كُتب : [ 01-24-2008 - 07:20 PM ]
نصائح ايام الخطوبة آنستي العزيزة.. لو ربنا فك عقدتك.. واتخطبتي.. فإليك نصائح حتى تأخذي بخطيبك من مركب الخطوبة إلِّي محدش عارف هاترسى على إيه.. إلى مثوااااه الأخير في قفص النسانيس.. قصدي قفص الزوجية السعيد.. أجمل ما في الخطوبة العزومات الرومانسية.. على أحلى محلات أكل في البلد.. واللي عمرك مانتي شايفاها بعد الجواز.. المهم نصائحي لك عند أي عزومة مع خطيبك.. كلها رقَّه ... 1- الأول لازم تعرفي إن الشوكة والسكينة بيتمسكوا من إيديهم من الطرف يعني مش من الوسط ولا من البوز زي الخنجر ولا من فوق طبعًااا 2- العيش أوعي تفضحينا وتقطعيه بسنانك.. ولا الرغيف نصين بأيدك وكل نص لقمة وتحشري.. أوعي.. العيش بيتقطع بالسكينة في الطبق .. وبعدين تاخدي لقمة.. لقمة.. بالعافية.. قال يعني نفسك مسدودة.. اضغطي على أعصابك جدااا وبعدين لما تروَّحي.. إبقي بعتري في الاكل زي مانتِ عايزه.... 3- الشوووربة.. أبوس كعب رجلك.. بند الشوربة ده مهم جدًاااا.. الشوربة تتشرب من غير صوت خالص.. ومن غير ماتقعدي تنفخي فيها.. زي القهوجي اللي بينفخ ف الحجر للزبون .. وطبعًاااااا عايزك تنسى تمامًا.. السلطانية اللي بتقيميها على بقك ف البيت.. وتدلدقي على روحك.. بالمعلقه وبدون صوت.. سخنة ولعة برضه بدون صوت.. وتسيبي تلت الطبق على الأقل.. مش تميليه.. عشان تشربيها لآخر نقطة..... 4- الرز طبعاً .. بيتاكل بالشوكة.. أوعي إيدك تتمد على المعلقة.. وتغرفي من طبق الرز وتكلي.. إوعي.. الرز بالشوكة.. وكأنك بتبوسيه مش بتاكليه.. 5- المكرونة.. الاسباكتي.. برضه بالشوكة.. تتلف على طرف الشوكة.. لحد ما تخلص وبعدين تحطيها في بؤك من سكات.. مش تشفطي المكرونة عود عود.. 6- السمك.. مشكلة.. شوفي.. بتفصلي اللحم عن الشوك.. إزاي..؟؟ تقطعي اللحم من النص.. بالطول وبعدين تفردي اللحم على الجانبين ولما تخلصي ناحية.. متقلبيش السمكة.. بلاش ذكاء.. شيلي السلسلة بالشوكة والسكينة وحطيها ف جنب الطبق وكملي أكل النص التاني.. وبدل الفيلم الهندي ده.. نصيحة.. ماتكليش السمك خالص.. قولي مابحبش السمك وخلصي نفسك.. 7- الجمبري.. -إذا كنتي عارفاه-.. أول ماطبق الجمبري ينزل.. بصيله بقرف واحتقار شديدين.. آل يعني زهقانة من كتر أكل الجمبري الجامبو ف بيت ببااااا.. وأتنهدي جامد وقولي.. برضه..؟؟؟ وتروحي قاطعة راس الجمبريياية.. بالشوكة.. أنا ف عرضك إنسي المصمصة دلوقت.. 8- البطاطس سواء مسلوقة أو محمرة.. أوعي تهرسيها وتحطيها على الرز وتكلي ...لا..لآ...لآ...بالشوكة حتة حتة وإنت زي ما تكوني هاتعيطي من كتر ما البطاطس صعبانة عليكي.. 9- الفاكهة.. لو الفاكهة فيها بذر.. طلعيه من بؤك بالراحة وحطيه ف إيدك وهي مقفولة.. وبعدين ف طفاية السجاير اللي ع الترابيزه.. أوعي ياحبيبتي من نظام التفتفة للبذر.. إنسي.... 10- ولما تخلصي أكل تحطي إيدك على بطنك.. -اللي عصافيرها بتصوصو من العينات اللي كلتيها-.. وتقولي له مش ممكن.. أنا عمري ما اتفجعت كدة.. أنا أودامي أسبوع.. هابطل أكل فيه..... وبعدين تمسكي الفوطة اللي دايمًا موجودة ع التربيزة من غير لازمة.. وتبوسيها.. آل يعني بتمسحي بؤك.. وبعدين تستأذني منه لدخول التوليت لإصلاح ماكياجك.. وتخشي التواليت وتطلعي من شنطة إيديك.. لفة الفول والطعمية اللي جايباها معاكي.. وبالهنا والشفااااااااااا اتمنى تكونوا يا بنات استفدتم و يريت الللي يجرب النصيحة يبقى يقولنا النتيجة و مستني ردودكم بعد فسخ الخطوبة ان لما العريس يعرف حقيقتك الهدف اختي في المسيح تأكدي ان صفاتك ايام الخطوبة هامة جدا ان تكون طبيعية و ليس فيها تظاهر او تعالي لتتأكدي اذا كان حبيبك سيعتاد على هذه الصفات ام لا و يجب ان تكوني صريحة معه في كل شيء لان الكذب في هذه الفترة سوف يأتي عنه عواقب وخيمة بنهايتها . حاولي ان تعرفي ماذا يحب و روضي نفسك عليه و لكن لا تتظاهري فينكشف امرك في مرة فيكون نتيجة ذلك ضياع حبيبك منك و لازم تعرفي ان كل ما الشخص حس ان حبيبته معاه على طبيعتها و مش ببتكابر و متواضعه زادت جمال في نظره حتى ولو كانت تصرفتها ليس بالاتيكيت والزوق الرفيع بتاع بنات الزوات هوه مدام بيحبها هيحب طبيعتها الحلوة و نفسها المرح و كفاية قوي انها تكون من النوع اللي بيهزر مش القفل يعني تضحك معاه او تعاكسه كده و لاحظي اختي انه لو عرف انك كده ممكن هوه كمان يتظاهر عليكي برضه و بكده تبقوا بنتوا حياتكم من البداية على غش و خداع و ده طبعا خطأ شنيع قد يؤدي لخراب البيت و عدم عماره ،و لو نفذتي النصايح ديه اختي بكده تكوني بجد استفدتي من فترة الخطوبه و اتعرفتي فعلا على شريك حياتك مناسب ليكي ام لا ؟ اسف جدا على الاطالة و ارجو تكونوا ضحكتوا و استفدتوا من الموضوع ومنتظر ردودكم الجميلة المصدر: †† ارثوذكس †† - من قسم: الضحك والفرفشة