشاكل كتير وهنتعلم نبقى خدمة واحدة وقلب واحد
عارفة من ضمن المشاكل اللى بتحصل مثلا - بنيجى فى العيد كل خدمة تجيب هدايا لاولادها
ممكن مرحلة خامسة وسادسة تجيب هدية قيمة جدا وحلوة ومرحلة تالتة ورابعة تجيب هدية بسيطة جدا
الاطفال بيبصوا لبعض وخصوصا بقى لو كانوا اخوات بتكون مشكلة والام تسمع تعليقات من الاخ الصغير يا ماما لية اخويا واد هدية حلوة وانا هديتى وحشة وانكسرت بسرعة المسات بتوعنا مش بيحبونا زى اخويا وهكذا
واللى بحكية دة حصل بالفعل مش بتخلية انا حصل قدامى

aymonded
12-11-2011, 01:11 PM
هي بالطبع مشكلة بقت صعبة جداً ومعقدة للغاية وحلها في هذه الأيام عملياً صعب للغاية، لأن معظم الخدام اليوم مش عندهم التدبير الحسن في الروح الواحد ، ومش عايزين يعيشوا جسد واحد في كنيسة واحدة متفقة، مع أنهم بيقولوا في كل صلاة قانون الإيمان الذي فيه إعلان إيماننا الواحد : [ وبكنيسة واحدة مقدسة جامعة رسولية ]
ففي كل قداس بيصلوا فيه، بيعلنوا الإيمان الواحد ولكن للأسف مش عايشين اللي بينطقوا بيه ويؤمنوا بيه وبيصلوا بيه !!! ومش عارف ازاي يعلموا الأولاد الوحدة والاتفاق في الجسد الواحد والخدام نفسهم مش متفقين في التدبير وليس لهم وحده وكل واحد يقول خدمتي وبس ويالا نفسي وخلاص وكأنه بيعلن انه منفصل عن الآخرين وبذلك عن دون وعي وإدراك بيفصل الكنيسة الواحدة على مستوى ضيق ولكن بيخسر في النهاية وبيخسر الخدمة معاه دون أن يدري .... إلهنا القدوس رأس الكنيسة يجمع كل أولادة بروح الوحدة في النور والحق وبحسن تدبير الروح آمين

ريم الخوري
12-11-2011, 08:43 PM
هههههههههههههههه هو الموضوع معقد للدرجة دية هههههههههه، بس هو عندك حق لأنه فعلاً ساعات بيبقى معقد لما يخرج عن بساطة الإيمان وحسن التدبير اللائق للخدمة وفق موهبة الله وتدبير الروح، كما يحدث أحياناً عند بعض الخدام الغير مدبرين، لأن للأسف مش في حد عارف أن التدبير موهبة من الله بالروح القدس، لأنه مش ينفع أن أي شخص يضع نظام صرف للأموال وهو مش عنده حسن التدبير لأجل الخدمة، ومن هنا يحدث تعقيدات كثيرة جداً وخلافات لا حصر لها ونقص في كل شيء وعدم تلبية الاحتياجات الضرورية في الخدمة لتستقيم وتمجد الله، ومش في كل الكنائس ولا كل الخدمات طبعاً بيحدجث ذلك لحسن حد يفهمني غلط، أنا بقول البعض وليس الكل فلا يأخذ أحد كلامي أنه كلام عام ينطبق على الجميع بل البعض .... وأشكرك بجد على متابعتك واهتمامك بالموضوع يا أجمل أخت حلوة، أقبلي مني كل التقدير، النعمة معك كل حين


ههههههههه صح متعقد حبتين يعني اعمل ايه بس كلامك جي بجوهر التعقيد بتاعي

كلامك دا بفكرني بكلام الرب لمرثا انك تهتمين لاجل امور كثيرة وانما الحاجة لواحد يعني الصندوق مهم ولية دورة بالخدمة بس ميش هدف بحد زاتة انما وسيلة اوقات بتكون سيف ذو حدين
يكفي ان اي حد يشتغل بامانة بوزنتة
بالخدمة صدقني ربنا بيبارك بالقليل ويزيدة اضعاف كمان ومتعرفيش الامو ربتدبر ازاي لسد الاحتياج بوقتة وربنا بسير المركب
اشكرك جدا على ردك استاز ايمن

