استكش عن الغيرة لاعدادى وثانوى

[emmmy]

دونا : هالو يا شباب ازيكم
مرمر : كويسين حمدا للة على السلامة اتأخرتى لية ؟
دونا : ابدا على ما خلصت اللى ورايا - مالكم ؟؟
بيتر : يا بردوك يا دونا انكل ماجد ومس انجى سألوا عليكى يخرب عقلك البروفة والكورال واقف بسببك
مرمر : ايوة يا دونا تأخيرك دة عامل مشكلة وازمة لانك معطلة الفريق كلة والخدام زعلنين من عدم الالتزام دة ادخلى بقى عرفيهم انك جيتى بسرعة وطمنيهم لحسن انكل ماجد قلقان عليكى وموابلك مقفول كمان لانة اتصل بيكى وسيادتك مش بتردى
دونا : اية دة اية دة !!! ولية دة كلة ؟؟ بالراحة عليا بس - هى مش الست لميا جت وشرفت بسلامتها يبقى خلاص البروفة هيبدأ والكورال مش هيقف
هى فين صحيح مجتش لسة ؟
بيتر : لأ جت بس جوة مع انكل ماجد ومس انجى بتسألهم على حاجة بس اية الطريقة اللى بتتكلمى بيها على اختنا لميا دى يا دونا ؟
سامح : ايوة صحيح مالك يا دونا ؟ لية كدة ؟
دونا : يعنى انتوا مش عارفين مالى !!! بصراحة بقى انا اصلا مكنتش جاية خالص وبفكر اعتزر عن اشتراكى فى الكورال كلة
مرمر : لية يا دونا !! لية كل دة !! مالك اية اللى مزعلك كدة ؟
دونا : يا مرمر انا حاسة اننا كلنا ملناش لازمة واهم ما فينا لميا هى اللى كل الانوار مركزة عليها وانكل ماجد ومس انجى مش شايفين غيرها وكأن مفيش غيرها فى الكورال
وهى كمان شايفة نفسها اوى ومحدش عارف يكلمها
بيتر : لا يا دونا بصراحة بقى انتى معندكيش حق فى دى - لميا انسانة ممتازة وعمرها ما كانت شايفة نفسها عننا بالعكس انا بحس انها بتحاول تقرب مننا كلنا وتبقى مننا وتدخل فينا بس احنا اللى مش بنديها فرصة عشان حاسين انها احلى مننا كلنا وصوتها جميل وواخدة اهم دور فينا وواخدة اعجاب واهتمام الخدام عننا دة كلة صحيح وانا منكرش دة – بس بردوا هى انسانة كويسة جدا ومحدش فينا يقدر ينكر دة -- ولا اية يا جماعة ؟؟
دونا : حيلك حيلك - هى مين دى اللى احلى مننا !! لية ان شاء اللة فيها اية زيادة ؟
مرمر : طيب بس بقى انكل ماجد جاااى
انكل ماجد : حمدا على السلامة يا مادونا - اتأخرتى لية كدة ؟
دونا : سورى يا انكل
انكل ماجد : سورى يا انكل !! طيب وبعدين - انتى مجاوبتيش على سؤالى انا قلقت من تأخيرك فى حاجة حصلت ؟ وموبايلك مقفول زود قلقى
دونا : لأ يا انكل مفيش حاجة انا بس كان عندى شوية حاجات بعملها وجيت على طول
انكل ماجد : اااااة !! دلع يعنى ؟
اسمعوا يا شباب اللى حصل دة انا مش هسمح انة يتكرر تانى واللى هيتأخر بدون اسباب مقبولة مش هتنسناة تانى لان دة اسمة عدم التزام وعدم احترام المواعيد وعدم احترام مشاعر الاخرين دة اسمة استهتار
مس انجى : جت ومعاها لميا على صوت انكل ماجد !! مالك يا انكل ماجد فى اية حضرتك منفعل لية كدة ؟
انكل ماجد : اتفضلى يا مس انجى الاستاذة اللى كنا مستنينها وقلقنين عليها طلع تأخيرها دلع مش اكثر
مس انجى : طيب اهدى طيب من فضلك وخد الفريق وابدأ معاهم وسبلى دونا شوية انا عاوزاها يا انكل لو سمحت وشوية وهحصلك
انكل ماجد : اوك يا مس حاضر - اتفضلوا يا حضرات يلا هنبدأ
دونا : تبكى !! ووجها فى الارض بسبب انفعال انكل ماجد
مس انجى : دونا يا حبيبتى انتى بتعيطى لية دلوقتى ممكن تبطلى عياط عشان نعرف نتكلم ؟ من فضلك يا دونا خلاص بقى كفاية
دونا : بانفعال !! يا مس انا مقلتش لحد يستنانى - وكمان انا اصلا دورى صغير فى الكورال ميستهلش انكم توقفوا الكورال كلة عشانى ابدأوا عادى وانا لما اجئ هكمل معاكم ومفيش داعى لكل اللى عملة انكل ماجد دة واحرجنى قدام اخواتى
مس انجى : اولا يا دونا احنا قلقنا عليكى صرف النظر عن الكورال ومكناش عارفين نركز فى حاجة وعاوزين نطمن عليكى يبقى جذائنا بقى اننا بنحبك وانكل ماجد انفعل من القلق عليكى بردوا
ثانيا : مين قالك ان دورك صغير وممكن الاستغناء عنك ؟
الكلام دة مش صحيح يا حبيبتى خالص انتى فاهمة غلط كلنا دورنا مهم ومحدش فينا يقدر يستغنى عن التانى لاننا بنكمل بعض
دونا : لأ ممكن تستغنى عنى انا دورى صغير لكن مش ممكن تستغنى عن واحدة زى لميا مثلا دورها كبير ومهم ومش ممكن الاستغناء عنها ابدا - مش كدة ؟
مس انجى : لأ طبعا مش كدة !! يعنى انا اقدر اعمل الكورال بلميا لوحدها من غير الباقى مثلا -- لميا حلوة وملتزمة وبتحفظ بسرعة هل دة معناة انى اقدر اكتفى بيها واستغنى عن الباقى يا دونا ؟؟؟ ما تردى عليا سكتى يعنى ؟؟؟
يا حبيبتى احنا هنا كلنا بنكمل بعض ومنقدرش نستغنى عن بعض ولميا زيك وانتى زيها انا عاوزاكى تركزى فى اللى معاكى مش مع لميا ربنا بيدينا مواهب مختلفة ووزنات مختلفة - ربنا مخلقش اتنين فى الدنيا زى بعض فى كل حاجة عشان يميزهم عن بعض وعشان هو مبدع مخلقش ادم وطبع الباقى من اولادة بكربون وخلانا كلنا شكل بعض مش هينفع
دونا : يا مس انا حاسة ان لميا احسن منى وحاسة انكم كلكم بتحبوها اكثر مننا كلنا
مس انجى : كلنا ؟؟ كلنا مين يا دونا ؟؟
دونا : انتى وانكل ماجد وكل الخدام
مس انجى : طيب اقولك حاجة تانية يا دونا انتى مصممة ان لميا احلى منك وكلنا بنحبها اكثر منكم كلكم
اية رايك نتفق انا وانتى اتفاق !! تعالى نشوف الحاجات الحلوة اللى فى لميا ونعمل زيها ونقلدها ونشوف لية الناس بتحبها وبتحترمها ونحاول نطبق دة فى نفسنا
دونا : بس فى حاجات يا مس مينفعش اقلدها فيها لانها مش عندى اساسا زى صوتها الجميل انا اقدر اقلدها فى حاجات وحاجات لأ
مس انجى : تمااام يا دونا - انتى بدأتى تهدى اهو وتشوفى الامور صحح اهو يا حبيبتى
انتى واخدة دور عزف بتعرفى تعزفى وواخدة دور فى فريق العزف
هى لميا بتعرف تعرف ؟؟
دونا : لأ يا مس
مس انجى : هل نقدر نستغنى عن حاجة من الاتنين دول فى الكورال ؟؟
الصوت الجميل والعزف ؟؟
دونا : لا يا مس
مس انجى : يبقى خلاص اتفقنا !! صحح ؟؟ اية مش بتردى عليا لية ؟؟
دونا : اصلك فكرتينى بحاجة يا مس
مس انجى : حاجة !!! حاجة اية يا ترى ؟؟
دونا : افتكرت قايين لما حس ان هابيل احسن منة وكانت النتيجة وحشة اوى – تفتكرى ان انا زى قايين يا مس انجى ؟
مس انجى : برافوا عليكى دة مثال فعلا للغيرة اللى مش حلوة وممكن تضرنا وتتعبنا وتضيعنا
بس فى غيرة تانية حلوة يا دونا انى اقلد الحاجات الكويسة اللى انا شايفاها فى الناس واحاول ابقى زيهم فيها دة مش عيب بالعكس دى الغيرة الحلوة اللى تنمى وتبنى وتغيرنا للاحسن
دونا : صحح يا مس صححح عندك حق