ريم الخوري
12-11-2011, 09:15 PM
وسمحينى يا ايمى وسامحينى يا ريم انا هقتبس من كلامكم الرائع
انا يا ايمى لو معايا 500 جنيه وهدايا العيد 1000 جنيه انا هحاول ادبر الفلوس من خدمة تانية زى خدمة ابتدائى او اعدادى او ثانوى وكده يعنى من الخدمات اللى فى كنيستى لو مكملش المبلغ ان هلجا لاباء الكنيسة وهما يدونى الفلوس اكيد لانها خدمة لاولاد ربنا مش هاخدهم احطهم فى جيبى وكل الكلام ده هيحصل فى يوم او يومين بالكتير تكون عندى كل احتياجات خدمتى ومتنسيش برده ان ربنا لازم لازم لازم هيدبر مصاريف خدمة اولاده مهما كانت درجة اهتمام الخدام المسئولين

سلام المسيح معاكم ويدبر كل خدماتكم ومحبتكم لربنا فى صورة اولاده



معليش اخي يوسف فين دورك انت بالموضوع ميش لازم يكون ليك درو وفاعل كخادم يعني في مثل بيقول بدل ما تديني سمكة اكلها النهرة وبكرة ارجع واطلب منك تديني كمان لا ادني صنارة وعلمني اصيد وبكده تخدمني انت فكر بطرق تخليك تكتفي على القلل لفرقتك اخي يوسف مبدا المساعدة لبعض ميش غلط بس مرة وتنين بس الفرق التانية ليها الاحتياجات بتاعتها وممكن اوي مرة تلقي ومرة لا يبقي ليه من الاولى فكر بطرق تحل المشكلة من الاساس يعني وربنا بيدبر ويفتح طرق كتيرة وبيطرح بركتة فيها باي خطوة بيكون هدفها نمو الخدمة وتقدمها معليش حبيت اعلق بس على فكرة انك تاخد من فرق تانية ربنا يبارك تعبك

ريم الخوري
12-11-2011, 09:21 PM
عارفة ياريم لو عملنا نظام الصندوق الواحد اللى قال علية استاذ ايمن دة ويكون مشئول عنة خدام حقيقى يعرف يدير الامور بحكمة
هنتجب مشاكل كتير وهنتعلم نبقى خدمة واحدة وقلب واحد
عارفة من ضمن المشاكل اللى بتحصل مثلا - بنيجى فى العيد كل خدمة تجيب هدايا لاولادها
ممكن مرحلة خامسة وسادسة تجيب هدية قيمة جدا وحلوة ومرحلة تالتة ورابعة تجيب هدية بسيطة جدا
الاطفال بيبصوا لبعض وخصوصا بقى لو كانوا اخوات بتكون مشكلة والام تسمع تعليقات من الاخ الصغير يا ماما لية اخويا واد هدية حلوة وانا هديتى وحشة وانكسرت بسرعة المسات بتوعنا مش بيحبونا زى اخويا وهكذا
واللى بحكية دة حصل بالفعل مش بتخلية انا حصل قدامى
طيب خلو صندوق واحد افضل وقسمو الهدايا ولاد بنات حسب الاعمار ويبقي كلو زي بعض ومفيش مشكلة
ايمي

emmmy
12-11-2011, 10:15 PM
لأ يا ريم مينفعش لأسف
مينفعش خالص الفكره نتائج السلبيات فيها أكثر من الإيجابيات بكتير

ريم الخوري
12-12-2011, 01:04 PM
عارفة ياريم لو عملنا نظام الصندوق الواحد اللى قال علية استاذ ايمن دة ويكون مشئول عنة خدام حقيقى يعرف يدير الامور بحكمة
هنتجب مشاكل كتير وهنتعلم نبقى خدمة واحدة وقلب واحد
عارفة من ضمن المشاكل اللى بتحصل مثلا - بنيجى فى العيد كل خدمة تجيب هدايا لاولادها
ممكن مرحلة خامسة وسادسة تجيب هدية قيمة جدا وحلوة ومرحلة تالتة ورابعة تجيب هدية بسيطة جدا
الاطفال بيبصوا لبعض وخصوصا بقى لو كانوا اخوات بتكون مشكلة والام تسمع تعليقات من الاخ الصغير يا ماما لية اخويا واد هدية حلوة وانا هديتى وحشة وانكسرت بسرعة المسات بتوعنا مش بيحبونا زى اخويا وهكذا
واللى بحكية دة حصل بالفعل مش بتخلية انا حصل قدامى
هههههههههههههههه ميش رح علق لاحسن تقولي لا مينفعيش اي يا بنتي بتقفليها ليه
خليكي كده مرنة منتي بتقولي اهو الصندوق الواحد حلوووووووووووووووووووو و ولو على الهدايا متجربة يا قمر وحلو بالعكس دي افضل طريقة يحسو الاولاد او البنات بانهم زي بعض مفيش تفريق دي اغلى ودي ميش حلوه طبعا حسب الفيئات العمرية
طيب ينفع اتابع احسن ههههههه قولى كلمة مشجعة لاختك الله ........... على طول جازمة لا مينفعيش لاحسن كده احبطت
خلاص حتابع وغلوتك توبة ههههههههههههههههه ربنا يباركك ايمي

emmmy
12-12-2011, 01:16 PM
هههههههههههههههههههههه
يا نهار زى بعضوا ريم احبطت ريم عيانة بسببى
لأ يا روح قلبى بأمانة مقصدتش بس انا بتكلم من واقع الحياة المعاشة
يعنى اضحك على نفسى وعليكم واقول اااة حلوة وهايل وبرافوا
وكلوا صحح x صحح
انا بنقل الاحداث بصورتها الحقيقية بدون مجاملة او تزييييييف
قولى اللى انتى عاوزاة وعلقى كيييف ما تحبى يا بطتى واجرك على اللة
هههههههههههه

ريم الخوري
12-12-2011, 01:23 PM
ميش بوقلك تقولي على الغلط صح لالالالالالالالالا بس منجزميش لان اوقات حالة الخدمة عندك هي بتحكم انو مينفعيش بتحكم طريقة ردك على الموضوعمن واقع انت عارفية ولمساه انا عارفه يا قطة دا بس يعني شي لزوم التشجيع وتحفيز الاخرين لنبحث عن الطرق الافضل اللى تزيد نمو الخدمة وبنفس الوقت تودي هدفها اللى وجد من اجلة
انتو بجد عندكم خدمة جميلة يا قمر ومنقدريش نعمم السلبيات لاي شي ء لانها حالات فردية او نسبية والا اييييييييييييي ربنا يقويكي

YoUsSeF_JeSuS
12-12-2011, 11:21 PM
سلام ونعمة ايمى وريم وكل اخواتى
انا حاولت يا ريم اوصل لحل بالعقل البشرى المحدود
بس الحل صدقونى وارجوكم ارجوكم اسمعوه من اخوكم الصغير اللى ميستحقش التراب اللى بتمشوا عليه

الحل الوحيد هو العشور
كل فلوس تدخل للخدمة لازم يطلع منها العشور

والخادم الامين الحقيقى اللى يؤمن ويضع ثقته فى ربنا هو اللى يدفع العشور من فلوس الخدمة سواء الفلوس اللى الخدام مجمعينها من بعضهم او اللى جايلهم كتبرعات من الناس

وجربوا كده خلال الايام دى تضعوا عشر الفلوس اللى موجودة فى خدمتكم فى صندوق الكنيسة اللى ادوها لكاهن الكنيسة وشوفوا ربنا هيعمل ايه علشان فلوس هدايا العيد

صدقونى هتشوفوا تدبير من ربنا لم تراه عين هتزهلوا من اللى ربنا هيعملوا

والموضوع ده حصل قدامى مرارا وتكرارا ان ناس قريبين منى مكنوش بيدفعوا العشور فكانت حالتهم المادية سيئة جدا وابتدوا يدفعوا العشور فتغيرت حالتهم المادية للاحسن 180 درجة

وسمحونى هكررها تانى
فى خلال الايام دى روحوا لخدماتكم وعرفوهم انهم يدفعوا العشور من فلوس الخدمة ومنا لعيد هتلاقوا كل احتياجاتكم واكتر بكتيرررررر

سلام المسيح معاكم جميعا ولتكن مشيئته فى حياتكم

emmmy
12-13-2011, 11:20 AM
بس الحل صدقونى وارجوكم ارجوكم اسمعوه من اخوكم الصغير اللى ميستحقش التراب اللى بتمشوا عليه


لية كدة يا يوسف ؟؟؟ هما مين دول اللى متستهلش التراب اللى بيمشوا علية شيلتنى خطية اللة يسامحك
كلنا اخوات فى مكانة واحدة واعضاء فى الجسد الواحد انا اللى مستهلش التراب اللى بتمشى علية -- ومن فضلك متقولهاش تانى