انكل ماجد : اية يا مس انجى لسة قدامكم كتير احنا خلصنا وانتوا لسة قاعدين
مس انجى : معلش يا انكل انا فعلا محستش بالوقت مع دونا بس كان لازم اقعقد معاها الشوية دول اسفة يا انكل ماجد عموما انا هعوضها الحصة دى مش مشكلة
لميا : او انا ابقى اجئ ليك البيت واقعقد معاكى واقولك اللى فاتك يا دونا مفيش مشكلة
لو تحبى انا تحت امرك ياريت تسمحلى اخد البركة دى

دونا : تنظر الى مس انجى باندهاش وخجل – ثم تنظر الى لميا بابتسامة بسيطة مع لمعان دموع فى العين بسيطة – مرسى يا لميا ربنا يخليكى
انا عاوزة اقول حاجة اخيرة لانكل ماجد
انا اسفة يا انكل
انكل ماجد : لأ يا مادونا مفيش حاجة بالعكس انا اللى اسف كنت قاسى معاكى معلش متزعليش منى حقك عليا
بيتر : بيهزر ويحاول يحول الموقف لجو دعابة ومرح – لأ يا انكل انا مش هصالحك اللى لما تجبلى ايس كريم وبالشكولاتة كمان هههههههه
الاصداقاء كلهم : يضحوا بنفس واحدة جميلة ومحبة جميلة
انكل ماجد : يضرب بيتر على راسة ضربة خفيفة بدعابة وحنان ويقولة انت مالك انت يا لمض خليك فى حالك
مس انجى : خلاص يا انكل ماجد خلاص يا دونا معادنا يوم الاربعاء الساعة 5
الاصدقاء كلهم اوك يا مس
يلا باى

[emmmy]

على فكرة لو حد حابب اضافات
وحس ان الاستكش صغير انا ممكن
اعمل تفاصيل تانى هو صغير ولا حلو

[ريم الخوري]

حلو يسلموا يا قمر الرب يبارك تعبك ويقويكي

[اشرف وليم]

شكرا لتعب محبتك
الرب يبارك حياتك
رائع

[emmmy]

مرسى ليكم ولمروركم الجميل
اللى حقيقى اسعدنى كتير

[new.marina]

روووووووووعة
ربنا يعوضك تعب محبتك
http://t0.gstatic.com/images?q=tbn:ANd9GcRsNHa29wqM0WK_eJywN3lhl0rWIg-5okN8JD4iSQmIR-DnQORv5w (http://www.google.com.eg/imgres?q=thanks&um=1&hl=ar&sa=N&tbm=isch&tbnid=EZ0IWd92f2y43M:&imgrefurl=http://www.wondercliparts.com/thanks/cliparts-details.html%3Fid%3D542&docid=hK8ZIYrIfR1rWM&imgurl=http://www.wondercliparts.com/thanks/thanks_graphics_08.gif&w=300&h=300&ei=YNJET4vWHKSi4gTvyoD3Ag&zoom=1&iact=hc&vpx=4&vpy=80&dur=925&hovh=225&hovw=225&tx=71&ty=154&sig=102135419174615162281&page=15&tbnh=117&tbnw=117&start=166&ndsp=12&ved=0CLMGEK0DMK0B&biw=800&bih=446)