وبالنسبة لاقتراحك هو غريب شوية بصراحة
ما هى فلوس الخدمة فى حد ذاتها عشور يا يوسف - انا واحدة من الناس بدفع عشورى كلها فى صندوق الخدمة - ثم عاوزنا ندفع عشور لمين بالظبط ؟؟ اوعى تقولى للكنيسة !!! طيب بالراحة نتناقش فيها دى بص هقولك على حاجة الكنيسة مش متكفلة بمصاريف الخدمة الا الضيئل منها جدا وعندها اهتمامات اكبر منها كتير زى اخوة الرب مثلا
وعشان كدة ربنا بيدبر مصاريف الخدمة من طرق تانية زى المثل اللى ذكرتة ليك فينا اللى بيدفع العشور لصندوق الخدمة

aymonded
12-13-2011, 12:02 PM
سلام لك يا أجمل أخ حلو وكشركة مني في الكلام ليس أكثر ...
تفتكر يا جميل هاندفع من عشور الرب عشور للرب في نفس ذات الكنيسة !!! الكلام ده لو كنا هانشتري حاجة لأنفسنا أو الفلوس من الأصل ملكاً لنا، فيا محبوب الله الحلو كل ما في الصندوق هي عشور من كل الخدام للرب ولم ولن يطلب أحد لنفسه فيها شيئاً قط !!! والرب يبارك فيها حينما يُقام عليها مدبر له موهبة الروح والكل بالإيمان يسلك لكي يُرضي الله، أقبل مني كل التقدير لشخصك المحبوب في الرب؛ النعمة معك

YoUsSeF_JeSuS
12-13-2011, 02:38 PM
فعلا يا ايمى ربنا يسامحنى لو كنت سببت لكم عثرة ، انا حقيقى متاسف
واحنا فعلا اخوات فى الجسد الواحد بس مش كلنا فى مكانة واحدة لان نجم يمتاز عن نجم شوفى بقى انتوا بتخدموا ربنا ازاى اما انا فعلى قدى

انا حاسس ان تفكيرنا متطابق قوى يا ايمى
انا فعلا كتبت الرد على السؤال ده بس مسحته قلت مش هيفيد قوى
فعلا الفلوس اللى فى الخدمة هى عشور اصلا بس ايه اللى هيحصل لو عشرنا العشور ذات نفسها ، بمعنى ان العشور تروح لاخوة الرب على الاقل اللى تعرفوهم شخصيا وما اكثر اخوة الرب فى الايام دى
وهنبقا استفدنا من كذا حاجة
اولا وسعنا نشاط خدمتنا ، بدل ما كنا مثلا بنخدم 100 مخدوم هنخدم 110 محتاجين للخدمة
ثانيا ربنا هيبارك بدرجة كبيرة جدااا وصدقونى عمركم ما هتشتكوا من قلة الفلوس تانى

هو ده الحل ممكن يكون عندكم ملحوظات كتيرة او اعتراضات اكتر ملهاش عندى حل او تفسير

جربوا ولو لمرة واحدة بس وشوفوا مش هتخسروا حاجة ده حتى انتوا هتساعدوا ناس يعنى مفيهاش اى نوع من انواع قلة الفلوس تماما

وخلوا بالكم ان الوقت بيمر وفى ناس محتاجة للمساعدة ......

ربنا معاكم

YoUsSeF_JeSuS
12-13-2011, 02:40 PM
سلام المسيح معاك اخى الحلو فى الرب
كلامك كله مظبوط بس " هو ده الحل "
ويا ريت كل الخدام وكل الخدمات تضع كل ثقتها فى ربنا بس
ربنا معاك ويرعاك

emmmy
12-13-2011, 03:06 PM
شكرا يا يوسف على متابعتك الحلوة معانا واللى حقيقى افادتنى واسعدتنى
يكفى معرفة شخصك الجميل دة فى حد ذاتة مكسب حلو فى محبة ربنا
وانا هكون صادقة معاك لابعد الحدود واقولك برغم قلة اقتناعى اوى بفكرتك
الا انى اوعدك انى هفكر فيها واعرضها على امينة خدمتى - وربنا يبارك فى القليل ويجعل منة الكتير لمجد اسمة القدوس
ربنا يباركك -- فكر وارجع خدمتك يا يوسف انت خسارة
ربنا معاك